Ifa Usun Kopwe Iótek pwe Kot Epwe Aúseling?

IÓTEK NGENI JIOWA KOT LÓN ITEN JESUS

“Semei epwe ngenikemi meinisin mine oua tüngor fän itei.”​—Johannes 16:23.

Alon Jesus na a wesewesen affata pwe Jiowa a mochen ach sipwe iótek ngeni pwisin i lón iten Jesus, nge sisap iótek ngeni ren álillisin ekkewe lios, aramasepin, chónláng, are ach kewe lewo iir mi fen máló. Atun sia iótek ngeni Kot lón iten Jesus, sia pwári pwe sia weweiti pwe Kot a rong ach kewe iótek pokiten met Jesus a fen féri fán itach. Jesus a erá: “Esap wor eman epwe tongeni feila ren Semei me lüki.”​—Johannes 14:6.

IÓTEK NGENI SENI LETIPOM

“Niinalo masouen letipemi mwen i.”​—Kölfel 62:8, Testament Mi Fö.

Atun sia iótek ngeni Jiowa, mi lamot sipwe fós ngeni usun chék ach fós ngeni emén sam mi tong. Sipwe fen iótek ngeni i fán súfél me seni letipach, lap seni ach chék álleanaawu seni eú puken iótek are apasa chék met sia fen akkamwéchú.

IÓTEKI MET MI TIPEEÚ NGENI LETIPEN KOT

“Are sia tüngor och mine a fich ngeni letipan, a aüselingakich.”​—1 Johannes 5:14.

Lón ewe Paipel, Jiowa Kot a erenikich met epwe féri fán itach me met a mochen ach sipwe féri fan itan. Ika sia mochen pwe ach kewe iótek repwe ketiw me ren, a lamot pwe ach kewe iótek repwe “fich ngeni letipan.” Ren án ach kewe iótek repwe fich ngeni letipan, a lamot ach sipwe káé ewe Paipel pwe sipwe tongeni silefichi Kot. Ika ina, iwe Kot epwe pwapwaiti ach kewe iótek.

MET SIA TONGENI IÓTEKI?

Ióteki Osupwangom Kewe. Sia tongeni iótek ngeni Kot usun osupwangach rán me rán, áwewe chék ren anach, úfach, me imwach. Sia pwal tongeni tingorei Kot an tipachem pwe sipwe tongeni kefiléch me likiitú fán sóssót. Sia tongeni ióteki lúkú, omusomusen ach kewe tipis, me án Kot álillis.​—Lukas 11:3, 4, 13; James 1:5, 17.

Ióteki Ekkewe Ekkóch. Ekkewe sam me in mi tongei néúr kewe ra pwapwa atun néúr kewe ra tongfengen. Pwal ina usun ren Jiowa, a mochen pwe néún kewe wóón fénúfan repwe tongefengeniir. A fich ach sipwe ióteki pwúlúwach, néúch kewe, chón ach famili, me chiechiach kewe. Ewe chón káé James a makkeei: “Iotekifengenikemi.”​—James 5:16.

Iótekin Kilisou. Kot, i ewe Chón Férikich, me ewe Paipel a apasa ei usun i: “Kot a . . . föri ekewe mettoch mi mürina: A fang ngenikemi üt seni läng, pwal kiniemi ua lon fansoun räs, a ngenikemi enemi o aura lelukemi ren pwapwa.” (Föför 14:17) Atun sia ekieki usun ekkewe chómmóngun mettóch Kot a fen féri fán itach, epwe chúng letipach me sipwe mochen pwári ach kilisou ngeni lón iótek. Pwúngún pwe a pwal lamot ach sipwe pwári ach kilisou ngeni Kot ren ach álleasochisi i.​—Kolose 3:15.

MOSONOTTAM ME IKKIÓTEK

Fán ekkóch, eli sipwe letipechou pokiten ese mwittir pélú ach kewe iótek seni enletin letipach. Ika a fis ena, itá a wewe ngeni pwe Kot ese tongekich? Aapw, esap ina weween! Ekieki ekkeei pwóróus mi pwári pwe eli a lamot ach sipwe chék sóssópweló le ikkiótek.

Steve, ewe sia fen fós usun me lepoputáán ei lesen, a pwári meefian ren an erá: “Ika use chék sópweló le ikkiótek, iwe esap wor ai ápilúkúlúkún pwapwasefál.” Nge met a efisi an epwe siwil? A poputá le káé ewe Paipel me a káé lamoten an epwe ikkiótek ngeni Kot. Steve a erá: “Ua iótek ngeni Kot pwe upwe kilisou ngeni ren meinisin ekkewe álillis fán tong ua angei seni chiechiei kewe mi áchengicheng. Iei, ua fókkun pwapwa lap seni me lóóm.”

Ifa usun ren Jenny, ewe mi meefi pwe ese wor aúchean pwe Kot epwe aúseling ngeni? A erá: “Atun ua meefi pwe ese fókkun wor aúcheai, ua fókkun tingormaú ngeni Kot an epwe álisiei le weweiti pwata ua meefi pwe ese wor aúcheai.” Ifa usun an na iótek a álisi? Jenny a erá: “Ai fóffós ngeni Kot a álisiei ai upwe eáni ekiekin usun pwisin ngang, a pwal álisiei ai upwe kúna pwe inaamwo ika letipei a apwúngúei, nge Kot ese apwúngúei. Iótek a pwal álisiei ai usap fangetá, nge upwe chék achocho.” Met mwirilóón? Jenny a erá: “Iótek a álisiei le kúna pwe Jiowa i wesewesen emén Kot mi tong me a chúngúei, i Semei, me Chiechiei epwe ákkálisiei fansoun meinisin ika ua akkachocho le féri minne a mochen.”

Pwal ekieki pwóróusen Isabel. Atun a pwopwo, néún we tokter a ereni pwe epwe fókkun watte terin néún we. A fókkun letipechou. Ekkóch ra pwal mwo nge pesei an epwe atai néún we. A erá: “Ua meefi pwe upwele máló ren weiresin letipei.” Iwe met a féri? A erá: “Ua ikkiótek ngeni Kot ren an álillis.” Ekiseló mwirin, a néúni emén át itán Gerard, nge mi wor terin. Isabel a meefi pwe Kot a pélúweni an kewe iótek? Ewer! Ifa usun? Isabel a erá: “Atun ua kúna nei we, a 14 ierin iei, an pwapwaiti manawan inaamwo ika a wor terin, ua mirititi pwe i pélúwen ai kewe iótek, me nei na, i feiéchúi mi fókkun aúchea seni meinisin me ren Jiowa Kot.”

Ekkena sókkun memmeef ra efisi ach sipwe ekieki usun minne ewe soumakken kélfel a erá: “Ai Samol mi Lapalap, kopwe rong än ekewe mi riaföü tüngor, kopwe apöchöküla leluker o aü selingom ngeni ar siö.” (Kölfel 10:17) A ifan me amwararen ewe popun ach sipwe sópweló le ikkiótek!

A mak lón ewe Paipel chómmóng án Jesus kewe iótek. Ewe mi kon iteféúló, ina ewe a áiti néún kewe chón káé. Met sia tongeni káé seni?