Kapasen Áchechchem fán Iten Mwichelap
Kulókun ewe Prokram: Ewe leenien mwichelap epwe suuk kulók 8:00 lesossor. Ewe nikáttikin lepoputáán epwe ttik minich 20 paas kulók 9. Ina atun sipwele feiló ngeni ach kewe leenien móót pwe ewe prokram epwe poputá fán kókkótéch. Ewe prokram epwe much órun kulók 5:00 lekuniol.
‘Mwareiti Jiowa ren Kél’: Néún Kot kewe aramas me lóóm ra mwareiti Jiowa ren kél, me tori ikenái ewe nikáttik a eú kinikin mi lamot lón ach fel ngeni Kot. (Kölf. 28:7) Mwen poputáán eú me eú prokram lón ewe mwichelap a poputá ren nikáttik. Ei nikáttik esap chék fán iten ach sipwe pwapwaiti le aúseling, nge a mmólnetá pwe sipwe káé me fel ngeni Jiowa. Ina minne, ika ewe chón átettel a esilesil pwe epwele poputá ewe nikáttikin lepoputáán, iwe ina atun sipwele móóttiw me aúseling fiti ach aúcheani ewe nikáttik, nge sisap apwóróus. Ach féri ena a pwári pwe sia aúcheani án chón ewe Watchtower orchestra achocho. Fán ruu lón eú ier chienach kana Chón Kraist ra sái ngeni Patterson, New York, nge ra pwisin mééniir pwe repwe tongeni féri nikáttik mi ngiiéch pwe sipwe pwapwaiti. Mwirin ach aúselingéch ngeni ewe nikáttikin lepoputáán, meinisin sipwe fiti ewe kélún mwareiti Jiowa ren ach eáni ekkewe kélún Mwú.
Leenien Tarakú: Lón ekkewe leenien mwichelap meinisin ika kich sia wisen túmúnú ekkewe leenien tarakú, iwe, epwe kawor ngeni chón fiti meinisin tori a uroló nge esap kamé. Lape ngeni mi chék kaúkúló leenien tarakú, ina popun epwe éch ika sipwe chék okkuch wóón waan ekkewe ekkóch. Chókkewe chék mi wor esissil fán iten mi ter wóón ar license plate are placard epwe mumu ngeniir le eleenia waar lón leenien waan ekkewe mi ter.
Káimulóón Leenien Móót: Iteiten lesossor ika a suuk asamen ewe leenien mwichelap, ouse mochen ousap kitir wóón ekkewe sea usun itá oua kikkitir me chiechiach kewe. Ouse mochen oupwe ekieki ekkewe ekkóch pwal mwo nge pennúkú pwisin ach mochen fán iter. Ewe napanap pennúkúóló pwisin mochenich ina esissillen pwe kich Chón Kraist mi enlet me a achchúngú chón attolakich le mwareiti Kot. (Joh. 13:34, 35; 1 Kor. 13:5; 1 Pet. 2:12) Oupwe chék áimuoló leenien móót fán iten chón lón imwemi, chón waami are néúmi chón káé. Ika pwe ousap áeá eú sea, ouse mochen ousap watá och mettóch wóón. Ámi tipemecheres ren ei mettóch epwe álisi án ekkewe ekkóch repwe kúna pwe ra tongeni móót wóón ekkena sea. A fen kawor leenien móót fán iten ekkewe chinnap me ekkewe mi apwangapwang. Pokiten a kaúkúló leenien móót, emén are rúúemén chón túmúnú chinnap are mi apwangapwang repwe tongeni móót rer.
Úf mi Fich: Úfach atun ewe mwichelap epwe fich me úkúkéch, esap pwáraatá stylin fénúfan mi kon ssenúk. (1 Tim. 2:9) Pwal mwo nge fansoun asésé mwen me mwirin ewe mwich, sia mochen túmúnú foutach epwe fich me torotoréch. Ina popun sipwe pwapwa le áeá ach kewe badge fán iten mwichelap nge sisap pireir le afalafal ika a suuk ngenikich. Foutach me féfféréchúch atun sia fiti ekkewe mwichelap repwele fis, esap chék lukeato ekkewe mi letipwenechar ngeni án Paipel we pwóróusen amanaw nge epwe pwal eselipato pwapwaan Jiowa.—Sef. 3:17.
Pwári Súfél Atun Néúnéún Mechá: Atun mwichelap sia pwári féfféréch ren ach féri pwe néúch kewe cell phone are ekkewe ekkóch mechá resap aosukosuka ekkewe ekkóch. Ika sia néúnéú sasing, video, tablet, are ekkewe ekkóch mechá, sia mochen ekieki ekkewe ekkóch ren ach sisap aosukosuker are eppetiir ar repwe kúner. Sia pwal pwári súfél ren ach sisap text are email ika ese lamot atun afalafal.
Mwéngéén Leolowas: Ouse mochen uwei ámi opento pwe ousap ló seni ewe leenien mwichelap atun mwéngéén leolowas. Oupwe tongeni uwei kúkkún ice chest mi tongeni kuch fán ámi kewe sea pún ese mumutá ekkewe watteen ice chest are cooler are ekkewe sepi kilas lón ewe leenien mwichelap.
Asor: Sia tongeni pwári ach kilisou ren kókkótun ewe mwichelap ren ach asor fán iten ewe angangen afalafal wóón unusen fénúfan. Ekkewe ra néúnéú check le asor repwe makkeei “Watch Tower.”
