Néún Jiowa Aramas Ra Aúcheani Minne mi Pwúng

1. Met sókkun sóssót Josef a kúna, me met a féri?

A TORI néún Jakop we itan Josef eú sóssót mi áweires. Emén fefin a ereni, “Kopwe kon rei.” Neminna, i pwúlúwen néún we masta itan Potifar. Josef ese mochen féri met ena neminna e mochen. Lón ei fansoun, eli emén epwe ekieki: ‘Pwata Josef a ttii seni ena sóssót?’ Potifar ese nóm lón ena atun. Pwal och, Josef i emén slave lón imwan na, iwe ena fefin epwe fókkun áweiresi manawen Josef ika ese etiwa an na mochen. Iwe nge, Josef ese fókkun etiwa án neminna soun sótuni. Pwata? Iei met Josef a apasa: “Ifa usun, üpwe föri och föför mi fokun ngau o tipis ngeni Kot?”​—Ken. 39:7-12.

2. Pwata Josef a silei pwe án emén lisowu ngeni emén esap pwúlúwan, ina eú tipis ngeni Kot?

² Pwata Josef a silei pwe án emén lisowu ngeni emén esap pwúlúwan, ina eú féffér mi “fokun ngau” mwen mesen an we Kot? Ina epwe rúúepúkú ier mwirin ena, a kerán chék kawor ngeni chón Israel ewe Allúkún Moses, ewe mi nóm ei allúk mi erá, “Kosap lisowu.” (Eks. 20:14) Iwe nge, Josef a silei pwe Jiowa a fókkun oputa án emén lisowu ngeni emén esap pwúlúwan. Áwewe chék, Josef a silei pwe ewe kókkótun pwúpwúlú Jiowa a akkóta, epwe chék lefilen emén mwán me emén fefin. Neman a pwal silei usun ekkewe ruu atun Jiowa a angolong me túmúnú inan we chinnap Sara seni lepéún chókkewe mi mochen kirikiringaw ngeni. Pwal ina usun met Jiowa a féri ngeni pwúlúwen Isaak we itan Repeka, a pwal angolong me túmúnú. (Ken. 2:24; 12:14-20; 20:2-7; 26:6-11) Án Josef ekkekieki ekkena esin pwóróus, a álisi le esilla minne mi pwúng me minne mi mwáál mwen mesen Kot. Pokiten Josef a tongei Jiowa, iwe a tipeppós le féri met ekkewe Jiowa a mochen an epwe féri.

3. Met sipwele káé lón ei lesen?

³ Ka aúcheani minne mi pwúng? Ese mwáál, ewer. Nge oukich meinisin ousise unuséch, ina popun ika sise túmúnúéch, epwe mecheres ach sipwe chék fitaaló án chón ei ótót ekiek usun minne mi pwúng. (Ais. 5:20; Rom 12:2) Iei sipwele ppii weween minne mi pwúng, me ifa usun ach féri minne mi pwúng a tongeni émúrinnéló manawach. Sipwe pwal káé úlúngát mettóch sia tongeni féri epwe álisikich le alapaaló ach aúcheani án Jiowa kewe allúk.

MET WEWEEN MINNE MI PWÚNG?

4. Ifa ewe ekiek mi mwáál chómmóng ra eáni usun pwúng?

⁴ Lón fansoun Jesus we, me ren ekkewe néúwisin lamalam pwe ra féri minne mi pwúng. Iwe nge, Jesus a fókkun apwúngúúr pokiten ra esiita ekkewe ekkóch me fférútá pwisin ar allúk usun minne mi pwúng me minne mi mwáál. (SalAf. 7:16; Luk. 16:15) A pwal ina usun féfférún ekkóch aramas lón ei fansoun. Ra kan erá pwe ese wor met mi mwáál ra féri, nge ra pwisin apwúngaló met mi pwúng me mwáál me rer. Fán chómmóng, ra eingeing, nefótófót wóón mwáállin ekkewe ekkóch are ekieki pwe ra múrinné seniir. Jiowa ese fókkun sani ekkena esin napanap me esap ikkena met a kapachelong lón féfférún pwúng.

5. Met weween pwúng me ren ewe Paipel? Áweweei.

⁵ Pwúng, ina eú napanap mi fókkun múrinné. A wewe ngeni ekkewe mettóch sia féri nge iir mi pwúng mwen mesen Jiowa Kot. Lón ewe Paipel, ekkewe kapas mi afféú ngeni ewe kapas pwúng a menlapei ewe ekiek usun emén mi eáni ewe esin manaw mi tipeeú ngeni án Jiowa kewe allúk. Áwewe chék, lón án Jiowa we allúk a erá pwe ekkewe chón business repwe néúnéú ‘kino mi wenechar.’ (Tut. 25:15, Kapasen God) Ewe popun kapasen Ipru fán iten “wenechar,” a pwal tongeni afféú ngeni “pwúng.” Ina minne, emén Chón Kraist mi mochen an epwe emén mi pwúng mwen mesen Kot, epwe fókkun wenechar lón pekin business. Emén aramas pwúng, ese pwal fókkun sani an kúna án emén féfféringaw ngeni emén. Pwal och, emén aramas pwúng, a “föri mine [Jiowa] epwe pwapwa ren.” Atun epwe eáni eú kefil, a akkomw ekieki meefien Jiowa usun minne epwe filatá.​—Kol. 1:10.

