Ka Fen Mmolnetä fän iten eü Osukosuken Fönü Mi Efeiengaü?
1. Pwata a pwäratä mirit an emön ammolnatä fän iten ekkewe osukosuk mi efeiengaü?
1 Iteiten ier, fite milion aramas woon unusen fönüfan, kapachelong chommong pwiich kewe, ra küna feiengaü seni ekkewe chechchechin fönü, lö watte, taifun, ewüniyär me noter. Pokiten ekkeei osukosuken fönü mi efeiengaü repwe weiweitä me repwe tongeni kkü kich, eü alen tipatchem ach sipwe mmolnetä me mwen ar repwe fis.—SalF. 21:5.
2. Pwata a lamot sipwe esile ngeni ekkewe elter leeniach me nampaan nöüch fon?
2 Mmolnetä Me Mwan: Fän ekkoch ekkewe nöüwisen mwu ra öüröüra aramas ussun eü osukosuken fönü mi efeiengaü epwele toriir. A lamot sipwe älleäsochisi ekkena kapasen öüröür. (SalF. 22:3) Ekkewe elter lon ena atun repwe älisi meinisin chon ewe mwichefel le ammolnatä. Mwirin ewe osukosuken fönü mi efeiengaü, ekkewe elter repwe pwal cheki emön me emön lon ewe mwichefel ika ir rese feiengaü me ppi ika met sokkun älillis epwe lamot ngeniir. Ekkewe elter repwe pwal ikisöni rekotun chon ewe mwichefel ren ia ra nonnom ie me nampaan nöür fon fän iten ar repwe mwittir älisiir. Ina minne, ika emön epwe mwöküt ngeni pwal eü leeni, a lamot an epwe kan esile ngeni ewe seketari are ewe chon emmweni ewe puk study an we mineföön address me nampaan nöün fon.
3. Ifa ussun sipwe älillisöch ngeni ekkewe elter ika kich mi nonnom lon eü leeni mi sou fiffis feiengaü lon?
3 Ika ewe mwichefel a nonnom lon eü leeni mi sou fiffis feiengaü lon, ekkewe elter repwe tongeni eisini chon ewe mwichefel itan aramaser mi nonnom lon pwal eü leeni ese wor feiengaü lon me nampaan nöür fon pwe repwe tongeni kököriir ika a wor efeiengaü. Iwe, ekkewe elter repwe tongeni silei ia pwiich kewe ra sülo ie. Ekkewe elter repwe pwal tongeni akkota met chon ewe mwichefel repwe föri ika a fis eü osukosuk mi efeiengaü ussun chowean makken ekkewe pisek repwe ammolnatä fän iten ewe osukosuk mi weiweitä, ekkewe kokkot ren ia aramas repwe sülo ie me ewe kokkotun älillis fän iten ekkewe mi apwangapwang. A mmen lamot an ewe mwichefel tipemecheres le angang me ren ekkeei kokkot mi pwäratä tong.—Ipru 13:17.
4. Met sipwe föri ika a fis osukosuk mi efeiengaü lon sopwuch we?
4 Mwirin ewe Osukosuk: Met kopwe föri ika eü osukosuk watte a fis lon sopwum we? Tümünü osupwangen om famili lon pekin aion. Ika mi tufich reom, älisi pwal ekkewe ekkoch. Inaamwo ika kese osupwang ren älillis are kese feiengaü, kopwe chök esile ngeni noum we puk study overseer are pwal emön elter ussun nonnomum. Nge ika ka osupwangen älillis, kopwe lükülük pwe pwiich kewe ra achocho ar repwe älisuk. (1 Kor. 13:4, 7) Chechchemeni pwe Jiowa mi silei nonnomum; eäni lükülük woon pwe epwe apöchökkülok. (Kölf. 37:39; 62:8) Awora älillis lon pekin ngün me pekin memmeef ngeni ekkewe ekkoch. (2 Kor. 1:3, 4) Ren ükükün om tongeni, mwittir liwiniti om kokkot lon pekin ngün ren om fiffiti mwich, afalafal me met kkan.—Mt. 6:33.
5. Ifa ussun fisitään ewe osukosuk mi efeiengaü a kkü ekkewe Chon Kraist?
5 Inaamwo ika ei fönüfan a fokkun lolileniesini fisitään ekkewe osukosuken fönü mi efeiengaü, nge kich sipwe tongeni äpilükülüköch. Arapakkan chök, meinisin ekkena osukosuk repwele morolo. (Pwar. 21:4) Nge iei chök mwo, sipwe ammolnatä fän tipemirit fän iten ekkewe fansoun osukosuk me weires me sipwe chök amwöchü ach tinikken le afalafala ewe kapas allim ngeni aramas.