Tapwelo Mwirin Ewe Leenien Äppirü Jises A Isetiu
1. Ifa ewe leenien äppirü Jises a isetiu?
1 Lupwen sia fiti ewe angangen föralo chon käeö, sia chechchemeni pwe ach leenien äppirü a tongeni älisi aramas mi nennengenikich. Jises a asukula aramas ren an kapas me an föfför. Aramas mi nennengeni i ra küna an tinikken, an tong ngeni aramas, an achocho le epinalo iten Seman, me an tipeppos le apwönüetä letipen Seman.—1 Pit. 2:21.
2. Ifa ussun ach leenien äppirü epwe älisi chienach lupwen sia kan mwinfengen le afalafal?
2 Atun Afalafal Imw me Imw: Ussun chök Jises, ach leenien äppirü a tongeni älisi chienach sia kan mwinfengen. Ekkewe minefö chon afalafal resaamwo kon lipwäköch ra tongeni ekieki ifa ussun ar repwe amürinnölo lapalapen pwisin ar angangen afalafal lupwen ra nennengenikich. Ika ra küna ach pwapwa me ach enletin mochen älisi ekkewe ekkoch, repwe pwal ina ussun atun ra fiti ewe angangen afalafal. Ika ra küna pwe sia tinikken le nöünöü wokisin, chuurisefälli aramas, me käeö ngeniir Paipel, epwe achüngü letiper ar repwe pwal ina ussun.
3. Ifa ussun ach leenien äppirü epwe älisi ewe chon käeö, me met repwe käeö senikich?
3 Lupwen Sia Käeö Paipel Ngeni Emön: Nöüch kewe chön käeö ra äkkäeüin nennengeni ach kewe föfför. Awewe chök, lupwen sia peseer pwe repwe ammolnatä ewe lesen, ren ar suuki ekkewe wokisin me erielo fan ekkewe kapas aüchea, ra tongeni küna ika kich pwisin sia pwal mmolnetä. (Rom 2:21) Ika sia apwönüetä iteiten ach fansoun käeö ngeniir, iwe, ir resap pwal mut ngeni och kokkot epwe atai ar fansoun käeö. Repwe pwal küna tipemecheresich le pennükü mettoch fän iten ach angangen afalafal me ach lükü mi pöchökkül. Sisap mäirü pwe ekkewe chon käeö, nöün ekkewe chon afalafal mi äppirüfichi Jises, ra pwal wiliti chon afalafal mi tinikken me lipwäköch.
4. Atun sia kan fiti mwich, ifa ussun ach leenien äppirü epwe älisi ekkewe ekkoch?
4 Ach Fiffiti Ekkewe Mwich: Chon ewe mwichefelin Kraist meinisin ra pwal asukula ekkewe ekkoch atun mwich ren ar kewe föfför. Chokkewe mi kerän fiffiti mwich ra küna älillis seni ewe leenien äppirü mi mürinnö ra kükküna lon ach mwich. Ra tongeni küna ewe tong lefilen pwiich kewe, ach ririfengen, me föütach me üfach mi pwäratä mosonoson. (Kölf. 133:1) Ra pwal tongeni küna ach tuppwöl le fiffiti mwich me ach ukkuwawu meefiach. Emön wasöla lupwen a fiti eü me lein ach kewe mwich, a küna emön nengngin a kan mwittir suuki pwisin nöün Paipel me fiti älleään. Pokiten ei föfför a amwökütü ewe wasöla an epwe tingor pwe emön epwe käeö ngeni Paipel.
5. Pwata sisap alamotongaüa ewe leenien äppirü sipwe isetiu?
5 Ewe Paipel a pesekich ach sipwe äppirü ekkewe föfför mürinnö seni chienach kewe. (Fil. 3:17; Ipru 13:7) Ina popun, sipwe chechchemeni pwe ach tapwelo mwirin ewe leenien äppirü Jises a isetiu epwe fokkun älisi ekkewe ekkoch. Ren ei popun, amwo sipwe lefäreni alon 1 Timoti 4:16: “Kopwe tumunufichi pwisin en, o om kena afalafal.”