Sáfei: Ika ka nóm wóón sáfei, iwe, kese mochen uwei únúmom kana sáfei, pún ese wor lón ewe leenien mwichelap. Péútaaló ekkewe minen opposun suke pwe ete efeiengawa ekkewe ekkóch, nge esap lón an ewe mwichelap leenien kápich are hotel.
Emmwen fán Iten Túmún: Ouse mochen oupwe chechchemeniéchú pwe oupwe túmúnú seni minen feiengaw ren ffaas me chepeti mettóch. Iteiten ier a kan fiffis feiengaw pokiten án emén néúnéú och sókkun suus, ákkáeúin ika ekkan suus mi kon tekia. A fókkun múrinné le néúnéú suus mi úkúkéch pwe oupwe tufichin fetál wóón laté, wóón leeni ese sónósónéch, wóón ekkewe leenien fetál mi ffér seni mechá me metakkan.
Ekkewe mi Weires le Rong: Ewe prokram epwe ttik wóón FM radio frequency lón ewe leenien mwichelap. Ren an epwe tufich pwe kopwe rongorong, kopwe uwei noum radio mi wor FM receiver me earphone.
Waan Ménúkol me Sea Watte: Ousap uwei ekkewe waan ménúkol me ekkewe sea mi watte ngeni ewe leenien mwichelap. Iwe nge, ekkan sókkun sea fán iten núkúnúkéchún ekkewe kúkkún a mumutá ika epwe tongeni nóm wóón ewe sea únúkkún semer kewe me iner.
Kepit mi Pwokkus: Lape ngeni ekkewe leenien mwichelap ra kan fis lón ekkewe leeni mi kappúng nge a wor ekkewe minen akkusawu ásepwál. Ina popun, eú minen pwáraatá kirekiréch ika sia aúkúkú epitach lé mi péchékkúl pwokkusun pún mi tongeni esemweni ekkewe aramas mi úriir semwenin ngasangas me ekkóch sókkun semmwen mi usun chék ena.—1 Kor. 10:24.
Taropween Please Follow Up (S-43): Oupwe amasoua ena taropwe ika oua chuuri emén mi pwapwaiti le káé atun oua afalafal sereseréch atun ewe mwichelap. Ika a unus amasouen ena taropwe, oupwe waló lón ewe Puk Ruumw are ngeni ewe seketeri lón pwisin ámi we mwichefel.
Leenien Mwéngé: Asamolu iten Jiowa ren óm féfféréch lón ekkewe leenien mwéngé. Foutom epwe fich ngeni emén Chón Kraist. Watiw óm tip ika ina eérenien lón leeniom.
Hotel:
Kese mochen kosap káimuló ruumw epwe lap seni minne kopwe áeá me kosap mut ngeni aramas repwe nóm lón ruumwom mi lap seni met ewe hotel a mutatá.
Kosap siwili óm reservation, nge ika a wor met mi weiweitá, mwittir esile ngeni ewe hotel pwe ekkewe mi osupwangen leenier ra tongeni áeá ena ruumw. (Mat. 5:37) Ika ka cancel, chechchemeni le angei nampaan óm na cancellation. Ika ka cancel eú ruumw mwirin 48 awa seni ewe atun ka reserve ewe ruumw, iwe, kese chúen tongeni angeisefáli óm we deposit.
Kopwe ekieki pwe ika ka néúnéú debit are credit card atun ka register pwe kopwe nóm lón hotel, ekkewe chón angangen hotel ra kan kamwéch moni lón noum we card fán iten unusen méméén ewe ruumw kapachelong ekkewe mettóch eli a ta are a fis atun ka nónnóm. Fitu rán mwirin óm towu seni ena hotel, kese tongeni néúnéú ewe úkúkún moni ra kamwéch lón óm we account tori a tawe.
Atun ka mmólnetá, ina chék ewe atun kopwe angei ewe sein uwou pisek, nge kopwe mwittir eliwini pún ekkewe ekkóch repwe pwal wawa.
Kopwe ngeni ekkewe chón angangen ewe hotel mi uwei ngonuk pisekum kewe óm tip me pwal kopwe watiw fán iten ekkewe chón elimelima ruumwom ika pwe ina eérenien fénúom.
Kopwe kuk lón ekkewe ruumw ikewe ie a wor mumutáán.
Kopwe aúkúkú óm angei ekkewe mwéngé, coffee are ice mi kawor fán iten guest pwe mwéngéén chék lón hotel.
Fansoun meinisin napanapeni uwaan ewe manaman mi fel ngeni chón angangen ewe hotel. Pún iir ra túmúnú chómmóng guest, iwe, repwe mmen aúcheani ach kirekiréch, mosonottam me tipemirit.
Fansoun meinisin ekkewe sam me in repwe túmúnúéchú néúr kewe me lón ewe hotel kapachelong elevator, swimming pool, lobby, ruumwen taiso me metakkan.
Liwinin ruumw mi affatetiw lón ewe Recommended Lodging List ina liwinin lón unusen eú rán nge ese mwo kapachelong takises. Nge ika ra alapaaló, kosap mwo mééni nge kopwe mwittir esilesil ngeni ewe Rooming Department lón ewe mwichelap.
Ika a ppiitá eú osukosuk fán iten ruumwom lón ewe hotel, esilesil ngeni ewe Rooming Department atun ka fiti ewe mwichelap pwe repwe tongeni álisuk.
Álillis le Angang: Chókkewe mi mochen álillis repwe esile ngeni ewe Volunteer Service Department lón ewe mwichelap. Ekkewe mi kis seni 16 ieriir ra tongeni pwal álillis nge epwe fán túmúnúen semer are iner are emén watte nge epwe pwúngúló me ren semer kewe me iner.