Ach Angangen Afalafal A Akkapöchökkülakich
1. Ikkefa ekkewe feiöch sia angei seni ewe angangen afalafal?
1 Ach achocho lon ewe angangen afalafal a tongeni apöchökküla ach riri ngeni Jiowa me alapalo ach pwapwa. Enlet pwe ewe äkkäeüin popun sia fiti ewe angangen afalafal pwe sipwe apwapwaai Jiowa. Iwe nge, ren ach älleasochisi ewe allük pwe sipwe “afalafala ewe Kapasen Kot,” sia tongeni angei än Jiowa kewe sokkopaten feiöch. (2 Tim. 4:2; Ais. 48:17, 18) A ifa ussun ewe angangen afalafal a tongeni apöchökkülakich me ngenikich pwapwa?
2. Ifa ussun ewe angangen afalafal a apöchökkülakich?
2 Sia Küna Pöchökkül me Feiöch: Ewe angangen afalafal a älisi ekiekich le ännefota ekkewe feiöch seni än Kot we Mwu lap seni aürekin ach kewe osukosuk iei. (2 Kor. 4:18) Ach äwewe ngeni aramas äitien ewe Paipel a apöchökküla ach lükü woon än Jiowa kewe pwon me alapalo ach meefi kilisou ngeni ewe enlet. (Ais. 65:13, 14) Ach älisi ekkewe ekkoch le apöchökküla ar riri ngeni Jiowa, resap “peppeni fönüfan,” a pwal apposa letipach ach sipwe imulo seni fönüfan.—Jon 17:14, 16; Rom 12:2.
3. Ifa ussun ach angangen afalafal a älisikich le ämääraatä ekkewe napanap, än Chon Kraist?
3 Ach afalafal a älisikich le ämääraatä ekkewe napanap, än Chon Kraist. Äwewe chök, ren ach achocho le “manaueni sokun manau meinisin lein sokun aramas ese lifilifil,” a älisikich le ämääraatä ewe napanap tipetekison. (1 Kor. 9:19-23) Lupwen sia fos ngeni iir kewe “ra nom lon watteen osukosuk me weires ussun sip kana esap wor nöür chon mas,” a lapolo ach tonger. (Mt. 9:36) Sia pwal ämääraatä likiitü atun sia chüen achocho fän än aramas tenechepwäk me koput. A lapolo ach pwapwa lupwen sia äeä ach fansoun le älisi aramas.—Fof. 20:35.
4. A ifa meefiom ussun om angangen afalafal?
4 A mmen watte feiöchün ach sipwe tongeni fiti ei angangen afalafal mi mwareiti ewe chök Emön mi fichiiti ach sipwe fel ngeni! Ei angang a apöchökkülakich. Chommong feiöch a tori iir kewe ra unusen fiti ei angangen “pwärätä ewe Pworausen Manau” ngeni aramas.—Fof. 20:24.