Ach Pwórun Asukul
1. Ifa usun chón afalafal ra usun chón ffér handicraft?
1 Chón ffér handicraft ra áeá sókkópaten pisekin ffér handicraft. Ekkóch me lein ekkena pisek ra chék áeá fán ekkóch fán iten eú sókkun angang mi kkóló aúchean. Nge ekkóch ra kan áeá iteitan. Ikkena ekkewe pisek ekkewe chón ffér handicraft mi angangéch ra waalong lón ar pwórun pisekin handicraft me ra pwal fókkun sipeéch le áeá ekkena pisek. Ewe Paipel a pesei emén me emén Chón Kraist le achocho lón ar angangen afalafal me “eman chon angang esap säw ren an angang.” (2 Tim. 2:15) Ifa ewe pisek mi fókkun lamot lón ach pwórun asukul? Ewe Paipel, ina ewe ákkáeúin pisek sia néúnéú le ‘ewinireno pwe repwe néún [Jesus] chon kaeo.’ (Mat. 28:19, 20, KG) Ina popun mi lamot sipwe achocho le lipwákéch le “afalafala än Kot kapas mi let fän pwüng.” Iwe nge, a pwal wor ekkóch minen álillisin Paipel lón ach we pwórun asukul sia kan nénnéúnéú mi lamot Chón Kraist repwe angangéch le néúnéú le asukula aramas ewe enlet.—SalF. 22:29.
2. Ikkefa ach kewe pisekin akkasukula aramas?
2 Pisekin Asukul Sia Ákkáeá: Me lúkún ewe Paipel, ikkefa ekkewe pisek sipwe pwal áeá? Ewe áeúin sia kan nénnéúnéú le asukula aramas ewe enlet ina ewe puk Met ewe Paipel A Wesewesen Apasa? Wesin ena, sia néúnéú ewe puk Oupwe Chék Nóm lón ewe Tongen Kot le asukula ewe chón káé an epwe apwénúetá án Paipel kapasen emmwen iteiten rán. Ina popun mi lamot sipwe angangéch le néúnéú ekkena ruu puk. Sipwe pwal apachaalong ekkóch brochure lón ach pwórun asukul. Ewe pisek sia kon néúnéú le poputááni káéén Paipel ina ewe Pwóróus Allim seni Kot! Ika a wor aramas lón ach we leenien afalafal ese kon lien silei állea are sókkóló an fós nge ekkóch chék puk mi kawor lón an fós are ese fen wor, iwe sia tongeni néúnéú Akkaúseling Ngeni Kot are Akkaüseling ngeni Kot pwe Kopwe Küna Manau Esemuch. Ei brochure Ié Kewe Ra Féfféri Letipen Jiowa Lón Ei Fansoun? sia kan néúnéú pwe ewe chón káé epwe silei ach we mwicheich. Ekkewe video mi álisi aramas le wiliti Chón Kraist áwewe chék, Pwata Kopwe Káé ewe Paipel?, Met A Fiffis lón ewe Leenien Mwich? me Does God Have a Name? Mi lamot sipwe sileéchú néúnéúr.
3. Lón ekkan Ach Angangen Afalafala ewe Mwú lón mwach met epwe álisngenikich?
3 Lón ekkan Ach Angangen Afalafala ewe Mwú lón mwach repwe álisikich le sileéchú néúnéún ekkewe minen álillisin Paipel lón ach we pwórun asukul. Ach tinikken le néúnéú ekkeei pisek, sia álleasochisi ei fén seni Kot: “Kopwe püsin tümwünuk, kopwe pwal tümwünü mine ka afalafal won. Kopwe likitü le föri ekei mettoch, pun are kopwe föri iei usun, kopwe püsin amanauok me chokewe mi aüselingok.”—1 Tim. 4:16.