Ka Sussukul Me Ren Jiowa?
1. Met meefien Jiowa usun asukul?
1 Jiowa, nöüch we “Soukait,” a mochen ach sipwe käkkäeö. (Ais. 30:20) A poputä le asukul mwirin an föratä nöün we mwänichi. (Jon 8:28) Mwirin än Atam ü ngeni, Jiowa ese ükütiw le asukula aramas rese unusöch.—Ais. 48:17, 18; 2 Tim. 3:14, 15.
2. Met sokkun asukul a fiffis lon ei fansoun?
2 Lon ei fansoun, Jiowa a ekkemmweni eü angangen asukul mi lapalap seni meinisin lon uruwo. A pwönütä met Aisea a fen oesini, pwe fite million aramas seni woon unusen fönüfan ra feito ngeni ewe “chuk ia a nom ie imwenfelin” Jiowa we. (Ais. 2:2) Pwata sipwe feilo ngeni imwen Jiowa we? Pwe sipwe angei käit seni Jiowa me käeö usun an kewe al! (Ais. 2:3) Lon ewe 2010 service ier, Chon Pwäratä Jiowa ra fen nöüni 1.6 billion awa le afalafal ngeni aramas ewe enlet seni Paipel. Pwal och, iteiten wiik a kawor asukul lon pekin lükü lon lap seni 105,000 mwichefel woon unusen fönüfan, me a kawor sokkopaten puk seni ewe mwichen chon angang mi alükülük me tipachem lon lap seni 500 fosun fönüfan.
3. Ifa usun ka pwisin küna feiöch seni ewe käit ka akkangei seni Jiowa?
3 Unusen Küna Feiöch Seni: A ifa me feiöchüch seni ach angei käit mi mürinnö seni Jiowa! Sia käeö pwe mi wor iten Kot me a chchüngükich. (Kölf. 83:18; 1 Pit. 5:6, 7) Ikkeei ekkoch kapas eis mi lamot ra fen pölü: Pwata aramas ra kan riäfföw me mämmälo? Ifa usun upwe küna pwapwa mi enlet? Met popun sia manau? Jiowa a pwal awora emmwen mi lamot pwe sipwe ‘feiöch o feffeitä lon meinisin minne sipwe föri.’—Jos. 1:8.
4. Ikkefa ekkewe asukul mi kawor fän iten nöün Kot kewe chon angang, me pwata sipwe sussukul me ren Jiowa ükükün ach tufich?
4 Jiowa a pwal awora sokkopaten sukul pwe epwe älisi chommong nöün kewe chon angang le alapaalo ar angang ngeni. Lon pekin taropwe 4-6, a tettelitiw ekkoch sokkun sukul fän iten chokkewe mi fich ngeniir. Inaamwo ika eli nonnomuch a eppeti ach fiti ekkena sukul, nge sia unusen alamota ekkewe sukul mi kawor fän itach? Sia peppesei ekkewe säräfö ar repwe achocho ar repwe fiti ekkewe sukul mi kawor seni Jiowa, nge resap fitaalo etipetipaen nöür kewe sense me ekkewe ekkoch le chechchei än fönüfan sukul tekia? Ach käkkäeö seni Jiowa ükükün ach tufich epwe atoto rech pwapwa iei me pwal lon mwachkaan.—Kölf. 119:105; Jon 17:3.
Ekkoch Sukul mi Kawor Seni Än Jiowa Mwicheich
Sukulen Käeö Ällea me Mak
• Popun: A äiti aramas ällea me mak pwe repwe tongeni pwisin älleani me käeö Paipel me asukula aramas usun ewe enlet.
• Ükükün Ttaman: A alongolong woon minne a lamot ngeni ekkewe chon sukul.
• Ia Epwe Fis Ie: Lon Än Chon Pwäratä Jiowa leenien mwich.
• Iö A Fich Ngeni: Ekkewe chon afalafal meinisin me pwal chokkewe mi mochen käeö Paipel.
• Ifa Usun Emön Epwe Tongeni Fiti: Ika ekkewe elter ra küna pwe mi lamot ena sokkun sukul, iwe, repwe akkota pwe epwe fis me etiwa meinisin mi tongeni küna älillis seni.
