Äppirü Kraist lon Om Angangen Afalafal
1 Jises a isetiu ewe leenien äppirü pwe sipwe tapwelo mwirin lon ach angangen afalafal. A pwäratä an tong mi alolloon ngeni Kot me aramas fän chommong me lon sokkopaten lapalap. A asukula ewe enlet ngeni chon mosonoson me a enletin kirekiröch ngeni ekkewe mi osupwang me riäfföü.—Mt. 9:35.
2 Än Jises Leenien Äppirü me Afalafal: Jises ese rikilo seni an angang ren an fiti mwökütükütün politics are än aramas kokkotun älisatä chon sopwur kewe. Ese pwal mut ngeni och angang pwe epwe arikalo i seni an we angang mi fokkun lamot. (Luk 8:1) A äkkäeüin föri ewe angangen afalafala ewe kapas allim ussun än Kot we Mwu, pun ina chök ewe mettoch epwe unusen pwäkini än aramas kewe osukosuk. A fokkun lamot än Jises we angang nge mi kaük ewe fansoun an epwe föri. Lupwen ekkewe chon Capernaum ra mochen pwe Jises epwe nomwotiu rer, a apasa ngeni nöün kewe chon käeö: “Sipwele chok feilo ekis . . . pwe upwe afalafal ie, pun iei popun ai feito.”—Mk. 1:38.
3 Mwirin än asukula nöün kewe chon käeö, Jises a tinirelo ren ekkeei kapasen emmwen: “Oupwe afalafala, ‘Ewe muun lang a arapoto.’” (Mt. 10:7) A asukula nöün kewe chon käeö pwe ewe Mwu epwe nampa eü lon manauer. (Mt. 6:33) Me mwen an a feitä läng, Jises a affata ngeniir met repwe föri. A apasa: “Iei minne, oupwe feilo asoulangalo chon fonu meinisin.”—Mt. 28:19.
4 Lamoten ewe Mwu: Itelapenmongun än Jises we afalafal ina än Kot we Mwu. A pesei nöün kewe chon käeö ar repwe pwal ina ussun lon ar afalafal. Än aramas achocho le pwäkini ar kewe osukosuk resap tongeni sopwöch. (Jer. 10:23) Än Kot we Mwu chök epwe epinalo iten Kot me angasalo aramas tori feilfeilo chök. (Mt. 6:9, 10) Ach afalafala ewe enlet ussun ewe Mwu ngeni ekkewe mi “letipeta o kechü ren ekkewe föfför mi anioput” ra fiffis woon fönüfan epwe älisiir le küna pwapwa me sopwöch iei, me amwöchü eü äpilükülük mi lüküchar fän iten mwach kkan.—Is. 9:4.
5 Jises a chüen ekkemmweni ewe angangen afalafala ewe kapas allim ussun Mwuun Kot, me a älükülük ngenikich an we älillis. (Mt. 28:20) Ifa ükükün ach äppirü ewe pisekin nengeni Jises a isetiu fän itach? (1 Pit. 2:21) Lon ei ränin sopwoloon mi atapwalapwal, sipwe föri ükükün ach tufich me pöchökkül le äppirü ewe leenien äppirü Jises a isetiu lon ewe angangen afalafal!