6. Pwata sia tongeni lúkúlúk wóón án Jiowa kewe allúk usun minne mi pwúng me mwáál? (Aisea 55:8, 9)

⁶ Ewe Paipel a áweweei pwe Jiowa i Populapen minne mi pwúng. Ina popun, a iteni “ewe leeni ia pwúng a nónnóm ie.” (Jer. 50:7, NW) Jiowa, i ewe Chón Férikichetá, ina minne i chék a tongeni awora allúk usun minne mi pwúng me minne mi mwáál. Pokiten kich aramas tipis me sise unuséch, iwe sise tongeni silei met mi pwúng me met mi mwáál. Nge Jiowa i mi unuséch, iwe a fókkun silefichi met mi pwúng me met mi mwáál. (SalF. 14:12; álleani Aisea 55:8, 9.) Iwe nge, pokiten i a férikichetá “lon püsin lapalapan,” iwe sia tongeni féri met a apasa pwe mi pwúng. (Ken. 1:27) Me ina met sia pwal mochen féri. Ach tongei Semach na, Jiowa, ina met a amwékútúkich le áppirú i úkúkún ach tufich.​—Ef. 5:1.

7. Pwata a mmen aúchea ekkewe allúk mi núkúchar? Áweweei.

⁷ Sia feiéch seni ach álleasochisi án Jiowa kewe allúk usun minne mi pwúng me minne mi mwáál. En mi silei ika pwata? Anchangei met epwe fis ika eú me eú kompenien construction ra en me pwisin fférútá ar allúk usun kaúkún mettóch. Ena epwe tongeni efisi watteen osukosuk. Pwal och, anchangei met epwe fis ika ekkewe tokter me kangof rese álleasochisi allúkún túmúnún aramas mi semmwen lón eú pioing. Ekkóch néúr kewe patient ra tongeni máló. Ewer, ekkewe allúk mi núkúchar, ra túmúnú aramas. Pwal ina chék usun ren án Kot kewe allúk usun minne mi pwúng me mwáál, ra tongeni túmúnúkich.

8. Ikkefa ekkewe feiéch mi mmólnetá fán iten chókkewe mi féri minne mi pwúng?

⁸ Jiowa a efeiéchú chókkewe mi achocho le etipeeú manawer ngeni an kewe allúk. Iei met a pwonei: “Ekewe chon pwüng repwe fanüeni ewe fanü o nonom won tori feilfeilachök.” (Kölf. 37:29) Ka tongeni anchangei úkúkún tipeeúin, kinamween, me pwapwaan aramas atun iir meinisin repwe álleasochisi án Jiowa kewe allúk? Jiowa a mochen óm kopwe eáni ena esin manaw. Enlet, a wor popun mi múrinné ach sipwe aúcheani minne mi pwúng! Ifa usun sia tongeni alapaaló ach aúcheani ena napanap? Sipwe káé ekkeei úlúngát mettóch sia tongeni féri.

ALAPAALÓ ÓM AÚCHEANI ÁN JIOWA KEWE ALLÚK

9. Met epwe álisikich le aúcheani minne mi pwúng?

⁹ Áeúin: Tongei ewe Emén mi awora ekkewe allúk. Ren ach sipwe aúcheani minne mi pwúng, a lamot ach sipwe alapaaló ach tongei ewe Emén mi awora ekkewe allúk usun minne mi pwúng me minne mi mwáál. Lapólóón ach tongei Jiowa, epwe pwal ina lapólóón ach mochen etipeeú manawach ngeni an kewe allúk mi pwúng. Áwewe chék, ika Atam me Efa ra enletin tongei Jiowa, iwe resap fókkun álleasolapa.​—Ken. 3:1-6, 16-19.

10. Met Apraham a féri pwe epwe lapóló an weweiti án Jiowa ekiek?

¹⁰ Sise fókkun mochen usun Atam me Efa le álleasolapa Jiowa. Sia tongeni ttii senikich ena, ika sipwe sópweló le kákkáé usun i, aúcheani napanapan kewe, me achocho le weweiti an ekiek. Atun sia féri ekkena mettóch, iwe ach tongei Jiowa epwe lallapóló. Áwewe chék ren pwóróus Apraham. I a enletin tongei Jiowa. Inaamwo ika a weires an epwe weweiti minne Jiowa a filatá, nge ese ú ngeni, a fen achocho le alapaaló an silei i. Áwewe chék, atun Apraham a silei pwe Jiowa epwele arosaló Sotom me Komora, a niwokkus ika ena “Souapwüngün unusen fanüfan” epwe nieló ekkewe mi ngaw fiti fengen me ekkewe chón pwúng. Me ren Apraham pwe ese fókkun pwúng ena, ina popun fán tipetekison a eisini Jiowa ekkóch kapas eis. Jiowa a pélúweni an kana kapas eis fán mosonottam. Mwirin, Apraham a mirititi pwe Jiowa a etittina letipen aramas meinisin, me atun epwe apwúngú ekkewe mi tipis, esap fókkun apachaalong leir chókkewe ese wor tipisiir.​—Ken. 18:20-32.

