Achocho le Alapalo Ach Angangen Afalafal
1 Aposel Paul a öüröüra Chon Kraist pwe repwe manaueni ewe manau mi apwapwai Kot me repwe “anapa seni loom.” (1 Tes. 4:1, Kapasen God) Met weween ena kapasen öüröür ngenikich? Weween pwe sipwe nengeni ifa ussun sipwe alapalo seni loom ach angang lon pekin ngün, ren ach achocho le ‘unusen apwönüetä ach angangen afalafal’ iteitan.—2 Tim. 4:5.
2 Popun Ach Sipwe Achocho: Sia achocho le alapalo seni loom ach angangen afalafal pokiten sia mochen aunusalo ach angang ngeni ewe Chon Förikich. Sia mochen feffeitä lon pekin ngün me kütta ifa ussun sipwe amürinnölo ach angangen afalafal. Ika sia kokkotöch me sia wenewenen mochen aunusalo ach angang ngeni Kot, kich mi tongeni tikeri ekkewe mettoch sia mochen föri fan iten Kot.—Kölf. 1:1, 2; Fil. 4:6; Ipru 10:24, 25.
3 A lamot sipwe ämääraatä ewe ekiekin fangafangöch me pennükü ekkewe mettoch ren ach sipwe alapalo ach angangen afalafal. Sia ämääraatä ena esin ekiek ren ach ekkekiekifichi ewe leenien äppirü Jises a isetiu. (Mt. 20:28) Jises a fokkun küna chengel seni an älisi aramas lon unusen an angang. (Fof. 20:35) Sia pwal tongeni äppirü Jises ren ach pwäratä tong ngeni aramas me ach mmolnetä iteitan le afalafal ngeni ekkewe ekkoch lupwen a tufich.—Ais. 6:8.
4 Wiisen Ekkewe Sam me In: Seni le kükkünür, ekkewe nau mi tongeni eäni ewe mochen angang ngeni ekkewe ekkoch me alapalo ar angangen afalafal. Ekkewe kükkün repwe küna an chon ewe famili achocho le alapalo ar angang ngeni Jiowa. A chüng letipen emön brother pwe epwe achocho seni leätin pokiten an fiffiti seman we chinnap le föri ekkewe angang lon mwichefel. Pokiten an seman we chinnap achocho me pwapwa, a kküü letipan an epwe pwal alapalo le älisi pwiich kewe. Iei, i emön ministerial servant.
5 A Wor Osupwang Ren Ekkewe Mwän: “Ika emön mwän a mochen wiseni ewe wis . . . a tipeni eü angang mi mürinnö.” (1 Tim. 3:1) Ekkeei kapas ir minen pesepes ngeni ekkewe brother ar repwe achocho pwe repwe eäni ekkewe lapalap epwe atufichiir le apwönüetä ekkoch wis lon än Jiowa we mwicheich. An emön epwe eäni ekkena wis ese longolong woon pwisin an emön tufich me lipwäköch. Emön brother mi mochen alapalo an angang ngeni Kot epwe kan akkomwa ewe Mwu lon manauan me epwe tinikken lon ewe angangen afalafal. (Mt. 6:33; 2 Tim. 4:5) A pwal lamot epwe isetiu eü leenien äppirü mi mürinnö ngeni ekkewe ekkoch.
6 Woon Unusen Fönüfan: Jiowa a emwittiri ewe angangen ioifengen. (Ais. 60:22) Mei fokkun atapwalapwal pwe ekkewe mi tapwelo mwirin Jises repwe unusen apwönüetä ar angangen afalafal. Me ren ewe 2006 repotun afalafal woon unusen fönüfan, a wor 248,327 ra papatais. Weween pwe a wor 680 minefö ra papatais iteiten rän! Amwo kich meinisin sipwe chök achocho le föri ekkewe mettoch epwe alapalo ach angangen afalafal.