Sukulen Angangen Chon Kraist
• Popun: A äkkäiti ekkewe chon afalafal pwe repwe lipwäköch le afalafala ewe kapas allim me asukula aramas.
• Ükükün Ttaman: Ese wor kaükün.
• Ia Epwe Fis Ie: Lon ewe leenien mwich.
• Iö Epwe Tongeni Fiti: Meinisin ekkewe chon afalafal me pwal chokkewe mi fiffiti mwökütükütün ewe mwichefel me tipeeü ngeni ekkewe afalafal seni Paipel. Ra pwal etipeeü manauer ngeni än Paipel kewe kapasen emmwen.
• Ifa Usun Emön Epwe Tongeni Fiti: Kapas ngeni ewe elter mi wisen tümünü ewe sukul.
Sukulen Fosun Ekis
• Popun: Epwe asukula chon afalafal ar repwe tongeni afalafala ewe kapas allim lon eü fosun ekis.
• Ükükün Ttaman: Rüänü are nimu maram. Lap ngeni ekkewe class ra kan fiffis lesossorun Ammol ükükün eü ika ruu awa.
• Ia Epwe Fis Ie: Lon eü leenien mwich.
• Iö Epwe Tongeni Fiti: Ekkewe chon afalafal mi üöch me ra mochen afalafal lon fosun ekis.
• Ifa Usun Emön Epwe Tongeni Fiti: Ewe keangen ofesilap a wisen akkota ekkewe class ika ra küna pwe a lamot.
Angangen Fförün Leenien Mwich
• Popun: Kaütään are fförsefälin leenien mwich. Esap eü sukul ei nge fän ei kokkot, chon älillis ra käeö sokkun angang pwe repwe tongeni älisatä angangen kaü.
• Ükükün Ttaman: A alongolong woon nonnomun ekkewe chon älillis.
• Ia Epwe Fis Ie: Ekkewe leeni mi nom fän tümünüen ewe Regional Building Committee. Are, repwe etiwa ekkoch ar repwe älisi pwiich kewe lon ekkewe fönü towau ikewe a fis watteen kata are mölümöl ie.
• Iö kewe Ra Fich ngeni: Pwiich kewe mi papatais me ekkewe elter ra tipeeü pwe chokkana ra fich ngeni. Mi suuk ngeni chokkewe mi angöch lon angangen kaü me pwal chokkewe rese kon lien silei.
• Ifa Usun Emön Epwe Tongeni Fiti: Amasoua ewe taropween Kingdom Hall Volunteer Worker Questionnaire (S-82) a wor ren ekkewe elter.
Sukulen Pioneer
• Popun: A älisi ekkewe pioneer ar repwe ‘unusen apwönüetä wiser usun nöün Kot chon angang.’—2 Tim. 4:5.
• Ükükün Ttaman: Ruu wiik.
• Ia Epwe Fis Ie: Ewe keangen ofesilap epwe filatä, nge lap ngeni a kan fis lon ewe leenien mwich.
• Iö kewe Ra Fich ngeni: Chokkewe ra fen pioneer ren ükükün eü ier.
• Ifa Usun Emön Epwe Fiti: Ewe elter mi wisen chuchchuuri ekkewe mwichefel epwe esilei ngeni ekkewe pioneer pwe repwe tufichin fiti ena sukul.
Sukul Fän Iten Ekkewe Chon Angang Lon Bethel
• Popun: Ei sukul a kawor pwe epwe älisi ekkewe mineföön chon angang lon Bethel pwe repwe sopwöch.
• Ükükün Ttaman: Eü awa iteiten wiik lon ükükün engol me wonu wiik.
• Ia Epwe Fis Ie: Bethel.
• Iö Kewe Ra Fich Ngeni: Epwe emön chon ewe familien Bethel are emön volunteer mi angangattam ren ükükün eü ier are lap seni.
• Ifa Usun Emön Epwe Fiti: Chon ewe familien Bethel repwe tufichin fiti.
Sukulen Elter me Ministerial Servant
• Popun: A älisi ekkewe elter me ministerial servant pwe repwe tümünü wiser kewe lon än Jiowa we mwicheich. (Fof. 20:28) Ei sukul a kan fis mwirin fitu ier fän otaen ewe Mwichen Sou Pwüngüpwüng.
