Mmolnöch, ina Kiien Sopwöchün ach Chuursefälli Aramas
1. Lemwun ekkewe aposel ifa ussun a chöüfetäl ewe angangen afalafal?
1 Jises a älisi nöün kewe chon käeö ar repwe ammolnatä pwe repwe sopwöch lon wiser we, wisen chon afalafala “ewe Pworaus Allim usun ewe mwün Kot.” (Mt. 4:23; 9:35) A fis ewe asukul lon Fönüen Israel. Iwe nge, mwen an a feitä läng, Jises a affata pwe ewe angangen afalafal epwe chöüfetäl pwe repwe “asoulängala chon ekewe mwü meinisin.”—Mt. 28:19, 20.
2. Met a kapachelong lon ach älleasochisi än Jises allük pwe sipwe föralo chon käeö?
2 A kapachelong ewe angangen chuurisefälli ekkewe mi pwapwaiti ewe kapas allim ussun Mwuun Kot me asukuler pwe repwe älleasochisi mettoch meinisin Kraist a allük ngenikich. Ren an epwe sopwöch ach chuursefäliir, a lamot sipwe mmolnöch.
3. Lupwen sia kerän chuuri emön, met kopwe föri pwe epwe amecheresi om liwiniti?
3 Akkota me Mwan: Ekkoch chon afalafal ra achocho le eäni eü kapas eis le sopwoloon ar pworaus fengen me akkota ewe fansoun repwe chuusefäl me pölüweni ewe kapas eis. Ra küna pwe ren ar nöünöü ewe puk Apasa ngeni ewe emön repwe chuuri, a mwittir emmweni an epwe käeö ewe Paipel.
4. Pwata sisap ammanga ach chuurisefälli ewe emön?
4 Ika sia anöünöü ngeni emön ewe puk minen fän ena maram sisap witiwit tori waren ewe minefö iwe, sipwap liwiniti. Nge epwe fen mürinnö sipwe apöchökküla an mochen käeö ren ach kapas woon ekkewe pworaus lon ewe puk a fen nöüni.
5. Lupwen sipwe chuurisefälli emön, pwata a lamot sipwe akkomw ekieki met sipwe achocho ngeni?
5 Akkomw Ekieki Met Kopwe Achocho ngeni: Mwen om kopwe liwiniti, akkomw nengeni met ka makketiu oua fen pworausfengen woon me met ka mochen achocho ngeni. Awewe chök, fos woon eü pworaus lon ewe puk ka fen anöünöü ngeni. Are ka pwal tongeni ngeni eü puk mi kapas ussun ewe itelap oua fen pworausfengen woon. Kopwe pölüweni ewe kapas eis ka fen likiti ngeni. Ika ka mochen menlapei eü wokisin lon Paipel mi pölüweni ewe kapas eis, kopwe älleani.
6. Met sipwe achocho ngeni atun sia chuurisefälli aramas?
6 Met Sipwe Apwönüetä: Pwüngün, sipwe achocho le poputääni eü mineföön käeöön Paipel. Emön pwiich a mochen käeö ngeni emön mwän a piin chuuri, nge ese mochen. Pwiich we a liwiniti fän ewe mineföön puk me erä, “Ikenäi aua pwapwa le pölüweni eü kapas eis seni Paipel.” Mwirin än ewe mwän uwawu meefian, pwiich we a älleani eü wokisin me pwal eü parakraf seni ewe puk sia nöünöü fän iten käeöön Paipel. Iwe, ra käeö iteitan.
7. Ifa ussun mmolnefich a fen älisuk om kopwe poputääni eü käeöön Paipel?
7 A fokkun aüchea ach awora fansoun le ammolnatä. Ach pwapwa epwe lapolo, me eli sipwe tongeni wisen älisi emön “mi fil” ngeni ewe alen manau.—Fof. 13:48.