Álisi Ekkewe mi Mesechun le Káé Usun Jiowa
1. Ifa usun Jesus a pwáraatá pwe a tongei ekkewe mi mesechun?
1 Jesus epwele máló lón chék fitu rán. Nge atun a ló seni ewe telinimw Jeriko, rúúemén mwán mi mesechun me wéúngaw ra léúwatte le erá: “Äm samol, nöün Tafit, kopwe tongekem!” Inaamwo ika Jesus a silei pwe ekkewe riáfféú repwe tori nge Jesus a kaúló, kériireto me echikareretá. (Mat. 20:29-34) Ifa usun sipwe áppirú án Jesus tongei ekkewe mi mesechun?
2. Ifa usun sipwe tongeni afalafala emén mi mesechun atun sia chuuri ikewe a tepetep aramas ie?
2 Kopwe Álilliséch: Ika ka chuuri emén mi mesechun, neman ikewe a tepetep aramas ie, apasa itom me ereni pwe ka mochen álisi. Pokiten fán chómmóng aramas ra kirikiringaw ngeni, neman akkomw ese lúkú pwe ka mochen álisi. Iwe nge, óm chiechiéch ngeni me óm enletin chúngú epwe ekinamweii. Chechchemeni pwe ese léllé úkúkún ar chun, me ena epwe álisuk ika epwe ifa úkúkún álillis kopwe ngeni. Mwirin óm awora álillis, neman kopwe apasa pwe ka fiti ewe angangen asukula aramas usun Paipel. Ereni pwe ka mochen álleani ngeni eú wokisin usun Kölfel 146:8 are Aisea 35:5, 6. Ika a tongeni álleani Braille are ewe fós mi mak fán iten ekkewe mi mesechun, eisini ika a mochen epwe wor néún puk lón Braille pwe epwe álisi le alapaaló an silei usun ewe Paipel. Ka tongeni álisi le awora ekkewe mettóch repwe rongorong wóón jw.org. Ika néún we computer a wor ‘screen reader program’ ewe a tongeni álleani ngenikich ekkewe mak wóón ewe ‘computer screen,’ neman epwe sani an epwe wor ekkewe pwóróus mi katowu wóón jw.org nge lón mesen mak me pwal ekkewe minen álillisin Paipel ra tongeni kapiiwu lón RTF (Rich Text Format).—Ppii ewe pwóór “Atun Kopwe Álisi Emén mi Mesechun . . . ”
3. Ifa usun sipwe kútta ekkewe mi mesechun lón ach leenien afalafal?
3 Kútta Iir Kewe mi Mesechun: Fán chómmóng sise chuuri ekkewe mi mesechun lón ewe angangen afalafal imw me imw pokiten chómmóng me leir rese kinamwe le fós ngeni ekkewe ra chuuriir lón imwer nge rese sissileer. Ina popun, a lamot sipwe fókkun achocho le ‘kutter’ pwe sipwe afalafaler. (Mat. 10:11, TF) Mi wor chienom lón óm leenien angang are sukul mi mesechun? Kopwe kútta alen kopwe fós ngeni. Ika a wor sukul fán iten ekkewe mi mesechun lón óm leenien afalafal, eis ika ra mochen repwe néúni ekkewe minen álillisin Paipel lón Braille fán iten án ewe sukul library. En mi silei emén nge lón an famili mi wor mi mesechun? A wor eú ofes lón óm we leenien afalafal mi awora álillis fán iten ekkewe mi mesechun are ra awora imw ekkewe mi mesechun repwe nóm lón nge a wor kókkótun an epwe wor álillis ngeniir? Áwewe ngeni ena emén minne aramasan ena mi mesechun, ewe receptionist, are ewe meilapen ewe ofes pwe Chón Pwáraatá Jiowa ra fókkun mochen álisi ekkewe mi mesechun me ereniir pwe ka mochen wato puk lón Braille are pwóróus epwe tongeni ettik. Áiti ngeniir seni Paipel án Kot pwon pwe ekiseló chék mesechun epwe mórófóchóló. Neman kopwe pwal fichi ngeniir ewe video wóón jw.org itelapan “Without It, I Would Feel Lost” mi apwóróusa pwóróusen emén mwán mi mesechun nge a kúna feiéch seni ewe Paipel mi ffér lón Braille. Ren óm áweweei popun óm chuuriir, a tongeni suuki alen óm kopwe chuuri ekkewe mi mesechun.
4. Met sia káé seni pwóróusen Janet?
4 Emén chón Kraist fefin iten Janet nge mi mesechun a ló ngeni eú imw watte mi wor ekkóch mi mesechun lón. A poputá le fós ngeni emén fépwúl. Janet a apasa: “Jesus a echikaraatá aramas mi mesechun pwe epwe áiti ngenikich met epwe féri ngeni meinisin mi mesechun.” Ra pwóróusfengen wóón Pwärätä 21:3, 4. Janet a áweweei pwe án Kot we Mwú epwe apwénúetá ena pwon. Ewe fépwúl a fanafaneló nge mwirin a apasa: “Usaamwo rongorong seni emén mi chun ena pwóróus. Lap ngeni aramas rese mesechun ra ekieki pwe aramas ra mesechun pokiten och mettóch ra féri are met ar lewo a féri.” Janet a tiinaaló ngeni ewe fépwúl wóón link ewe puk Paipel A Apasa me iei ra kákkáéfengen ewe Paipel fán ruu lón eú wiik.
5. Ikaamwo sise tongeni echikaraatá ekkewe mi mesechun usun Jesus nge ach pwáraatá tong ngeniir epwe atoto menni feiéch?
5 Sise tongeni ánennelóói mesen ekkewe mi mesechun usun Jesus nge sia tongeni álisi chókkewe ra chunóló le weweiti án Kot we Kapas pokiten ewe koten ei fénúfan kapachelong ekkewe mi mesechun. (2 Kor. 4:4) Jesus a echikaraatá rúúemén mwán arapakkan ngeni Jeriko pokiten a “fokun tongeer.” (Mat. 20:34) Ika epwe pwal ina usun ach tongei ekkewe mi mesechun epwe suuk ngenikich ena pwapwaan álisi ekkóch leir le káé usun Jiowa, ewe epwe amóeló mesechun feilfeiló chék.