Álisi Chókkewe Resaamwo Tongeni Káé ewe Puk Paipel A Apasa
1. Itá meinisin repwe sani ewe puk Paipel A Apasa me lepoputáán? Áweweei.
1 Ren án emén epwe wiliti chón fel ngeni Jiowa, a lamot an epwe káé met ewe Paipel a apasa. Iwe nge, ekkóch ra fiti ekkewe lamalam rese lúkú Kraist me rese lúkú pwe Paipel ina án Kot Kapas. Ekkóch rese fókkun lúkú pwe mi wor emén Kot me rese súféliti ewe Paipel. Ikkefa ekkewe puk mi álilliséch ngeni chókkewe rese mochen etiwa ewe puk Paipel A Apasa me lepoputáán? Ekkeei kapasen emmwen fan, ra lóngólóng wóón pwóróusen ekkewe chón afalafal lón órun 20 sókkópaten fénú.
2. Ika emén a erenikich pwe ese lúkú Kot, iwe met sipwe féri me pwata?
2 Chókkewe Rese Lúkú Kot: Ika emén a apasa pwe ese lúkú Kot, iwe a múrinné ach sipwe silei ewe popun. Itá seni an lúkú evolution are manaw a pwisin fisitá? Are pokiten ekkewe mettóch ese pwúng ra fiffis are pokiten likótuputupun ekkewe lamalam? Are pokiten a feito seni eú fénú ese mumutá án emén epwe lúkú Kot? Neman ese kon péchékkúl an apasa pwe ese wor emén Kot nge ese fókkun meefi lamoten an epwe lúkú Kot. Nge chómmóng chón afalafal ra sótun eis: “Ka fen meefi ena seni me lóóm?” Ra kúna pwe ena, a álisi ewe chón imw an epwe áweweei meefian. Aúseling me kosap eppeti an fós. Ika sia weweiti ewe popun ese lúkú Kot, iwe sipwe tongeni silei ifa usun sipwe pélúweni me silei menni puk sipwe tongeni anéúnéú ngeni.—SalF. 18:13.
3. Ifa usun sipwe pwári ach súféliti ewe chón imw me an lúkú?
3 Atun kopwe pélúweni, túmúnúéchú pwe kosap ámmeef ngeni eménnewe pwe ka mochen atai an lúkú. Iei met ewe keangen ofesilapen Merika a apasa: “A fókkun lamot ach sipwe súféliti án emén pwúng le filatá met epwe lúkú. A kon múrinné ach sipwe eáni kapas eis mi efisi án aramas ekieki me pwisin apwungalo ewe mettóch lap seni ach sipwe kútta met sipwe win ren.” Iei met emén chónemmwen mi wisen sáifetál a kan féri. Mwirin an rong pwisin meefien ewe chón imw, fán chómmóng a akkomw pélúweni ren an eis: “Ka fen piin ekieki pwe epwe tufich ei mettóch?”
4. Ifa usun sipwe álisi chón Buddha?
4 Chómmóng chón Buddha rese silei pwóróusen Kot. Ekkóch chón afalafal lón Britain ra sani le néúnéú ewe brochure Lasting Peace and Happiness—How to Find Them (Usun Ach Sipwe Kúna Kinamwe me Pwapwa Ese Much) atun ra afalafal ngeni chón China me Buddha. Mwirin ar pwóróusfengen wóón ewe kapasen lepoputáán lón ena brochure, ra fós wóón ewe kinikin “Is There Really a Most High Creator?” (Mi Wesewesen wor Emén Chón Férikich Mi Lapalap?) me mwirin ewe kinikin “A Guidebook for the Blessing of All Mankind” (Eú Puken Emmwen Fán Iten Feiéchún Aramas Meinisin). Mwirin, neman repwe tongeni néúnéú ewe puk Paipel A Apasa me ereni ewe chón imw: “Inaamwo ika kese lúkú Kot, nge óm kákkáé ewe Paipel epwe álisuk pún a masou ren kapasen emmwen mi álilliséch.” Iei met emén pioneer lón Merika mi álisi ekkewe chón China a erá: “Chómmóng lón ám we leenien afalafal ra sani állea. Lape ngeniir ra fen álleani ekkewe puk aua ngeniir mwen aupwe liwinitiir. Nge neman rese weweiti ewe kókkótun káéén Paipel. Ina popun ua sani le anéúnéú ewe brochure Pwóróus Allim atun ua kerán chuuriir pokiten ena brochure a álisatá pwóppwóróusfengen.” Ewe chónemmwen mi wisen sáifetál mi álisi ekkewe mwichefel mi eáni fósun China lón Merika, a erá pwe a tufich ar repwe néúnéú ewe puk Paipel A Apasa atun ra kerán chuuri ewe chón imw. Iwe nge, neman a éch epwe poputá ewe káé lón sópwun 2 mi fós usun ewe Paipel, nge esap sópwun 1, ewe mi fós usun Kot.
