“Ämi Saram Epwe Tittin”
1. Ifa wisach we mi aüchea?
1 Seni lesossorusich tori lukenipwin, ewe saram mi lingöch a elingaalo Jiowa. Nge Jises a etiwa nöün kewe chon käeö ar repwe eäni pwal och sokkun saram, weween “ewe saramen manau.” (Jon 8:12) Ar eäni ena saram lon kapas äwewe, ina eü liffang mi kkolo aüchean, nge a kapachelong wis mi chou. Jises a äiti ngeniir: “Iei usun ämi saram epwe tittin mwen ekewe aramas,” pwe epwe efeiöchüür. (Mt. 5:16) Ena saram epwe esilefeil lon ei fansoun rochopwak, me a fen lallapolo lamotan! Nge ifa usun sipwe usun Kraist le ettina ach we saram?
2. Ifa usun Jises a pwäri lamoten esilefeilin saramen ewe enlet?
2 Ren Ach Afalafal: Jises a äeä an fansoun, pöchökkül, me tufichin le ettina saramen ewe enlet ngeni aramas lon imwer, ikewe aramas ra soun nom ie, woon ekkewe chuuk, me ese lifilifil ia ra nom ie. A esilla pwe epwe nomofoch aüchean an akkawora saramen ewe enlet. (Jon 12:46) Jises a ammolnatä nöün kewe chon käeö pwe repwe “saramen fanüfan” le älisi chommong aramas. (Mt. 5:14) Ra ettina ar saram ren ar föfför mürinnö ngeni chon orur kewe me esilefeili ewe enlet.
3. Ifa usun sipwe pwäraalo ach enletin aücheani saramen ewe enlet?
3 Nöün Kot kewe aramas ra ngeni leten ar föri wiser le “manaueni eu manau mi nom fän ewe saram,” me ra afalafal ikewe repwe künökün aramas me ie. (Ef. 5:8) Ika ka älleani ewe Paipel are nöüch kewe puk lon om leenien angang are lon om sukul, iwe, epwe suuk ngonuk eü alen om kopwe tongeni afalafal. Emön säräfö sister a föri ena, iwe, a poputääni eü käeöön Paipel me anöünöü 12 puk ngeni chienan kewe chon sukul!
4. Pwata ach föfför mürinnö a kapachelong lon ach ‘ettina ach saram’?
4 Föfför Mürinnö: Föfförüch iteiten rän a pwal kapachelong lon ach ettina ewe saram. (Ef. 5:9) Aramas ra küna föfföröchün chon Kraist mi pwäpwälo lon ach kewe leenien angang, sukul, me ikewe aramas ra soun nom ie, iwe, epwe suuki ewe alen pworaus usun ewe enlet seni Paipel. (1 Pit. 2:12) Äwewe chök, emön sense a mäirü ren föfföröchün emön kükkün ät nimu ierin. Iwe, a köri inen me semen ena ät, me a ereniir, “Use mwo kükküna emön semirit mi wesewesen lükü lamoten ach sipwe föri minne mi pwüng!” Pwüngün, ach angangen afalafal me ach föfför mürinnö ra luki aramas ngeni “ewe saramen manau” me pwal mwareiti ach Kot.