En mi Silei Om kewe Minen Kefil?
Ra chommongolo ekkewe pioing iei woon unusen fönüfan ra föri ekkewe sokkun reirei rese chüen äeä chcha. En mi silei me weweöchüiti ekkewe minen tümün lon pioing ese fiti chcha ka tongeni filatä? A lamot kopwe silei ekkeei minen kefil pwe kopwe tongeni filiöch woon ekkewe mettoch mi weneiti om reirei are ekkewe minen tümün ngonuk lon pioing. Kopwe katol ewe cassette No Blood-Medicine Meets the Challenge. (Ekkewe Tokter ra Ataweei Osupwangen Chokkewe Rese Mochen Angei IV Chcha). Iwe, mwirin fiti om iotek kopwe enniwili met ka käeö ren älillisin ekkewe kapas eis mi tettelitiu fan.—Chechchemeni: Sam me in repwe ekiekiöchü ika nöür kewe semirit repwe katol pokiten epwe fich än ekkewe tokter rei aramas.
(1) Ifa populapen än Chon Pwäratä Jiowa rese angei IV chcha? (2) Chon Pwäratä Jiowa ra kan etiwa met sokkun minen älillis lon pioing? (3) Ifa än ekkewe chon semwen pwüngün filatä? (4) Pwata emön a pwäratä mirit ika a filatä an epwe chök etiwa ekkewe minen älillis me lükün IV chcha? (5) Lupwen watte chcha a towu seni emön, ikkefa ekkewe ruu mettoch mi lamot ekkewe tokter repwe akkomw föri? (6) Ikkefa ekkewe rüänü allük ekkewe minen älillis me lükün IV chcha ra longolong woon? (7) Ifa ussun ekkewe tokter mi tongeni (a) ekisaalo ükükün ewe chcha epwe kusu seni emön, (b) tümünü ekkewe cell mi par, (c) älisi förün chcha lon inis, me (d) äeäsefälli ewe chcha a fen kusu seni emön? (8) Aweweei ekkeei minen älillis (a) hemodilution me (b) cell salvage. (9) Met a lamot kopwe silei ussun ekkewe minen älillis me lükün IV chcha? (10) Ekkewe tokter mi tongeni föri ekkewe sokkun reirei mi weires nge resap äeä chcha? (11) Met sokkun siwil mi öch mi fisitä iei lein ekkewe mwichen tokter?
Pokiten minne emön a käeö seni Paipel, iwe, mwelien letipan epwe pwisin filatä ika epwe etiwa ekkewe minen älillis a fich lon ei cassette. Ka fen filatä met sokkun älillis en me chon om famili oupwe etiwa? Ka fen amasoua nöüm DPA card? Nengeni The Watchtower, “Questions From Readers” (“Kapas Eis Seni Chon Ällea”) minen June 15, 2004, me October 15, 2000, mi unusen aweweeiöchü ei pworaus. Ren om kopwe filatä menni minen älillis lon pioing kopwe etiwa are kosap etiwa kopwe katol ewe Ach Angangen Afalafala ewe Mwu minen November 2006 pekin taropwe 3-6 itelapan, “Epwe Met Filiei Ussun Kinikisitiuen Ekkewe Kifetin Chcha me Ekkewe Minen Älillis lon Pioing Mi Äeä Chchai?” Lon ena, a wor ewe taropween sossot kopwe amasoua met ka pwisin filatä. Mwirin ka tongeni walong lon noum DPA card minne ka makkeei. A lamot pwe kopwe esile ngeni chon om famili rese fiti ach lükü me iö kewe ra mak lon nöüm we DPA card ussun filiom kewe.
[Pwóór lón pekin taropwe 3]
• Ka fen filatä ekkewe minen älillis lon pioing kopwe etiwa fän itom me noum kewe?
• Ka ukkuwei nöüm we DPA card fän iten osukosuk mi weiweitä?