Afalafal ren Áeáán Leenien Ékúna Puk Ngeni Aramas

A pwá pwe ewe angangen afalafal mi áeá ekkewe leenien ékúna ngeni aramas ekkewe puk usun chék efóch waa are cheepel, a fókkun álilliséch le lukeato chókkewe mi letipwenechar ngeni ewe enlet. (Joh. 6:44) Ina minne, ekkewe mwán mi ásimaw ra angei kapasen pesepes ar repwe akkóta ewe angangen afalafal lein chómmóng aramas lón án ar we mwichefel territory ikewe mi etieppach aramas ie. Pokiten resap nómwotiw ekkena leenien ékúna ngeni aramas puk, iwe lape ngeni ese pwal lamot tingoren mumutá seni ekkewe néúwisin mwú. Iwe, ié kewe ra fich le fiti ei angang? Ekkewe chón afalafal mi eáni mirit, mi ésúfél me mi silei ifa usun epwe pwóróus ngeni aramas. Ekkewe pwóróus fan, ikkena ekkóch mettóch itá kopwe féri me kosap féri pwe epwe álisi chón afalafal le alapaaló sópwéchúr.

Kopwe Féri:

Kopwe chiechiéch, etiwetiwéch me álilliséch ngeni chón fetál. Ekkóch chón afalafal ra emelimel me kapong ngeni ekkewe chón fetál. Ika emén a attola ekkewe puk atun a fetál, ka tongeni erá: “Ka tongeni angang noum ika ka mochen.”
Kopwe útá ekis towau seni ewe leenien ékúna ngeni aramas puk. Lón ekkóch leeni, ekkewe chón afalafal ra sópwéch ika ra útá fitu fiit seni ena leenien ékúna ngeni aramas puk. Nge me ren ekkóch ra meefi pwe ena kókkót a etipemwaramwara án aramas repwe kaúló, ina popun ra pwal ekis towau seni me witiwit tori a wor chón kaúló ren ena leenien ékúna ngeni aramas puk. Ika emén a fetáleto, sótun pwóróus ngeni, neman ren óm eisini: “En mi fen ekieki usun enan kapas eis me lóóm?”
Néúnéú ewe Paipel iteitan.
Áweweei ewe kókkótun káé Paipel ngeni emén mi angei eú me lein ekkewe puk sia kan nénnéúnéú le káé, usun ewe puk Paipel A Apasa. Eisini ika a mochen katol ewe video wóón mechá Pwata Kopwe Káé ewe Paipel?
Túmúnú pwe epwe nónnóm reom alen tikeri ewe mi mochen aúseling ika mi tufich. Ika ewe emén ese nónnóm lón óm territory, amasoua ewe taropwe Please Follow Up (S-43) me mwittir ngeni ewe seketeri.