MANAWEN CHÓN KRAIST

Sia Mmólnetá Ngeni Fansoun Weires?

Sise máirú ren met a fiffis wóón unusen fénúfan mi áweiresi aramas le atufichi manawer. Pwata? Sia nóm lemuchúlóón ekkeei ránin lesópwólóón me ewe Paipel a éúréúrakich ach sisap lúkúlúk wóón ‘wéún’ ei fénúfan. (1Ti 6:17; 2Ti 3:1) Met pwóróusen King Jehosafat a áiti ngenikich usun ach sipwe mmólnetá ngeni ewe fansoun a áweiresi ach sipwe atufichi manawach?

Atun chón koputen Jehosafat kewe ra mochen maunei, i a lúkúlúk wóón Jiowa. (2Kr 20:9-12) A pwal mmólnetá me mwan ren an onómu soufiu lón ekkewe telinimwen Juta me eleenia mwichen soufiu lón ewe fénú. (2Kr 17:1, 2, 12, 13) Sipwe usun Jehosafat, sipwe sópwéch ika sia lúkúlúk wóón Jiowa me mmólnetá ngeni ekkewe fansoun weires.

MET SIA TONGENI FÉRI PWE SIPWE MMÓLNETÁ NGENI FANSOUN WEIRES?

Apéchékkúla ach riri ngeni Jiowa. Sipwe menemenéch ren met mi wor rech, me apéchékkúla ach lúkúlúk wóón Jiowa pwe epwe awora met sia osupwangan iteiten rán. (Mat 6:26; 1Ti 6:8) Sipwe tipeppós ren ach sisap úkútiw le álleasochisi án Paipel kewe kapasen emmwen pokiten chék sia mochen ataweei ach kewe osupwang. (Ro 2:21) Ekieki ifa usun sipwe sópweló le álleani ewe Paipel me ekkewe minen álillisin Paipel ika ese wor fiifi me Internet. Sipwe isoni ekkóch puk mi katowu lón taropwe me ika mi tufich download me mwan ekkewe puk, video, nikáttik me metakkan wóón néúch mechá.

Ammólnatá fán iten pekin aion: Sipwe túmúnúkich seni liwinimmang, me eiseisa ach moni towu me mwen an epwe fis osukosuken moni. (SF 22:7) Ika mi tufich, isoni ekkóch mwéngé me pwal ekkewe ekkóch mettóch mi lamot. Ekkóch eli repwe ekieki an epwe wor ar ataken iasai pwe epwe ekisikisaaló ar moni towu.

KATOL EI VIDEO ARE YOU PREPARED FOR A DISASTER?, MWIRIN PÉLÚWENI EKKEEI KAPAS EIS:

Sasing seni ewe video “Are You Prepared for a Disaster?” A wor sasingin eú Paipel, eú phone, eú pwotoun met mi lamot ika a fis mettóch mi weiweitá, me ekkewe chón kaú imw.

Met sipwe pwisin féri pwe sipwe tongeni mmólnetá fán iten feiengaw watte?

Your answer

Sasing seni ewe video “Are You Prepared for a Disaster?” Pwiich kewe ra awora álillis ngeni chókkewe mi feiengaw, ra álillis lón ewe angangen kaú imw me uwawu ekkewe pisekin kaú seni ewe tarakú.

Ifa usun sia tongeni mmólnetá le álisi ekkewe ekkóch?

Your answer