Usun Ach Álisi Néúch Kewe Chón Káé le Feffeitá me Papatais​—Kinikin Eú

1. Ifa usun 2 Korint 3:1-3 a álisikich le aúcheani wisach le káé ngeni emén mi feffeitá me papatais? (Ppii ewe sasing wóón péén.)

MET meefiom atun emén chón káé a papatais lón óm we mwichefel? Ese mwáál ka fókkun pwapwa! (Mat. 28:19) Me ika en ka wisen káé ngeni ena emén, a ifa me pwapwaóm lupwen a papatais! (1 Tes. 2:19, 20) Ekkena mineféén chón káé mi papatais iir “taropween pwarata” esap chék néún chókkewe mi wisen káé ngeniir, nge pwal néún unusen ewe mwichefel.​—Álleani 2 Korint 3:1-3 seni Testament Mi Fö.

2. (a) Ifa ewe kapas eis mi lamot sipwe fókkun ekieki usun, me pwata? (b) Ineet sia tongeni erá pwe emén a fen néúch chón káé? (Ppii ewe pwóróus fan.)

² A mmen fókkun apwapwa ach kúna pwe lón ekkewe rúáánú ier ra ló, a wor ina epwe 10,000,000 chón káé Paipelb iteiten maram wóón unusen fénúfan. Lón chék pwal ekkena ier, ina epwe lap seni 280,000 ra papatais iteiten ier me wiliti Chón Pwáraatá Jiowa me néún Jesus Kraist mineféén chón káé. Ifa usun sia tongeni álisi ekkena fite million chón káé ar repwe papatais? Jiowa a chúen mosonottam le mut ngeni aramas fansoun me ar tufichin wiliti néún Kraist chón káé, ina minne sia mochen achocho úkúkún ach tufich le álisiir le mwittir feffeitá pwe repwe papatais. A chék mwochomwoch ei lusun fansoun!​—1 Kor. 7:29a; 1 Pet. 4:7.

3. Met sipwe pwóróus wóón lón ei lesen usun napanapen ach káé ngeni néúch kewe chón káé?

³ Pokiten a fókkun atapwalapwal lamoten ach sipwe álisi aramas le wiliti néún Kraist chón káé, ewe Mwichen Soupwúngúpwúng a eisini ekkewe keangen ofesilap ika met sia tongeni féri le alapaaló ach álisi néúch kewe chón káé le feffeitá me papatais. Lón ei lesen me ewe lesen mwirin ei, sipwe ppii met sia tongeni káé seni ekkewe pioneer, misineri, me chónemmwen mi wisen sáifetál mi lipwákéch.c (SalF. 11:14; 15:22) Ra áweweei met ekkewe chón afalafal me néúr kewe chón káé ra tongeni féri pwe ar káé Paipel epwe múrinnéló. Lón ei lesen, sipwe pwóróus wóón nimu mettóch mi lamot meinisin chón káé repwe féri pwe repwe feffeitá me papatais.

KÁÉ ITEITEN WIIK

4. Met sipwe mirititi usun ekkewe sókkun káéén Paipel mi fis penasamen imwen aramas nge mi chék mwoch?

⁴ Chómmóng pwiich kewe ra káé ngeni aramas penasamen imwer kewe. Inaamwo ika ena sókkun napanapen káé me lepoputáán a mmen éch, nge fán chómmóng ekkena sókkun pwóróusfengen ra chék mwoch me eli ese kan fis iteiten wiik. Ren an epwe sópwósópwóló ena pwóróusfengen, ekkóch pwiich kewe ra tingorei ena emén nampaan néún phone me mwirin ra kéri are text ngeni ekkóch pwóróus seni Paipel. Neman ren fitu maram repwe eáni ena sókkun pwóppwóróusfengen mi chék mwoch. Nge, emén chón káé epwe tongeni enletin feffeitá, fangóló manawan me papatais ika ina chék úkúkún an achocho me ewe fansoun a áeá le káé án Kot we Kapas? Neman aapw.