• Ükükün Ttaman: Lon ekkewe ier mi kkanoto, ekkewe elter ra sukul ükükün eü esopw rän me ekkewe ministerial servant, eü rän.
• Ia Epwe Fis Ie: Lap ngeni a kan fis lon ach kewe leenien mwich are leenien mwichelap.
• Iö kewe Ra Fich ngeni: Ekkewe elter me ministerial servant.
• Ifa Usun Emön Epwe Fiti: Ewe circuit overseer epwe wisen filatä ekkewe elter me ministerial servant mi fich ngeniir.
Sukul fän iten Ekkewe Eltera
• Popun: A älisi ekkewe elter le tümünü wiser kewe lon mwichefel.
• Ükükün Ttaman: Nimu rän.
• Ia Epwe Fis Ie: Ewe keangen ofesilap epwe wisen filatä, nge lap ngeni a kan fis lon ach kewe leenien mwich are leenien mwichelap.
• Iö kewe Ra Fich ngeni: Ekkewe elter.
• Ifa Usun Emön Epwe Fiti: Ra kefil me ren ewe keangen ofesilap.
Sukul fän iten ekkewe Elter me Pwülüwer mi Chuchchuuri ekkewe Mwichefelb
• Popun: A atufichi ekkewe circuit me district overseer ar repwe lipwäköch le älisi ekkewe mwichefel, “angang weires lon ar afalafal me asukul,” me mammasa chokkewe mi nom fän tümünüer.—1 Tim. 5:17; 1 Pit. 5:2, 3.
• Ükükün Ttaman: Ruu maram.
• Ia Epwe Fis Ie: Ewe keangen ofesilap epwe wisen filatä.
• Iö kewe Ra Fich ngeni: Ekkewe circuit overseer ika district overseer.
• Ifa Usun Emön Epwe Fiti: Ewe keangen ofesilap epwe wisen filatä ekkewe overseer me pwülüwer mi chuchchuuri ekkewe mwichefel repwe fiti ena sukul.
Sukulen Paipel fän iten Elter me Ministerial Servant mi Lipichc
• Popun: Epwe älisi ekkewe elter me ministerial servant iir mi nipich pwe repwe wiseni pwal ekkoch wis. Lap ngeni ekkena mi sochungio seni ei sukul ra titiilo ngeni ekkoch leeni lon pwisin fönüer mi osupwangen älillis ie. Ika ekkoch leir ra esile ngeni ewe keangen ofesilap pwe ra tongeni mwöküt ngeni pwal eü fönü, eli ewe keangen ofesilap epwe tiiniirelo.
• Ükükün Ttaman: Ruu maram.
• Ia Epwe Fis Ie: Ewe keangen ofesilap a kan wisen filatä, nge lap ngeni ra kan fis lon ekkewe leenien mwichelap are lon eü leenien mwich.
• Iö kewe Ra Fich ngeni: Ekkewe elter me ministerial servant mi nipich me pöchökkül, ieriir epwe seni 23 ngeni 62, iir mi mochen älisi pwiich kewe me angangen ewe Mwu ia a osupwangen älillis ie. (Mark 10:29, 30) Ra fen wiseni wiser lon mwichefel esap kis seni ruu ier, nge rese ükütiw mwo fän eü.
• Ifa Usun Emön Epwe Tongeni Fiti: Ika epwe fis ei sukul lon leeniom, epwe kawor eü mwich fän iten chokkewe mi mochen fiti ena sukul atun ewe ruu ränin mwichelap. Lon ena mwich, epwe katowu pwal ekkoch pworaus fän iten ena sukul.
Sukulen Paipel fän iten Chon Kraist mi Pwüpwülüd
• Popun: A kawor ei sokkun käit ngeni ekkewe mi pwüpwülü pwe repwe alapaalo ar angang fän iten Jiowa me än we mwicheich. Lap ngeni ekkewe mi sochungio repwe wisen afalafal lon pwisin fönüer. Ekkoch repwe tongeni titiilo ngeni pwal eü fönü ika ra esile ngeni ewe keangen ofesilap pwe ra tongeni mwöküt.
• Ükükün Ttaman: Ruu maram.
