2015 Sukulen Angangen Chón Kraist A Álisikich pwe Sipwe Angangéchúló lón Ach Asukula Aramas

¹ Ewe soumakken kélfel Tafit a makkeei: “Amwo kapasen awei me ekiekin lelukei epwe mürina me fän mesom, ai Samol mi Lapalap, ai achau me ai chon amanau.” (Kölf. 19:14) Sipwe pwal mochen pwe aloch epwe múrinné me ren Jiowa pún sia aúcheani wisach le fós usun ewe enlet lón ewe mwichefel me lón ewe angangen afalafal. Ewe Sukulen Angangen Chón Kraist, ina eú me lein alen án Jiowa asukulakich fán iten ena angang. Ei káit a fiffis iteiten wiik lón lap seni 111,000 mwichefel wóón unusen fénúfan. A fen elipwákéchú sókkópaten pwiich kewe lón ar afalafala ewe pwóróus allim. A pwal atufichiir le asukula aramas fán pwora, fán ewe napanap mi pwáraatá súfél me angéch le pesei aramas.​—Föf. 19:8; Kol. 4:6.

² Lón ewe sukul fán iten 2015 sipwe káé ekkewe pwóróus seni ekkewe puk Kákkáé Met A Nóm lón án Kot Kapas, “Tongen Kot” me ewe Pwóróus Allim. Pwal och, a pwal siwil ttamen ekkeei kinikin, menlapen pwóróusen Paipel me ewe Afalafal Na. 1. Ekkewe parakraf fan repwe pwóróus usun ekkeei ekkesiwil me ekkewe kapasen emmwen ren ifa usun ekkewe chón afalafal repwe eáni ekkena kinikin.

³ Menlapen Pwóróusen Paipel: Pwiich kewe Chón Kraist mwán repwe áeá ruu minich le menlapei eú pwóróus mi múrinné seni ewe álleaan Paipel. Ika a mmólnéch, a tongeni menlapei eú mettóch mi álilliséch ngeni ewe mwichefel ren chék ena úkúkún fansoun. Mwirin, epwe wor wonu minich fán iten chón ewe mwichefel repwe uwawu met ra aúcheani lón ewe álleaan Paipel nge emén me emén epwe chék 30 seken are kis seni. Mi lamot mmólnéch me túmúnúéch pwe sipwe eáni eú memmeef mi aúchea lón chék 30 seken, nge ach féri ena, a eú minen káit ngenikich. Iwe pokiten ena, a pwal wor fansoun ngeni ekkóch ar repwe uwawu meefier seni ar research.

⁴ Afalafal Na. 1: Ewe álleaan Paipel epwe chék úlúngát minich ttaman are kis seni me epwe chék álleani fitu wokisin. Mi lamot ngeni chókkewe mi eáni ei kinikin ar repwe asóssót fán chómmóng ren ar léúwommóng, ánewenewaéchú me epwe ffatéch an állea pwe chón ewe mwichefel repwe weweiti ena pwóróus lón ewe Paipel. Meinisin néún Jiowa kewe aramas itá repwe achocho pwe ar állea epwe ffat pún állea a kon lamot lón ach fel. A ifa me pwapwaach pwe chómmóng néúch kewe kúkkún ra angéch le állea! Sia apúnga ekkewe sam me in ren ar achocho fiti tong le álisiir.

⁵ Afalafal Na. 2: Emén pwiich Chón Kraist fefin epwe wisen eáni ei afalafal lón úkúkún nimu minich. Epwe menlapei ewe itelap a fen kawor. Minne sipwe angang wóón epwe weneiti eú me lein ach kewe alen afalafal nge mi weneiti me álilliséch lón ach we leenien afalafal. A tongeni néúnéú pwal ekkóch wokisin nge mi chék riri ngeni ewe itelap. Ewe chónemmweni ewe sukul epwe filatá chienen ewe chón afalafal.