5. Pwata a lamot mosonottam?
5 Mi lamot mosonottam pún ese kon mwittir án emén epwe ámááraatá an lúkú Kot. Ekkewe atun sia kerán chuchchuuri ewe chón imw, neman ese mwékút le tipeeú ngeni pwe mi wor emén Chón Férikich. Iwe nge, ló, ló, ló, neman epwe apasa pwe a tufich an epwe wor emén Kot are neman epwe apasa pwe a weweiti pwata emén epwe lúkú Kot.
6. Pwata ekkóch rese kon pwapwaiti ewe Paipel?
6 Chókkewe Rese Kon Pwapwaiti Paipel are Núkúnúk Wóón: Fán chómmóng emén epwe apasa pwe mi wor Kot nge ese pwapwaiti met Paipel a apasa pokiten ese lúkú pwe ina Kapasen Kot. Neman i are an famili ra feito seni eú fénú ikewe ie aramas rese lúkú Kraist me a ekieki pwe Paipel eú chék puken ekkewe lamalamen tipitipin Chón Kraist. Are i are an famili ra feito seni eú fénú ikewe ie mi erá pwe iir mi lúkú Kraist nge rese áfánni angangen Kot me ese ekieki pwe ewe Paipel epwe álilliséch ngeni. Ifa usun sipwe álisi chókkana le ámááraatá ar pwapwaiti ewe Paipel me mwirin etiwa ar repwe káé Paipel lón ewe puk Paipel A Apasa?
7. Ifa ewe mettóch mi múrinné, fán chómmóng a amwékútú aramas le pwapwaiti ewe Paipel?
7 Iei makkeien ewe keangen ofesilap lón Greece: “Ren ach sipwe álisi chókkewe rese kon pwapwaiti ewe Paipel, a kon múrinné ach sipwe chék suuki ewe Paipel me áiti ngeniir met masouan. Chómmóng chón afalafal ra kúna pwe ekkewe pwóróus seni Paipel a kon achchúngú letipen emén lap seni met ewe chón afalafal epwe pwisin apasa. (Ipru 4:12) Án ekkóch kúna iten Kot lón ewe Paipel a álisiir le sani ar repwe káé ewe Paipel.” Iei makkeien ewe keangen ofesilap lón India: “Ewe enlet usun manaw me máló a lukeato chómmóng chón Hindu me ra pwal sani án Paipel we pwon usun eú fénúfan ese chúen wor aapaap lón.” Án ekkóch chón afalafal apwóróusa ekkewe osukosuk aramas ra kan lólileniesiniir, fán chómmóng a álisiir le áiti ngeniir met ewe Paipel a apasa ren ifa usun Mwúún Kot epwe pwákini ekkewe osukosuk.
8. Met sipwe tongeni apasa ngeni chókkewe rese pwapwaiti ewe Paipel pokiten ekkewe tipitipin lamalamen Chón Kraist?
8 Ika emén ese pwapwaiti ewe Paipel pokiten ekkewe tipitipin lamalamen Chón Kraist, iwe sipwe affata ngeni pwe ekkena lamalam ra fen néúnéúmwáálli ewe Paipel me áitian kewe. Ewe keangen ofesilap lón India a makkeei: “Fán ekkóch, a lamot ach sipwe álisi ekkóch le weweiti pwe ekkewe tipitipin lamalamen Chón Kraist esap iir chón túmúnú ewe Paipel.” Ra erá pwe chón Hindu ra kan sani ewe kinikin 4 lón ewe brochure What Is the Purpose of Life? How Can You Find It? (Met Popun Sia Manaw? Ifa Usun Sipwe Kúna ewe Popun?) mi áweweei ifa usun ekkewe tipitipin lamalamen Chón Kraist ra sótun elimengawa me amóeló án Kot Kapas. Emén pioneer lón Brazil a kan ereni aramas: “Pwata ouse káé pwal ekkóch masouen Paipel? Chómmóng ra fen etiwa ar repwe káé nge rese ekiekin fiti eú lamalam. Neman oupwe mwaar ren met oupwe káé.”
