Ka fen Mmolnetä fän iten än Jiowa we Kametip?
1. Met sokkun angangen ammolnatä fän iten eü kametip?
1 A mmen watte angangen ammolnatä fän iten eü kametip. Sia kamö chommong möngö, sia kukku an epwe fokkun annö, mwirin sia föriöchüelong lon eü leenian mi mürinnö. Epwe lamot kokkotöch lon ei sokkun angang. Pwal och, epwe pwal mmolnetä leenien ewe kametip. Ekkewe mi ketiü repwe pwal mmolnetä, äkkäeüin ekkewe ra feito seni fönü towau. Ewer, a mmen watte ewe angang nge a fokkun apwapwa ren ach möngöfengen me chiechiach me ach kewe famili, ewe möngö mi annö. Iei, Chon Pwäratä Jiowa woon unusen fönüfan ra mwötöres le witiwiti ewe kametip me ren Jiowa, ekkewe ränin ar repwe mwichfengen ese pwal lifilifil ika mi chowatte are chökükkün chon fiti. Ekiselo chök epwele fis ar Mwichelap lon Summer itelapan “Oupwe Mammasa!” A fen watte ewe angang ra föri ar repwe mmolnetä meinisin kapachelong ewe prokram. Kich meinisin sia fen ketiü. Amwo, emön me emön leich epwe mmolnöch an epwe fiti me küna feiöch seni.—SalF. 21:5.
2. Met kopwe föri pwe kopwe tongeni fiti unusen ewe ränin kametip me ren Jiowa?
2 Unusen Küna ewe Feiöch: Ka fen akkota pwe kopwe fiti unusen eü me eü kinikinin ewe kametip me ren Jiowa? Ika mi tufich, kopwe fos ngeni nöüm we pos pwe kopwe fiti meinisin ränin ewe mwichelap, kapachelong ewe äeüin rän. Ka fen akkota waom me leeniom kopwe nom ie fansoun ewe mwichelap? Ekkewe elter repwe ppi ika ra fen ataweei osupwangen ekkewe chinnap me ekkewe mi apwangapwang me pwal ekkewe ekkoch mi osupwang.—Jer. 23:4; Kal. 6:10.
3. Pwata sisap fiti eü Mwichelapen Aramas Seni Sokkopaten Fönü ika sisap ketiü?
3 Lon ekkoch leeni, repwe pwapwaiti ewe Mwichelapen Aramas Seni Sokkopaten Fönü. Kopwe chechchemeni pwe ekkoch chök mwichefel me pwiich kewe seni fönü towau ra ketiü lon ekkeei mwichelap. Ewe branch ofes a fen sileöchü fitemön repwe ketiü alongolong woon leenien mommot me pwal leenien onnut lon hotel. Iwe, ika ekkewe chon afalafal ra fen fiti eü Mwichelapen Aramas Seni Sokkopaten Fönü nge rese ketiü, eli epwe wor osukosuk ren chommongun aramas.
4. Ikkefa ekkewe kapasen ächem epwe älisük le mmolnetä ngeni poputään ewe prokram iteiten rän?
4 Kopwe mmolnetä le warekkäi iteiten rän me kütta leeniom mwen ewe prokram epwe poputä. Katol nöüm we prokram pwe letipom epwe mmolnetä ngeni ekkewe afalafal repwe katowu fitu minich me mwen an epwe poputä. (Esra 7:10) Ewe chon emmweni ewe prokram epwe apioni poputään ewe nikättik kopwe pwapwaiti le aüseling ngeni, mwirin fiti ewe köl me iotek.
5. Ifa ussun ach famili epwe unusen küna feiöch seni ewe prokram?
5 Ika meinisin chon ewe famili repwe motfengen fansoun ewe mwichelap, sam me in repwe tongeni tümünü nöür kewe ar repwe wesewesen aüseling ngeni ewe afalafal. (Tut. 31:12) Eü pesepes ngeni meinisin, ika ewe chon afalafal a älleani och wokisin, meinisin repwe pwal fiti le älleani lon pwisin nöüch Paipel. Kopwe makkeei aüchean ekkewe afalafal pwe epwe älisi om aüselingöch me chechchemeni ekkewe menlapen pworaus. Tümünü pwe kosap fos ngeni ekkewe ekkoch atun ewe mwich are ütä seni leeniom nge esor popun. Ika mei wor nöüm cell fon, kosap onei pwe ete aosukosukok me pwal ekkewe ekkoch atun ewe prokram. Pwata ouse kapasfengen me ekkewe ekkoch ussun met oua aücheani lon ewe prokram ssären eü me eü ekkewe ränin mwich?
6. Ifa ussun sipwe ammolnatä üfach kewe sipwe üföüf lon ewe mwichelap?
6 Üfach: Sipwe ekieki pwe Jiowa a fen allükü ngeni ekkewe chon Israel repwe föri och sokkun fout lesopwun üfer me pachetä efoch saan mi araw woon eü me eü ekkewe affout. (Num. 15:37-41) Iei ewe pisekin ännet pwe iir mi aüchea me imulo fän iten ar repwe fel ngeni Jiowa. Pwal ussun chök ikenäi, üfach mi üföüföch me torotoröch sia üfeni lon ewe mwichelap eü esissil pwe sia imulo seni ei fönüfan mi ngaü. Pwal mwo lupwen sia möngö lon kafie ina pwal eü pisekin pwäratä mi mürinnö ngeni aramas. Ina minne, sipwe fokkun ekieki met sokkun üfach mwen ewe mwichelap epwe fis.
7. Ifa ussun sipwe tongeni afalafal ngeni ekkoch lupwen sia fiti ewe mwichelap?
7 Afalafal Ngeni Ekkoch: Neman sipwe tongeni afalafal ngeni aramas lupwen sia fiti ewe mwichelap. Esap pwal watte met sipwe ekiekin ammolnatä. Emön brother me pwülüwan we ra feilo lon eü kafie mwirin ewe prokram, a chök itini nöün we taropween esissillen mwichelap me eisini ewe chon angang: “Ka fen küna chommong aramas mi nöünöü ei sokkun taropween esissil?” Ewe chon angang a apasa pwe a fen küna ren chommong aramas me a ekieki pwata ra kan nöünöü. Iwe, ra poputä le pworausfengen, mwirin ewe brother a etiwa ewe chon angang epwe fiti ewe mwichelap.
8. Ifa ussun sipwe pwäratä ach kilisou ngeni ewe Chon Etiwakich, Jiowa?
8 Inaamwo ekkewe brother ra wisen afalafal lon ewe mwichelap nge Jiowa, Semach lon läng, I wesewesen ewe Chon Awora ewe möngöön ngün. Ei mwichelap a fiffis iteiten ier a ussun chök eü kametip. (Ais. 65:13, 14) Sipwe pwäratä ach kilisou ngeni ewe Chon Etiwakich ren ach fiti meinisin ränin ewe mwichelap me pwapwaiti eü me eü afalafal mi kawor. Ka fen akkota meinisin ewe kokkot fän iten om kopwe fiti ewe mwichelap?