Ka Kúna Sokosokun Kot Kewe?

Lupwen óm katol epé péén irá mi sókkopat anúwan, fán láng mi kuuló ren fúú, are eú konik mi pwupwutiw, en mi áfánni pwe iir férien péún ewe Chón Fératá? Férien Jiowa kewe sia kúkkúna ra pwáriéchú sokosokun kewe. (Ro 1:20) Sia tongeni ekis kaúló me ekilonei met sia kúna ren mesach, iwe sipwe tongeni kúna án Kot manaman, tong, tipachem me pwúng pwal an kisáseú.​—Kf 104:24.

Ikkefa ekkóch me lein férien Jiowa kewe ka kúkkúna me áfánni eú me eú rán? Ikaamwo ka nónnóm lein telinimw, nge neman ka tongeni kúnékún machchang are irá ikkena ie. Ach nennengenifichi férien Jiowa kewe a tongeni álisikich le ekisaaló ach aúrek, ach kon nefótófót wóón ach kewe osukosuk, me alapaaló ach lúkúlúk lón án Jiowa tufichin túmúnúkich tori feilfeiló. (Mat. 6:25-32) Ika mi wor noum, álisiir le kúna sokosokun Jiowa kewe mi fókkun amwarar. Lapólóón ach aúcheani férien Kot kewe, a pwal ina lapólóón ach chiechi ngeni i, ewe Chón Férikichetá.​—Kf 8:3, 4.

KATOL EWE VIDEO THE WONDERS OF CREATION REVEAL GOD’S GLORY​—LIGHT AND COLOR, MWIRIN PÉLÚWENI EKKEEI KAPAS EIS:

• Met a atufichi ach sipwe tongeni kúna anúwen mettóch?

• Met a kan efisi an epwe mwolupolup anúwen och mettóch?

• Pwata a kan sókkopat anúwen fán láng?

• Menni ekkewe amwararen anúwen mettóch ka kúkkúna me lón leeniom?

• Pwata sipwe awora fansoun le nennengenifichi ekkewe sókkopaten masouen fénúfan me fán láng?