9. Pwata sisap fangetá inaamwo ika me lepoputáán emén ese pwapwaiti met ewe Paipel a apasa?
9 Jiowa a nennengeni letipen emén me emén. (1 Sam. 16:7; SalF. 21:2) A lukeato chókkewe mi pwúng letiper ngeni fel mi enlet. (Joh. 6:44) Chómmóng me leir rese fókkun káit usun Kot are a chék ekis sileer usun Paipel. Ach angangen afalafal a atufichiir ar repwe “küna manau, repwe pwal silei ewe let.” (1 Tim. 2:4) Ina popun, ika me lepoputáán rese pwapwaiti met ewe Paipel a apasa nge sisap fangetá! Néúnéú eú me lein ekkewe minen álillis mi kawor le ámááraatá án emén epwe pwapwaiti le aúseling. Ló, ló, ló, neman kopwap néúnéú ewe puk Met ewe Paipel A Wesewesen Apasa?, ewe sia kan néúnéú le káé ngeni aramas.
[Pwóór lón pekin taropwe 4]
Ika ewe chón imw a apasa pwe ese lúkú Kot, iwe sótuni ei:
• Sipwe eisini: “Ka fen meefi ena seni me lóóm?” pwe sipwe silei pwata ese lúkú Kot.
• Ika ewe chón imw, i emén chón Buddha, néúnéú ewe brochure Lasting Peace and Happiness—How to Find Them, (Usun Ach Sipwe Kúna Kinamwe me Pwapwa Ese Much) pekin taropwe 9-12.
• Ika emén a lúkú ewe afalafalen evolution, ikkeei ekkeei minen álillis neman epwe tongeni álisi:
Ewe kinikin lón Awake! itelapan “Was It Designed?” (Emén A Fératá?)
Ewe video The Wonders of Creation Reveal God’s Glory (Amwararen Férien Kot Kewe Ra Pwári Lingen Kot)
Ekkeei brochure, A Satisfying Life—How to Attain It (Usun Óm Kopwe Eáni Eú Manaw mi Menemenéch), lón kinikin 4; Was Life Created? (Itá A Wor Emén Chón Fératá Manaw?); me The Origin of Life—Five Questions Worth Asking (Ifa Usun A Poputá Manaw—Nimu Kapas Eis Mi Lamot)
• Ika a fen péútúló án emén lúkú Kot pokiten ekkewe mettóch rese pwúng me ekkewe riáfféú, ikkeei ekkeei minen álillis epwe tongeni álisi:
Ewe puk, Is There a Creator Who Cares About You? (A Wor Chón Féruk Mi Tongeok?), sópwun 10
Ekkeei brochure, Does God Really Care About Us? (Itá Kot A Wesewesen Chúngúkich?), kinikin 6, me What Is the Purpose of Life? (Met Popun Sia Manaw?), kinikin 6
• Ika ewe chón imw a poputá le ekieki pwe mi wor emén Kot, mwittir néúnéú ewe puk Paipel A Apasa. Neman a éch sipwe poputá wóón sópwun 2 are pwal eú itelap mi fich ngeni.
[Pwóór lón pekin taropwe 5]
Ika ewe chón imw ese lúkú ewe Paipel, sótuni ei:
• Pwóróusfengen wóón sópwun 17 me 18 lón ewe puk Life—How Did It Get Here? By Evolution or by Creation? (Ifa Usun A Fis Manaw? Ren Evolution are ren Emén Chón Fératá?)
• Fán iten ekkewe chón Hindu, néúnéú ewe brochure Why Should We Worship God in Love and Truth? (Pwata Sipwe Fel Ngeni Kot lón Tong me Enlet?)
• Fán iten ekkewe chón Jus, néúnéú ewe brochure Will There Ever Be a World Without War? (Epwe Wor Eú Fénúfan Esap wor Maun lón?), pekin taropwe 3-11.
