Meseik lón Angangen Afalafala ewe Kapas Allim

Ka meefi pwe mi weires óm kopwe afalafal? Chómmóng me leich sipwe apasa, ewer. Met popun? Neman sia kúkkúna pwe ekkewe aramas lón ach leenien afalafal ra tanechepwak are oputakich are sia niwokkus le fós ngeni ekkewe sise sissileer. Pwúngún, ekkena mettóch ra tongeni akúkkúnaló ach pwapwa. Iwe nge, sia fel ngeni ewe Kot mi pwapwa, ewe a mochen ach sipwe angang ngeni fán pwapwa. (Kf 100:2; 1Ti 1:11, NW) Ikkefa ekkewe úlúngát popun mi múrinné sipwe pwapwaiti ewe angangen afalafal?

Áeúin, sia esilefeili ewe pwóróus usun ápilúkúlúk. Inaamwo ika a kúkkúnúló ewe ápilúkúlúk lein aramas lón ei fansoun nge sia tongeni oura letiper ren “kapasen feiöch.” (Ais 52:7) Nge ewe kapas allimen ewe Mwúún Kot a pwal tongeni atoto rech pwapwa. Me mwen ach sipwe feiló afalafal, sipwe mwo ekilonei ekkewe feiéch án Kot we Mwú epwe atoto wóón fénúfan.

Oruuan, ewe kapas allim sia esilefeili a álisi aramas lón pekin aion me lúkú. Ra káé le péútaaló ekkewe féffér mi ngaw me eáni ewe ápilúkúlúkún manaw esemuch. (Ais 48:17, 18; Ro 1:16) Sipwe anchangei pwe itá kich sia nóm lón eú angangen kútta me seláni ekkewe mi feiengaw are péútúló. Inaamwo ika ekkewe ekkóch rese mochen ach sipwe selániir, nge sipwe chék sópweló le kútta ekkewe mi mochen.​—Mat 10:11-14.

Aúlúngátin, iei ewe a kon lamot seni meinisin, ach afalafal a elingaaló Jiowa. A fókkun aúcheani ach angangen afalafal. (Ais 43:10; Ip 6:10) Pwal och, Jiowa a ngenikich an we manaman mi fel pwe epwe fisiéch ei angang. Ina minne, sipwe tingormaú ngeni an epwe ngenikich pwapwa, eú kinikinin uwaan ewe manaman mi fel. (Kal 5:22) Ren án Kot álillis, sia tongeni pworacho ngeni ach kewe aúrek me afalafal fán pwora. (Föf 4:31) Iwe, ese lifilifil met meefien ekkewe aramas lón ach leenien afalafal nge sipwe chék pwapwa lón wisach na.​—Is 3:3.

KATOL EWE VIDEO REGAIN JOY THROUGH STUDY AND MEDITATION, MWIRIN PÉLÚWENI EKKEEI KAPAS EIS:

• Pwata a lamot ach sipwe mwo akkomw apéchékkúla pwisin ach lúkú inaamwo ika sia áeá watteen fansoun lón angangen afalafal iteiten maram?

• Lón menni napanap sipwe áppirú Maria?

• Ineet atun ka ekilonei án Kot we Kapas?

• Met a atoto reom pwapwa atun ka afalafala ewe kapas allim?