Kopwe “Eäni Kirekiröch”
1. Met aramasen ikenäi ra osupwangan?
1 Ese fis me mwan lon uruwoon aramas pwe chommong ra osupwangen ar repwe küna kirekiröch. Ngawoloon ei otot a efisi lapoloon än aramas meefi lolilen, letipengaw, me äpilükülüküngaw. Fite million ra osupwangen älillis, nge kich Chon Kraist sia tongeni pwäraalo enletin ach kkini chon oruch kewe. (Mt. 22:39; Kal. 6:10) Ifa usun sipwe tongeni pwäraalo ach kkiniir?
2. Ifa ewe alen ach sipwe pwäratä kirekiröch?
2 Eü Angang mi Pwäratä Kirekiröch: Jiowa Kot i chök ewe populapen ouruur mi enlet me nomofoch. (2 Kor. 1:3, 4) A pesekich sipwe äppirü i ren ach “eäni kirekiröch,” me a ewisa ngenikich le uwei ngeni aramas ewe kapas allimen an we Mwu. (1 Pit. 3:8) Ach achocho le fiti ena angang ina alen ach sipwe ouruuru ekkewe mi “luketatakis,” pun än Kot we Mwu ina chök ewe äpilükülük mi enlet fän iten aramas mi riäfföü. (Ais. 61:1) Pokiten an Jiowa tongei nöün kewe aramas, arapakkan chök epwele amoielo minne mi ngaw me föratä eü mineföön otot mi pwüng.—2 Pit. 3:13.
3. Ifa usun sipwe eäni än Jises ekiek usun aramas?
3 Eäni Ekiekin Jises Usun Aramas: Pwal mwo nge atun Jises a afalafal ngeni mwichemmongun aramas, a silei pwe emön me emön a wor an osupwang lon pekin lükü. Ra usun chök siip ese wor chon maser le emmweniir. A chüng letipen Jises ren met a küna, iwe, a asukuler fän mosonottam. (Mark 6:34) Ach eäni än Jises ekiek usun aramas epwe amwökütükich le pwäri enletin ach kirekiröch ngeni emön me emön. Epwe pwäpwälo ren ngingiin ach kapas me wowoon woon mesach. Sipwe akkomwa ewe angangen afalafal, me ach kapas epwe fich ngeni met emön me emön a eäni aürek lon manauan.—1 Kor. 9:19-23.
4. Pwata sipwe kirekiröch?
4 Chommong aramas seni sokkopaten mwu ra pwapwaiti ewe kapas allim me än ekkewe chon afalafal pwäratä ar chchüngüür. Atun sia pwäppwäraalo kirekiröch, sipwe elingaalo me apwapwaai Jiowa, ach we Kot mi kirekiröch.—Kol. 3:12.