⁶ Afalafal Na. 3: Emén Chón Kraist mwán are fefin epwe tongeni eáni ei afalafal lón úkúkún nimu minich. Ika emén Chón Kraist fefin epwe wisen eáni ei afalafal, epwe usun ewe Afalafal Na. 2. Ika emén Chón Kraist mwán epwe wisen eáni, epwe féri pwe an afalafal epwe échiti ekkewe chón aúseling nge an na afalafal epwe lóngólóng wóón ewe puk Pwóróus Allim are “Tongen Kot.” Ewe chón eáni ei afalafal, epwe angang wóón ewe itelap a fen kawor me filatá ekkewe wokisin mi fich an epwe néúnéú.

⁷ Mineféén Napanap lón Afalafal Na. 3 fan Iten Chón Kraist Mwán: Ika ewe afalafal a lóngólóng wóón Kákkáé Met A Nóm lón án Kot Kapas epwe eáni lón pwomwen eú famili fel are angangen afalafal. Lap ngeni ewe chónemmweni ewe sukul epwe filatá chienen ewe chón afalafal me napanapen ewe afalafal. Chienen ewe chón afalafal we itá epwe emén aramasan are pwal emén Chón Kraist mwán. A tongeni néúnéú lón an we afalafal pwal ekkóch wokisin mi menlapei ekkewe kapasen emmwen lón Paipel mi riri ngeni ewe itelap. Fán ekkóch, emén mwán mi ásimaw epwe eáni ei afalafal. A tongeni filatá emén chienan me napanapen an we afalafal. Ese mwáál epwe fókkun apéchékkúla chón ewe mwichefel ar repwe kúna an ekkewe mwán mi ásimaw pwári napanapen ar asukula emén me lein chón ar famili are pwal emén Chón Kraist mwán.

⁸ Kapasen Fén: Mwirin emén me emén chón afalafal, ewe chónemmweni ewe sukul epwe néúnéú ruu minich pwe epwe apúnga me awora kapasen fén mi lóngólóng wóón ewe puk Benefit From Theocratic Ministry School Education. Atun ewe chónemmwen epwe kérato ewe chón afalafal esap mwo apasa met a angang wóón. Nge mwirin an afalafal, ewe chónemmwen epwe apúnga, apasa met ewe chón sukul a angang wóón me tichiki ewe popun a angangéch are áweweei fán pwetete pwata a álilliséch an epwe ámúrinnééló.

⁹ A nóm lón néún ewe chón sukul we Ministry School puk pekin taropwe 79 ngeni 81 met epwe angang wóón. Mwirin an ewe chón sukul afalafal, ewe chónemmweni ewe sukul epwe makkeei lón néún ewe chón afalafal we puk och esissillen met mi fich ngeni, me eisini ika a féri ewe exercise mi weneiti minne a angang wóón nge i chék epwe rong. Mwirin ewe mwich are pwal lón eú fansoun a tongeni awora ngeni ewe chón sukul kapasen apúnga me pwal ekkóch kapasen pesepes mi álilliséch. Ewe álillis ewe chón sukul a angei epwe itá ámmeef ngeni pwe ina alen an epwe tongeni feffeitá lón an angang ngeni Kot.​—1 Tim. 4:15.

¹⁰ Ika a luló an ewe chón sukul fansoun afalafal, ewe chónemmwen are emén chón álillis epwe álisi le féri eú esissil, áwewe chék, ren bell are ochopuchopu och mettóch . Nge epwe pwetete an féri ena esissil. Ewe chón sukul epwele itá áwesaaló an fós me tétiw.​—Ppii ewe Ministry School puk, p. 282, par. 4.

¹¹ Chókkewe ra fich, a wor pesepes ngeniir pwe repwe fiti ewe Sukulen Angangen Chón Kraist. (Ppii ewe puk Ministry School, p. 282, par. 6.) Ewe káit ena sukul a awora a atufichi néún Jiowa kewe aramas ar repwe afalafal me asukula aramas ewe kapas allim usun ewe Mwú fán tipeppós, ésúfél me tong. Ese wor tipemwaramwar pwe Jiowa a pwapwa ren néún kewe mi angei álillis mi watte seni an we kókkótun asukul, iir kewe mi mwareiti i.​—Kölf. 148:12, 13; Ais. 50:4.