“A Pwapwa ewe Mwän Mi Likitü fän Sossot”
1 Chon Kraist meinisin repwe küna sossot. (2 Tim. 3: 12) Ekkewe sossot repwe feito seni samau, osupwangen mettoch, mochenia, ika riäfföü-mwääl are lon pwal ekkoch napanap. Setan a föri ekkewe sossot ren an epwe ekisatiu ach achocho, epwe efisatä ach sipwe tümününgaü ngeni ach angangen afalafal, ika fen sotuni ach sipwe ükütiu seni ach angang ngeni Kot. (Hiop 1:9-11) Nge ifa ussun ach likiitü fän sossot epwe emmwen ngenikich pwapwa?—2 Pit. 2:9.
2 Ammolnoketä fän iten Sossot: Jiowa a awora än we Kapas mi enlet, pachelong pworausen manauen Jises me an kewe afalafal. Ren ach akkaüseling me akkapwönüetä alon Jises kewe, sia föratiu eü longolong pöchökkül me pwal mmonletä ngeni ekkewe osukosuk watte. (Luk 6:47-49) Sia pwal angei ach pöchökkül seni pwiich kewe lon pekin ngün, seni ach kewe mwich, me seni nöüch kewe puk me chassi mi kawor seni ewe mwichen chon angang mi tuppwöl me tipatchem. Sia pwal alamota iteitan än Kot we liffangen iotek.—Mt. 6:13.
3 Jiowa a fen awora ngenikich eü äpilükülük. Lupwen sia alapalo ach lükülük lon än Jiowa kewe pwon, ach lükülük a wiliti “efoch angkön ngunuch mi enlet o wenechar.” (Ipru 6:19) Lon fansoun loom, ekkewe siip resap sü seni oroor ika ese wor ar angkö inaamwo ika mi ränöch. Ika a wor och mölümöl a mwittir fisitä, ewe angkö epwe koturutiu leset pwe epwe tümünü ewe siip an esap ffan woon ekkewe föürupw. Pwal ina chök ussun, ika sia lükülük woon än Jiowa kewe pwon iei, iwe epwe annükücharakich lupwen epwe fis ekkewe mölümölün osukosuk. Weires epwe tongeni mwittir piitä. Inaamwo ika me lepoputään än Paul me Parnapas angangen afalafal a ketiu me lon Listra, nge a mwittir siwil lupwen ekkewe chon Jus mi u ngeniir ra tolong.—Fof. 14:8-19.
4 Likiitü A Atoto Pwapwa: Likiitü lon ewe angangen afalafal inaamwo ika a wor minen eppet, epwe aworato kinamwe lon ekiekich. Sia pwapwa lupwen sia kapachelong lein ekkewe mi küna esiit fän iten Kraist. (Fof. 5:40, 41) Likiitü fän sossot epwe älisikich le ämääraatä ekkewe napanap tipetekison, älleäsochis me unusen likitü. (Tut. 8:16; Ipru 5:8; Jem. 1:2, 3) A asukulakich ach sipwe eäni äpilükülük woon Jiowa, sipwe lükülük lon an kewe pwon me sipwe sülong fän an tümün.—SalF. 18:10.
5 Sia silei pwe sossot ese nomottam. (2 Kor. 4:17, 18) Sossot a awora ngenikich och fansoun pwe sipwe anganga ükükün alolloonun ach tong ngeni Jiowa. Ren ach likitü fän sossot, sia tongeni awora pölüen än Setan tipimwääl. Iei popun, sisap fangetä! “Mi feiöch ir ekkewe mi likiitu lon sosot, pun mwirin ar pworacho repwe angei ewe mwarin manau, ewe mwaramwar Kot a fen pwonei ngeni ir ekkewe mi tongei i.”—Jem. 1:12.