5. Me ren Lukas 14:27-33, ifa ewe pwóróus Jesus a menlapei epwe tongeni álisikich lón ach angangen asukula aramas?

⁵ Jesus a eáni eú kapas áwewe ren an epwe áweweei met mi lamot emén epwe féri ika a mochen tapweló mwirin. A fós usun emén mi ekiekin aúetá eú imw tekia, me usun emén king mi ekiekin feiló maun. Jesus a erá pwe a lamot án ewe chón kaú epwe “akomwen mottiu o kütta fite ükükün liwinin pisekin” le áwesaaló ewe imw tekia, me a lamot án ewe king epwe “akomwen mottiu o ekieki” ika mi tufich ngeni néún kewe soufiu ar repwe apwénúetá met a ekiekin féri. (Álleani Lukas 14:27-33.) Pwal ina chék usun, Jesus a silei pwe ika emén a mochen wiliti néún chón káé, iwe a lamot an epwe ekiekifichi weween an tapweló mwirin. Ina popun a lamot sipwe apéchékkúla néúch kewe chón káé ar repwe káé rech iteiten wiik. Ifa usun sipwe féri ena?

6. Met sia tongeni féri le álisi néúch kewe chón káé le feffeitá?

⁶ Poputá ren óm attama óm fansoun káé ngeni aramas penasamen imwer kewe. Eli oua tongeni pwóróusfengen wóón ruu wokisin iteiten óm chuuri. Lupwen ewe chón imw a kinamwe ren ena sókkun káé mi ekis ttam, eisini ika ia oua tongeni mómmótfengen ie pwe epwe tongeni sópwósópwóló ámi pwóróusfengen. Minne ewe chón imw epwe apasa, epwe pwári ika a aúcheani an káé Paipel. Ló, ló, ló, ren óm kopwe álisi le feffeitá, neman ka tongeni pwal mwo nge eisini ika a mochen káé fán ruu iteiten wiik. Iwe nge, mi pwal wor met mi lamot me lúkún an káé fán eú are fán ruu iteiten wiik.

AMMÓLNATÁ ME MWEN EÚ ME EÚ KÁÉ

7. Ifa usun ewe chón afalafal epwe ammólnaéchú eú me eú an káé ngeni néún kewe chón káé?

⁷ Pokiten en ewe chón afalafal, iwe mi lamot óm kopwe ammólnaéchú eú me eú káé. Ka tongeni poputá ren óm álleani ewe lesen oupwe káéfengen me katol ekkewe wokisin. Kopwe wewefichiti ekkewe menlapen pwóróus. Ekieki usun itelapen ewe lesen, ekkewe itelap kisikis, ekkewe kapas eis, ekkewe wokisin mi mak “álleani,” ekkewe sasing me lios, me ekkewe video mi áweweei ewe lesen. Mwirin ekieki usun noum we chón káé me ifa usun kopwe áweweei ngeni ewe pwóróus fán mecheres me fataffatéch pwe epwe mwittir liapeni me apwénúetá.—Ne. 8:8; SalF. 15:28a.

8. Met alon aposel Paulus kewe lón Kolose 1:9, 10 a áiti ngenikich usun ach ióteki néúch kewe chón káé?

⁸ Atun ka ammólnatá, iótek ngeni Jiowa usun noum we chón káé me met a lamot ngeni. Tingorei Jiowa an epwe álisuk le káé ngeni noum we chón káé lón ewe napanap epwe achchúngú letipan. (Álleani Kolose 1:9, 10.) Ekieki met epwe tongeni weires ngeni noum we chón káé an epwe weweiti are etiwa. Chemeni pwe ka achocho le álisi an epwe feffeitá me papatais.

9. Ifa usun ewe chón afalafal a tongeni álisi néún chón káé le ammólnatá an lesen? Áweweei.

⁹ Sia áneánei pwe emén chón káé mi kákkáé iteitan epwe aúcheani meinisin met Jiowa me Jesus ra féri me epwe mochen alapaaló silean. (Mat. 5:3, 6) Ren án ewe chón káé epwe unusen kúna álillisin an káé, mi lamot epwe nefótófót wóón minne a kákkáé. Ina popun, áweweei ngeni úkúkún lamoten an epwe ammólnatá eú me eú an lesen ren an álleani me mwan me ekieki ifa usun ena pwóróus a weneiti. Ifa usun ewe chón afalafal epwe álisi? Oupwe ammólnatáfengen eú lesen me áiti ngeni ifa usun epwe féri.d Áiti ngeni ifa usun epwe kútta pélúwen ekkewe kapas eis me erii chék ekkewe kapas mi lamot repwe áchema ngeni pélúwen ekkena kapas eis. Mwirin tingorei an epwe pélúweni lón pwisin an kapas. Ika a féri ena, kopwe tongeni silei ika a weweiti ewe lesen. Iwe nge a chúen wor met ka tongeni pesei ngeni noum we chón káé an epwe féri.

