Ka Tongeni Wiliti Sense!
1. Ifa ewe angang mi apwapwa a suuk ngeni emön chon afalafal?
1 Eü me lein ekkewe feiöch watte sia küna lon ewe angangen afalafal, ina ach asukula emön ussun ewe enlet. Sia pwapwa le küna nöüch chon käeö a feffeitä lon an atipeeüfengenni manauan ngeni pworausen ewe Mwu me älisi i le arap ngeni ewe Samol mi Lapalap. (Jem. 4:8) Emön me emön chon afalafal epwe achocho le asukula iö mi osupwang lon pekin ngün me siwili napanapen manauan, ekiekin me föfförün.—Mt. 28:19, 20.
2. Pwata ekkoch ra pireir ar repwe käeö ngeni aramas me met epwe tongeni älisiir le pwäkini ei mettoch?
2 Lükülük Woon Jiowa: Lon fansoun loom, nöün Kot kewe chon angang mi tuppwel ra meefi pwe ir mi lipwäkingaü ren ar repwe apwönüetä wiser. Lükülük woon Jiowa a atufichi Moses, Jeremaia me Amos me pwal ekkoch aramas mi tekison ar repwe pworaiti ar ekiek ussun lipwäkingaüer me föri ar angang mi lamot. (Eks. 4:10-12; Jer. 1:6, 7; Amos 7:14, 15) Ewe aposel Paul a “pwora” are lon ititin an kapas emön “a apworai.” Ifa ussun? Paul a pwäratä pwe ‘Kot a ngeni’ ewe pwora. (1 Tes. 2:2) Ewer, kich meinisin sipwe tongeni lükülük woon Jiowa pwe i chon awora älillis, tipatchem me pöchökkül fän iten ach sipwe asukula ekkewe chon käeö mi feffeitä.—Ais. 41:10; 1 Kor. 1:26, 27; 1 Pet. 4:11.
3, 4. Met a älisikich le asukula aramas Kapasen Kot?
3 Etiwa ewe Asukul: Ach Chon Asukul mi Lap, Jiowa Kot, a kan asukulakich ren an awora ewe kokkotun asukul mi fel pwe sipwe lipwäköch lon ewe wisen sense. (Ais. 54:13; 2 Tim. 3:16, 17) Etiwa ena asukul ren om achocho le alapalo om weweiti ewe Paipel me amürinnölo om tufichin äiti ngeni aramas ewe enlet lon Paipel. Ewe Sukulen Afalafal me ewe Service Meeting a äkkäeüin älisikich lon ei mettoch nge meinisin ekkewe mwich a pwal atufichikich le asukula aramas seni ewe Kapasen Kot.
4 Achocho le ämecheresi om asukula aramas pwal mwo ekkewe pworaus mi alolloon lon Paipel. Ewe Ministry School puk, pekin taropwe 227 a aweweei: “Mi lamot kopwe pwisin wewefichiti ewe pworaus mwen om kopwe älisi ekkewe ekkoch ar repwe weweiti.” Ach uwawu meefiach lon ekkewe mwich a älisikich le chechchemeni ekkewe pworaus mi lamot pwe sipwe tongeni äeä lon ach angangen afalafal. Ina minne, kopwe ammolnaöchü, iwe epwe wattelo om lükülük lon om tufichin asukula aramas.
5. Met sokkun älillis mi pwal suuk ngenikich lon ewe mwichefel pwe sipwe feffeitä lon ewe angangen sense?
5 Ren ach mwin lon ewe angangen afalafal sia älillisfengen lefilach. (Luk 10:1) Ika mi tufich, fiti ekkewe mi lipwäköch awewe chök, ekkewe pioneer, elter me ekkewe elter mi säifetäl lon ewe angangen käeöön Paipel. Kopwe nengeniöchü ifa ussun ra äeäfichi ekkewe kapas awewe mi mecheres me ekkewe minen älillis seni nöüch kewe puk ren ar asukula aramas ewe enlet. Tingorer repwe älisuk le wiliti emön sense mi lipwäköch. (SalF. 1:5; 27:17) Kopwe weweiti pwe meinisin ekkeei minen asukul a feito seni Jiowa.—2 Kor. 3:5.
6. Ifa ewe äkkäeüin mettoch mi lamot ren ach sipwe wiliti emön senseen ewe Kapasen Kot?
6 Lükülük woon Jiowa me küna feiöch seni an Jiowa asukulakich. Kopwe iotek fän iten om kopwe feffeitä. (Kölf. 25:4, 5) Ka pwal tongeni küna pwapwa ren om älisi emön le wiliti emön senseen ewe Kapasen Kot ussun chök en!