• Pwóróusfengen usun álilliséchún ach apwénúetá án Paipel kapasen emmwen. Ikkeei ekkeei minen álillis sipwe tongeni áiti ngeni emén usun álilliséchún Paipel lón manawan:
Ewe kinikin lón Awake! itelapan, “Help for the Family” (Álillis Fán Iten Famili)
Ewe video The Bible—Its Power in Your Life (Ewe Paipel, A Manaman lón Manawom)
Ekkeei brochure, Pwóróus Allim seni Kot!, lesen 9 me 11; A Book for All People (Eú Puk Fán Iten Aramas Meinisin), pekin taropwe 22-26; me A Satisfying Life—How to Attain It (Ifa Usun Kopwe Eáni Eú Manaw mi Menemenéch), kinikin 2
Fán iten chón Buddha, néúnéú ewe brochure The Pathway to Peace and Happiness (Ewe Al Ngeni Kinamwe me Pwapwa), pekin taropwe 3-7.
Fán iten chón Muslim, néúnéú ewe brochure Real Faith—Your Key to a Happy Life (Lúkú mi Enlet, Ina Kiien Manaw mi Pwapwa), kinikin 3.
Ika ka akkafalafal lón ekkewe leeni ikewe aramas rese sani ewe Paipel, eli mi fen éch kosap pwári pwe met ka esilei a pop seni Paipel, tori mwirin fitu fansoun ka fen chuchuuriir.
• Áweweei ifa usun án Paipel kewe oesini ra fen pwénútá. Ikkeei ekkeei mettóch ka tongeni néúnéú:
Ewe video, The Bible—Accurate History, Reliable Prophecy (Ewe Paipel, A Pwúng Uruwo lón me Alúkúlúk Oesinian)
Ewe brochure, A Book for All People (Eú Puk Fán Iten Aramas Meinisin), pekin taropwe 27-29
• Ika eménnewe a eis áitien Paipel kewe wóón ekkóch itelap, iwe mwittir néúnéú ewe puk Paipel A Apasa.
[Pwóór lón pekin taropwe 6]
Ika ewe chón imw a erá: “Use lúkú Kot,” ka tongeni erá:
• “Ua tongeni ekis áweweei met a anúkúnúkúei pwe a wor emén Chón Fératá?” Mwirin áwewe ngeni ekkewe pwóróus seni ewe puk Reasoning, pekin taropwe 84-86, are akkóta le uweato eú puk ka fen sani le álleani.
• “Nge ika a wor Kot, met ka mochen epwe napanapeni?” Lape ngeni ekkewe chón imw ra pélúweni pwe ra mochen chiechi ngeni emén Kot mi tong, pwúng me úméúméch, me emén ese lifilifil aramas. Áiti ngeni seni Paipel pwe Kot a eáni ekkena napanap. (Eli a fen pwal mwo nge tufich ach sipwe néúnéú sópwun 1 poputá seni parakraf 6 lón ewe puk Paipel A Apasa.)
Ika ewe chón imw a erá: “Use lúkú ewe Paipel,” ka tongeni erá:
• “A chómmóng ra eáni ena ekiek. Ekkóch ra meefi pwe ewe Paipel ese tipeeú ngeni science are an kewe allúk rese fich. Kese mochen ereniei, ika ka fen álleani ewe Paipel fán eú? [Mut ngeni an epwe pélúweni. Mwirin áiti ngeni ewe pwóróus lepoputáán lón pekin taropwe 3 lón ewe brochure A Book for All People (Eú Puk Fán Iten Aramas Meinisin) me anéúnéú ngeni.] Chómmóng rese lúkú Paipel pokiten lamalam ra fen áeámwáálli áitian kewe. Lón nan ua mochen sipwe pwóróus wóón ekkóch pwóróus lón pekin taropwe 4 me 5.”
• “Chómmóng ra pwal eáni óm ekiek. Kese mochen, ua tongeni áiti ngonuk och mettóch ua sani seni Paipel? [Álleani Hiop 26:7 are Aisea 40:22 mi pwári pwe a pwúng pwóróusen Paipel usun science.] Ewe Paipel a pwal masou ren kapas mi tipachem mi álisi ekkewe famili. Lón nan ua tongeni áiti ngonuk eú pwóróus usun.”
• “Kilisou chapur ren óm ereniei ena. Ika Kot a wisen makkeei eú puk fán iten aramas meinisin, óm ekiek nge epwe met masouan?” Iwe, kopwe áiti ngeni eménnewe och pwóróus seni Paipel mi tipeeú ngeni meefian.