Sipwe Anöünöü Fän November Ewe Awake! mi Kkolo Aüchean!
1 Chommong aramas ra tipemwaramwareiti aüchean ewe Paipel. Ika aramas ra wisen makkei, pwata sia erä pwe ina Kapasen Kot? Ikkefa ekkewe popun sia lükülük pwe epwe emmwenikich? Epwe wor lamoten ai awora fansoun le älleä me käeö ewe Paipel? Menni lein ekkewe Paipel upwe nöünöü? Ikkeei ekkoch ekkewe kapas eis ra pölü lon ewe Awake! minen fan November mi kkolo aüchean itelapen “Can You Trust the Bible?” (Ka Eäni Lükülük woon ewe Paipel?)
2 Sia fokkun mochen achocho le anöünöü ngeni meinisin lon ach territory ei Awake! mi kkolo aüchean. Ika mei tufich, sipwe fiti ewe angangen afalafal imw me imw lon meinisin ekkewe Ammol fan November. Äiti ngeni ei chassi ngeni märärum kewe, chon orum, chienom kewe chon angang, sense, chiechiom chon sukul, me ekkewe ka chuurisefäliir. Uwei ekkena chassi atun ka lo lon sitowa me säifetäl. Ekkewe elter repwe awattei ar chuumong ewe chassi pwe epwe naföch fän iten ewe mwichefel.
3 Poputääni Chon Käeö: Ika ka anöünöü ewe chassi, ka tongeni likiti och pworaus epwe ekkekiek woon ren om kopwe poputäni eü käeöön Paipel atun ka liwiniti. Ren chök awewe, ka tongeni apasa, “Pwal fän eü, ua mochen äiti ngonuk pölüen ei kapas eis seni ewe Paipel, ‘Ifa än Kot kokkot ngeni ewe fönüfan?’” Iwe liwiniti fän ewe puk Sile me äiti ngeni ewe aramas pekin taropwe 4-5. Mwirin, pwomweni ewe käeö ren om nöünöü ewe parakraf lon sopwun 1. Pwal eü sia tongeni apasa, “Fän eü, ua mochen sipwe pworaus ussun eü oesini lon ewe Paipel a fen pwöpwönütä iei.” Atun ka liwinsefäl, äiti ngeni ewe chon imw sopwun 11 parakraf 1-4. Are ka tongeni ereni ewe chon imw: “A mmen weires ngeni chommong ar repwe weweiti met ra älleäni seni ewe Paipel. Fän eü, ua mochen äiti ngonuk ifa ussun kopwe alapalo om weweiti noum Paipel.” Atun ka liwiniti, äiti ngeni ewe puk Sile, me poputäni eü käeö.
4 Ewe chök Paipel a masou ren ekkewe “taropwe mi fel,” mi tongeni ‘atipatchemakichelo usun ewe angangen amanau.’ (2 Tim. 3:15) Ina minne, sipwe unusen achocho le anöünöü ei Awake! mi sokkolo aüchean pwe epwe älisi aramas le ämääraatä ar lükülük woon ewe Paipel!