ÁITI NGENI IFA USUN EPWE FÓFFÓS NGENI JIOWA ITEITEN RÁN

10. Pwata a lamot án emén chón káé epwe álleani ewe Paipel iteiten rán, me met epwe féri ren an epwe unusen kúna álilliséchún?

¹⁰ Me lúkún án ewe chón káé kákkáé iteiten wiik ren ewe chón afalafal, mi wor ekkóch mettóch epwe pwisin féri iteiten rán pwe epwe tongeni álisi. A lamot an epwe fóffós me akkaúseling ngeni Jiowa. A tongeni aúseling ngeni ren an ákkálleani ewe Paipel iteiten rán. (Jos. 1:8; Kölf. 1:1-3) Áiti ngeni ifa usun epwe néúnéú ewe “Kókkót fán Iten Álleaan Paipel” mi tongeni printinawu mi nóm wóón jw.org.e Álisi an epwe unusen kúna álilliséchún an álleaan Paipel, pesei ngeni an epwe ekilonei met ewe Paipel a áiti ngeni usun Jiowa me ifa usun epwe apwénúetá minne a káé lón pwisin manawan.​—Föf. 17:11; Jas. 1:25.

11. Ifa usun emén chón káé epwe silei ifa usun epwe iótek, me pwata a lamot an epwe iótek ngeni Jiowa iteitan?

¹¹ Pesei ngeni noum we chón káé an epwe fós ngeni Jiowa ren an ikkiótek ngeni iteiten rán. Iótek seni enletin letipom lepoputáán me wesin eú me eú ámi káé, me pani iten ewe chón káé lón óm kana iótek. Lupwen a aúselinga óm kana iótek, epwe káé ifa usun epwe iótek seni letipan me enletin iótek ngeni Jiowa lón iten Jesus Kraist. (Mat. 6:9; Joh. 15:16) Anchangei álilliséchún án noum we chón káé ákkálleani Paipel iteiten rán (akkaúseling ngeni Jiowa) me ikkiótek (fóffós ngeni Jiowa) epwe álisi an epwe ririéch ngeni Kot! (Jas. 4:8) Ika a féri ekkena mettóch iteiten rán, epwe álisi an epwe feffeitá me papatais. Met epwe pwal tongeni álisi?

ÁLISI AN EPWE ÁMÁÁRAATÁ PWISIN AN RIRI NGENI JIOWA

12. Ifa usun emén chón afalafal a tongeni álisi néún chón káé le ámááraatá an riri ngeni Jiowa?

¹² Minne emén chón káé a káé itá esap chék achchúngú ekiekin nge pwal letipan. Pwata? Pokiten letipach a wewe ngeni mochenich kewe me meefiach mi amwékútúkich le apwénúetá minne sia káé. Jesus a áiti ngeni aramas chómmóng mettóch me ra sani le káé seni. Nge aramas ra tapweló mwirin pún a pwal achchúngú letiper. (Luk. 24:15, 27, 32) A lamot án noum we chón káé epwe silei pwe Jiowa i wesewesen Emén, emén a tongeni chiechiéch ngeni, me silei pwe Jiowa i Seman, an Kot me Chiechian. (Kölf. 25:4, 5) Atun ámi káéfengen, áiti ngeni napanapen Kot kewe mi amwarar. (Eks. 34:5, 6; 1 Pet. 5:6, 7) Féri ena lón meinisin lesen oua káé. Álisi an epwe aúcheani napanapen Jiowa kewe mi echipwér, áwewe chék ren tong, kirekiréch, me an weweiti meefien emén. Jesus a erá pwe “ewe allük mi lap me aüchea seni meinisin,” ina án emén ‘echeni [Jiowa] an Kot.’ (Mat. 22:37, 38) Achocho le álisi noum we chón káé le tongei Jiowa.

