Ach Angangen Afalafal ina Pwäratään ach Tong Ngeni Kot
1. Än Jises tong ngeni Kot a amwökütü le föri met?
1 Tong a amwökütü Jises le apwönüetä wisan. Meinisin kinikinin an angangen afalafal a pwäratä lükücharen an tong ngeni Jiowa. Jises a erä, “Nge chon fanüfan repwe fokun silei pwe ngang üa echeni Semei. Ina popun ngang üa föri meinisin mine i a allük ngeniei.” (Jon 14:31) Kich chon tapwelo mwirin Jises, iei pwal wisach mi aüchea ach sipwe pwäratä alolloolun ach tong ngeni Kot lon ach angangen afalafal.—Mt. 22:37; Ef. 5:1, 2.
2. Ifa ussun ach tong ngeni Jiowa a riri ngeni ach angangen afalafal?
2 “Itom Epwe Pin”: Lupwen sia tinikken le afalafal iteitan ngeni aramas ese lifilifil ussun Jiowa me kokkotun mwuun we, sia pwäratä ach tong me ussun sia pwal älisatä piniloon itan we. (Kölf. 83:18; Is. 36:23; Mt. 6:9) Ussun chök än Jises angangen afalafal, ach angang a kan pwäratä pwe sia wesewesen mochen küna piniloon iten Jiowa we me pwönüetään letipan.—Mt. 26:39.
3. Ifa ussun ach tong ngeni Jiowa epwe älisikich le pwäkini ekkewe minen eppet?
3 Tong a Amwökütükich le Pwäkini Ekkewe Minen Eppet: Tong ngeni Jiowa a tongeni pworaiti sossot meinisin. (1 Kor. 13:4, 7) Jises a küna chommong osukosuk lon manauan mi tongeni eppeti i le apwönüetä wisan we. Iwe nge, lupwen a küna minen eppet lon manauan, watteen an tong me mochen föri letipen Jiowa a atufichi an epwe akkufu sokkun osukosuk. (Mark 3:21; 1 Pit. 2:18-23) Pwal ina ussun kich, sia pwal küna chommong minen eppet lon manauach, nge ach tong ngeni Kot epwe älisikich le pwäkiniir. Ren ach äppirü än Jises we leenien äppirü, sipwe meefi lükülüköch pwe esap wor och mettoch epwe eppetikich le apwönüetä wisach. Inaamwo ika chon ach famili ra ü ngenikich, apwangapwangen inisich, ierin chinnap are tenechepwäkün aramasen ikenäi repwe aosukosukakich, nge resap aükalo ach pwäratä ach tongei Jiowa le sopwelo ach angangöch lon ewe angangen afalafal.
4. Ifa ewe mettoch mi aüchea ach tong ngeni Kot epwe atufichikich le föri?
4 Manamanen ewe tong ina eü feiöch seni Kot, mi atufichikich le pwäratä unusen ach tong ngeni Jiowa lon ewe angangen afalafal. (1 Kor. 13:13) Lon ekkeei rän sia akkarap ngeni warotoon ewe fansoun iten Jiowa we epwe pinilo, amwo ach “tong epwe fakkun lapelo seni lom.” Fil. 1:9,TF; Mt. 22:36-38.