Eáni Leenien Áppirú Ekkewe Soufós Usun Nahum
1. Met sia káé seni ewe puken Nahum?
1 Mwirimwirin tatakkisin Ninifa me lóóm a pwáraatá usun met Nahum a oesini, Jiowa a maun ngeni chón koputan kewe pwal mwo nge ekkewe mi fókkun eniweniw, iir rese tongeni ú ngeni Jiowa. (Nah. 1:2, 6) Sia tongeni káé ekkóch lesen fán iten ach we angangen afalafal seni ach etittinafichi án Nahum kewe oesini.
2. Ifa usun minne sia eáni afalafal epwe múrinné iteitan?
2 Awora Ouruur me Ápilúkúlúk: Ika sia chék ekis nengeni ewe puken Nahum usun nge a chék kapas usun kapwúngún Ninifa, iolapan Asiria lóóm mi lamalam tekia. (Nah. 1:1; 3:7) Iwe nge, ena kapwúng ina eú kapas allim ngeni néún Jiowa kewe aramas. Iten Nahum we a wewe ngeni “Chón Ouruur” pún a ouruuru chienen kewe chón Jus pwe ekiseló chék chón koputer kewe resap chúen nóm! Nahum a pwal alúkúlúkú pwe Jiowa “a tümwünü nöün aramas lon fansoun riaföü.” (Nah. 1:7) Atun sia afalafal sia pwal esile ngeni aramas ewe kapas allim me peseer ar repwe eáni Jiowa ar leenien op.—Nah. 1:15.
3. Ifa usun sipwe áppirú án Nahum néúnéú kapas áwewe?
3 Néúnéú Kapas Áwewe: Jiowa a amwékútú Nahum an epwe aléllééi talóón Ninifa ngeni talóón ewe telinimwen Isip itan Tepes (No-amon), ewe Asiria a ataieló. (Nah. 3:8-10) Atun sia fós ngeni aramas usun talóón ei ótóten fénúfan mi ngaw, sia tongeni menlapei ekkewe oesini lón Paipel mi ánnetatá pwe Jiowa a apwénúetá meinisin kinikinin an kewe oesini. Áwewe chék, atun chón Papilon me chón Metia ra maunei ewe telinimw Ninifa lap seni wonopúkú ier mwen Kraist, púngúmmongun út a efisi pummongun ewe chénúpupu Tikris, iwe a efisi turutiwen kinikinin tittin ewe telinimw mi fókkun péchékkúl. Iwe, ra mwittir okkufu Ninifa usun minne Jiowa a fen oesini.—Nah. 1:8; 2:6.
4. Ifa usun sipwe tongeni eáni afalafal mi ffatéch me weweéch?
4 Ffatéch me Weweéch: Napanapen án Nahum mak a weweéch me amwasangasang. Makkeien a ffatéch. (Nah. 1:14; 3:1) Pwal ina usuch, sia mochen néúnéú kapas aramas repwe mwittir weweiti. (1 Kor. 14:9) Atun ka ákkáeúin fós ngeni aramas, kopwe affata popun óm chuuri. Atun ka káé ngeni emén, álisi le ámááraatá an lúkú Jiowa, an we Kapas me epwe aúcheani ifa usun ewe pwóróus a káé a pwisin weneiti.—Rom 10:14.
5. Ifa ewe kapas mi alúkúlúk sia káé seni án Nahum oesini?
5 Ewe puk Nahum a makkeei mi iteit seni itan a pwáriéchú an lúkúlúk pwe án Jiowa kapas epwe fókkun pwénúetá. Atun sia arap ngeni talóón án Satan ótót, sia kúna ouruur ren ekkeei kapas seni Kot: ‘Epwe chok fan ew an emon epwe ungeniei.’—Nah. 1:9, KG.