Áeáán Alen Pwóróusfengen

Seni January 2018, lúkúnpéén Manawach Chón Kraist me Ach Angangen Afalafal​—Minen Káé fán Iten Mwich a awora ekkewe alen pwóróusfengen. Ifa usun sia tongeni áeá?

Kinikin lón Mwich: Kopwe áeá ewe kapas eis, wokisin, me ewe kapas eis lón nan seni ewe alen pwóróusfengen. Esap weween pwe kopwe chék fiti kapasen ewe video fán iten alen pwóróusfengen. A tongeni sókkóló napanapen óm chuuri ewe emén, óm kapasen lepoputáán, óm áwewe, me metakkan. Ka pwal tongeni anéúnéú ngeni eú me lein masouen ach we Pwórun Asukul, inaamwo ika ese wor emmwen óm kopwe féri ena.

Lón Angangen Afalafal: Ekkewe alen pwóróusfengen ra álilliséch ngenikich. Ika eménna a pwapwaiti le aúseling me a mochen epwe sópwósópwóló ámi pwóróusfengen, neman ka tongeni áeá ewe alen pwóróusfengen fán iten liwiniti. Neman ka tongeni ekis siwili ewe alen pwóróusfengen are áeá eú mi sókkóló seni. Aramas lón óm we leenien afalafal repwe kon sani och pwóróus seni eú ekkewe alen pwóróusfengen minen fán ekkewe maram are pwal eú wokisin? Ekkewe aramas lón leeniom ra kon pwapwaiti le rong usun pwóróusen leeniach are pwóróusen fénúfan? Ese lifilifil ifa usun óm áeá ekkewe alen pwóróusfengen, nge kopwe achocho le ‘féri mettóch meinisin fán iten ewe pwóróus allim, pwe kopwe tongeni apwóróusa ngeni ekkewe ekkóch.’​—1Ko 9:22, 23, NW.