13. Áweweei ifa usun sipwe álisi emén chón káé le káé usun napanapen Jiowa kewe.

¹³ Atun oua pwóppwóróusfengen me noum we chón káé, áweweei ngeni pwata ka fókkun tongei Jiowa. Ena mettóch epwe tongeni álisi le mirititi lamoten an epwe ámááraatá pwisin an riri ngeni Jiowa me tongei. (Kölf. 73:28) Áwewe chék, a wor eú pwóróus lón ewe lesen are wokisin mi pwári och mettóch usun án Jiowa tong, tipachem, pwúngiéch, are manaman a achchúngú letipom? Kopwe ereni noum we chón káé usun, me ereni pwe ina eú me lein ekkewe chómmóngun popun ka tongei Semach we lón láng. Mei wor pwal och mettóch mi lamot án meinisin chón káé repwe féri pwe repwe feffeitá me papatais.

PESEI AN EPWE FITI EKKEWE MWICH

14. Ifa usun ekkewe pwóróus lón Ipru 10:24, 25 usun ekkewe mwich epwe tongeni álisi emén chón káé le feffeitá?

¹⁴ Kich meinisin sia mochen pwe néúch kewe chón káé repwe feffeitá me papatais. Eú alen ach sipwe álisiir le féri ena, ina ren ach peseer ar repwe fiti án ewe mwichefel kewe mwich. Ekkewe chón afalafal mi lipwákéch ra erá pwe ekkewe chón káé mi mwittir fiti mwich ra mwittir feffeitá. (Kölf. 111:1) Ekkóch chón afalafal ra áweweei ngeni néúr kewe chón káé pwe a wor chómmóng mettóch ra tongeni káé ika repwe fiti ekkewe mwich lap seni met ra káéfengen lón imwer. Álleani Ipru 10:24, 25 ngeni noum we chón káé, me áweweei ngeni álilliséchún an fiti ekkewe mwich. Akkattola ngeni ewe video Met A Fiffis lón ewe Leenien Mwich?f Álisi an epwe achocho an esap etiwaaló ekkewe mwich.

15. Met ka tongeni féri le pesei noum we chón káé an epwe fiffiti mwich iteitan?

¹⁵ Met ka tongeni féri ika noum we chón káé esaamwo fiffiti mwich are ese fiffiti iteitan? Apwóróusa ngeni fán mwasangasang minne ka káé seni eú mwich ka kerán fiti. Lupwen a kúna óm mwasangasangeiti ekkewe mwich, eli epwe pwal mochen fiti. Ngeni Ewe Leenien Mas are ewe Manawach me Ach Angangen Afalafal Minen Káé fán Iten Mwich me áiti ngeni ewe lesen ewe mwichefel epwe káé, me eisini menni kinikin a kon sani. Minne a kúna are rongorong lón ewe mwich a kerán fiti epwe fókkun múrinné seni minne a kúna me rong seni pwal eú fál. (1 Kor. 14:24, 25) Epwe chuuri chókkewe mi isetiw leenien áppirú mi múrinné a tongeni áppirúúr, me repwe álisi le feffeitá me papatais.

16. Met a lamot ekkewe chón afalafal repwe féri le álisi néúr kewe chón káé le feffeitá me papatais, me met sipwe káé lón ewe lesen mwirin ei?

¹⁶ Ifa usun sipwe káé ngeni emén lón ewe napanap epwe álisi le feffeitá me papatais? Sia tongeni álisi emén me emén néúch kewe chón káé le aúcheani ar káé ren ach peseer ar repwe káé iteiten wiik me ren ar ammólnatá eú me eú ar kewe lesen. Sia pwal mochen pesei an epwe fóffós ngeni Jiowa iteiten rán me ámááraatá pwisin an riri ngeni. Sia mochen féri met epwe mwékút ren le fiti án ekkewe mwichefel kewe mwich. (Ppii ewe pwóór itelapan “Minne mi Lamot Ekkewe Chón Káé Repwe Féri pwe Repwe Feffeitá me Papatais.”) Iwe nge, ewe lesen mwirin ei epwe áweweei pwal nimu mettóch ekkewe chón afalafal repwe tongeni féri le álisi néúr kewe chón káé le feffeitá me papatais.