“Oupwe Föri Iei Usun Pwe Minen Achechemeniei”
Ächechchemen Mäloon Jises lon April 2
1. Pwata April 2, 2007 epwe eü fansoun mi fokkun aüchea?
1 Lon April 2, 2007, fite milion aramas woon unusen fönüfan repwe mwichfengen pwe repwe chechchemeni asorun mäloon Jises we. Jises a mälo pokiten I emön chon ätekiatäi än Seman we nemenem, iwe, a ännetatä pwe mi chofona än Setan tipi ngeni Kot pwe aramas ra chök angang ngeni Kot pokiten ra chök pwisin ekieki feiöchür. (Hiop 2:1-5) Ewe Fääfen Ach Samol a pwal ächchema ngenikich pwe ren an asoresini manauan we mi unusöch, esor tipis ren, Jises a ‘fangala manauan fänäsengesin chomong aramas pwe möön [kepichin] manauer.’ (Mt. 20:28) Ina minne, Jises a allükü ngeni nöün kewe chon käeö: “Oupwe fori iei usun pwe minen achechemeniei.” (Luk 22:19) Om meefi kilisou ren ei liffang mi fokkun aüchea a amwökütuk pwe kopwe poputä le ammolnatä om kopwe chechchemeni ei föfförün tong mi lap seni meinisin?—Jon 3:16.
2. Ifa ussun sipwe ammolnatä letipach fän iten ewe Ächechchem?
2 Ammolnatä Letipom: Ren ach ekieki met a fis le sopwoloon ränin manauen Jises ussun emön aramas, sia tongeni ammolnatä letipach ngeni ei ächechchem. (Esra 7:10) Ren an epwe ammolnatä letipach, mei wor eü schedule fän iten älleään Paipel mi sokkolo aüchean lon ewe Examining the Scriptures—2007 pwal me lon ewe 2007 Pwinin Maram . Ei schedule mi chök fokkun weneiti ekkewe mettoch ra fis ngeni Jises lon pwal chök ekkewe rän me mwen an epwe mälo. Ekkeei rän me pwinin maram mei kapas ussun lon Paipel ra alongolong woon ewe pwinin maram an chon Jus. Me ren ekkewe chon Jus, ra älleäni eü rän seni tuputiuen ewe akkar lon ewe rän mwan tori tuputiuen ewe akkar lon ewe rän mwirin. Ina minne, ewe älleään Paipel fän iten ewe Ächechchem a fen schedule me ren ena kokkotun älleään rän loom. Ach enniwilisefälli ekkena pworaus me pwal ach ekiekifichi fiti iotek ussun alolloonun än Kot tong epwe älisikich ach sipwe unusen feiöch seni ewe Ächechchem.
3. Ifa ussun sipwe älisi ekkewe ra etiwa ewe pworaus me chokkewe rese chüen akkafalafal ar repwe küna feiöch seni ewe Ächechchem?
3 Etiwa Ekkewe Ekkoch Ar Repwe Fiti: Ewe insert lon Ach Angangen Afalafala Ewe Mwu minen February a esilesil ngenikich pwe epwe wor eü angangen esilesil mi sokkolo aüchean le etiwa ekkewe aramas fän iten ei fansoun mi fokkun lamot. Ka fen föri om kokkot pwe kopwe unusen fiti ei campaign? Ka fen makkei iten ekkewe aramas kopwe etiwer, me ka fen poputä le chuuriir? Akkota pwe kopwe warekai lon ena pwinin Ächechchem pwe kopwe kapong ngeni ekkewe ka etiwer pwal ekkoch aramas repwe feito. Ka tongeni mommot rer, ppi ika mei wor nöür Paipel me puken köl. Paniir ngeni pwiich kewe pwe repwe silefengeniir. Mwirin ewe prokram, awora om fansoun le älisiir ika mei wor ar kapas eis. Etiwer pwe repwe fiti ewe afalafal mi kkolo aüchean fän April 15. Ekkewe elter repwe piiöchü pwe chokkewe rese chüen akkafalafal me fiffiti mwich repwe nöüni ekkewe taropween etiwetiw fän iten ewe Ächechchem me ewe special afalafal.
4. Ifa ussun sipwe älisi ekkewe aramas ar repwe feffeitä lon pekin ngün mwirin ar fiti ewe Ächechchem?
4 Älisi Ekkewe Ra Kerän Fiti me Ekkewe Rese Chüen Akkafalafal Ar Repwe Feffeitä: Ewe chon afalafal lon ena Ächechchem epwe aweweei ewe kokkotun käeö Paipel ngeni aramas me epwe pesei ekkewe minefö ar repwe sopwelo ar käeö ussun Jiowa. En mi tongeni eäni ekkena pworaus pwe longolongun om äkkälisi chokkewe ka etiwer lon pekin ngün. Ika resaamwo käkkäeö Paipel iei, kopwe mwittir chuuriir mwirin ewe Fääf me äiti ngeniir ewe kokkotun käeö Paipel. Fän iten ar repwe feffeitä lon pekin ngün, a lamot pwe repwe fiffiti ekkewe mwich lon mwichefel. (Ipru 10:24, 25) Ina popun, kopwe peseer ar repwe poputä le fiffiti mwich iteitan. Ren ekkewe rese chüen fiffiti mwich me akkafalafal nge ra fiti ewe Ächechchem ekkewe elter repwe akkota le chuuriir pwe repwe älisiir le ekkekieki woon ekkewe pworaus ra rongorong lon ewe Fääf. Ena mettoch epwe tongeni apöchökküler ar repwe fiffiti mwich me akkafalafal sefäl.
5. Ifa ewe feiöch sipwe kini seni ach fiti ewe Ächechchem?
5 Ewe fansoun Ächechchem a awora fansoun ach sipwe ekilapei met Jiowa me Jises ra föri fän äsengesich. Ach ekilapei ekkena mettoch epwe alolloonalo ach tong fän iter me epwe kkü ach föfför. (2 Kor. 5:14, 15; 1 Jon 4:11) Iei ewe fansoun ach sipwe mmolnetä me chienach kewe fän iten ei fansoun mi fokkun lamot atun sia ‘pwarata maloon ach Samol.’—1 Kor. 11:26.