• Ia Epwe Fis Ie: Ekkewe class akkomw repwe fis lon ewe Watchtower Educational Center lon Patterson, New York, U.S.A. Mwirin, ena sukul epwe fis ikewe ie ewe keangen ofesilap a filatä, nge lap ngeni lon leenien mwichelap are eü leenien mwich.
• Iö kewe Ra Fich ngeni: Ekkewe pwüpwülü mi pöchökkül, ieriir epwe seni 25 ngeni 50, nge nonnomur a atufichiir ar repwe älillis ikewe mi osupwangen chon afalafal ie, me ra pwal eäni ewe ekiek: “Ngang üa mochen, kopwe tiniei.” (Ais. 6:8) Pwal eü, repwe fen pwüpwülü ruu ier me fiti ewe angangen pioneer ese kis seni ruu ier nge rese mwo ükütiw fän eü.
• Ifa Usun Emön Epwe Tongeni Fiti: Ika ei sukul epwe suuk ngeni chon afalafal fän tümünüen ämi keangen ofesilap, epwe fis eü mwich atun ewe eü ränin mwichelap. Ekkoch pworaus fän iten ei sukul epwe katowu lon ena mwich.
Sukul Fän Iten Ekkewe Repwe Misineri
• Popun: Käitin ekkewe pioneer pwe repwe wiliti misineri.
• Ükükün Ttaman: Nimu maram.
• Ia Epwe Fis Ie: Watchtower Educational Center, Patterson, New York, U.S.A.
• Iö kewe Ra Fich ngeni: Ekkewe mi pwüpwülü mi fen papatais ülüngät ier, ieriir epwe seni 21 ngeni 38 atun ra amasoua nöür äechöön application. Ra silei fosun Merika, ar pwüpwülü esap kis seni ruu ier, me ra fen fiti ewe angang pioneer ese kis seni ruu ier nge rese mwo ükütiw fän eü. Repwe pöchökkül lon pekin inis. Chokkeei ra pwal tongeni apply ngeni ewe sukulen Gilead ika mi fich ngeniir: ekkewe mi pioneer lon eü fönü esap wesetään fönüer, (kapachelong ekkewe misineri), ekkewe elter mi chuchchuuri ekkewe mwichefel, chon Bethel, me chon sochungio seni Ministerial Training School, ewe Sukulen Paipel fän iten Elter me Ministerial Servant mi Lipich, me ewe Sukulen Paipel fän iten Chon Kraist mi Pwüpwülü.
• Ifa Usun Emön Epwe Tongeni Fiti: Lon ekkoch keangen ofesilap mi kefilitä, a wor eü mwich fän iten chokkewe mi mochen fiti ena sukul atun a kan fis ewe mwichelap fän summer. Pwal ekkoch pworaus repwe katowu atun ena mwich. Ika ese wor mwich mi fis lon leeniom fän iten ei sukul nge en mi mochen fiti, kopwe tongeni mak ngeni ewe keangen ofesilap.
Sukul fän iten chon ewe Branch Committee me Pwülüwer Kewe
• Popun: A älisi ekkewe mi wisen akkota angangen lon ekkewe keangen ofesilap (branch committee) ar repwe wisen tümünü ekkewe angang mi fiffis lon ekkewe imwen Bethel, ekkewe mwichefel, me ekkewe kümiin mwichefel (circuit me district) mi nom fän emmwenier. Ra pwal tümünü ewe angangen chiyakü, peres, me tiinaalo ekkewe puk me sokkopaten angangen kinikinin ewe keangen ofesilap.—Luk 12:48.
• Ükükün Ttaman: Ruu maram.
• Ia Epwe Fis Ie: Watchtower Educational Center, Patterson, New York, U.S.A.
• Iö kewe Ra Fich ngeni: Ekkewe chök chon akkota angangen ekkewe keangen ofesilap.
• Ifa Usun Emön Epwe Tongeni Fiti: Chon ewe Mwichen Sou Pwüngüpwüng repwe wisen etiwa.
[Pwóróus fan]
a Ei esin sukul a fis lon chök ekkoch fönü.
b Ei esin sukul a fis lon chök ekkoch fönü.
c Ei esin sukul a fis lon chök ekkoch fönü.
d Ei esin sukul a fis lon chök ekkoch fönü.