11. Ifa usun Apraham a pwári an tongei Jiowa me lúkúlúk wóón?

¹¹ A fókkun chúng letipen Apraham ren ar pwóróusfengen me Jiowa usun ekkewe telinimw Sotom me Komora. Ese mwáál, ena mettóch a alapaaló an tongei me súféliti Seman na. Fite ier mwirin, a fis och mettóch ngeni Apraham mi fókkun áweiresi an epwe pwári an lúkúlúk wóón Jiowa. Jiowa a mochen an epwe eáni asor néún we mi áchengicheng itan Isaak. Nge iei Apraham a sileéchú an na Kot, ina minne ese wor an tipemwaramwar lón ei atun. A chék álleasochisi minne Jiowa a mochen an epwe féri. Iwe nge, anchangei úkúkún weiresin letipan atun a mmólnetá an epwele eáni asor néún na! Ese mwáál a ekilonei usun met a fen silei usun Jiowa. A silei pwe Jiowa esap fókkun féri och mettóch ese pwúng are kirikiringaw. Me ren aposel Paulus, Apraham a lúkú pwe Jiowa epwe amanawasefáli néún we mi áchengicheng, Isaak. (Ipru 11:17-19) Ren enletin, Jiowa a fen pwonei pwe Isaak epwe semen chón eú mwú, me lón ena atun, esaamwo wor néún Isaak. Apraham a tongei Jiowa, iwe a lúkú pwe Seman na epwe eáni féffér mi pwúng. Ren lúkú, a álleasochis inaamwo ika a weires ngeni.​—Ken. 22:1-12.

12. Ifa usun sia tongeni áppirú Apraham? (Kölfel 73:28)

¹² Ifa usun sia tongeni áppirú Apraham? Sia tongeni áppirú ren ach kákkáé usun Jiowa. Atun sia féri ena, epwe lapóló ach riri ngeni me ach tongei. (Álleani Kölfel 73:28.) Mwelien letipach epwe káit pwe epwe eáni án Jiowa ekiek. (Ipru 5:14) Mwirin, atun emén epwe sótunikich le féri minne mi mwáál, sisap féri. Sisap pwal mwo nge ekiekin féri och mettóch epwe ámeteki letipen Semach we me atai ach riri ngeni. Iwe, ifa usun sia pwal tongeni pwári pwe sia aúcheani minne mi pwúng?

13. Ifa usun sia tongeni achocho le féri minne mi pwúng? (Än Salomon Fos 15:9)

¹³ Oruuan: Achocho le alapaaló óm aúcheani minne mi pwúng iteiten rán. Ika sia mochen an epwe péchékkúl féúichooch, a lamot ach sipwe kan achocho le taiso iteiten rán. Pwal ina chék usun, a lamot ach sipwe achocho le alapaaló ach aúcheani minne mi pwúng me ren Jiowa. Ese pwal weires ach sipwe féri ena iteiten rán. Jiowa ese tichik me esap fókkun erenikich ach sipwe féri och mettóch esap pwák rech. (Kölf. 103:14) A alúkúlúkú ngenikich pwe “a echeni chokewe mi föri mine a pwüng.” (Álleani Än Salomon Fos 15:9.) Ika sia achocho ngeni och mettóch lón án Jiowa angang, sipwe fókkun achocho le tikeri. Pwal ina usun atun sia achocho le féri minne mi pwúng. Jiowa epwe mosonottam lón an álisikich le feffeitá ekis me ekis lón ach féri minne mi pwúng.​—Kölf. 84:5, 7.

14. Met weween ewe chechchen leupw itan “pwüng,” me pwata a lamot ngenikich?

¹⁴ Fán tong, Jiowa a áchchema ngenikich pwe ese áweires ach féri minne mi pwúng. (1 Joh. 5:3) Ach féri minne mi pwúng, ina eú minen túmún, me a lamot ngenikich ena iteiten rán. Ekieki usun ekkewe pisekin maun aposel Paulus a fós usur. (Ef. 6:14-18) Menni leir a túmúnú féún ngasangasen emén soufiu? Ina ewe chechchen leupw itan “pwüng,” ewe mi liosuetá án Jiowa kewe allúk usun minne mi pwúng. Ewe chechchen leupw a kan túmúnú féún ngasangasen emén. Iwe, pwal ina usun ren án Jiowa kewe allúk usun minne mi pwúng, ra tongeni túmúnú letipach, weween alóllóólun ekiekich me meefiach. Ina popun, a lamot ach sipwe apachaalong ewe chechchen leupw itan pwúng lein ach kewe pisekin maun!​—SalF. 4:23.

15. Ifa usun ka tongeni éúféúfa ngonuk ewe chechchen leupw itan pwúng?

¹⁵ Ifa usun ka tongeni éúféúfa ngonuk ewe chechchen leupw itan pwúng? Ka tongeni féri ena ren óm ekieki minne Kot a mochen kopwe féri atun ka eáni kefil iteiten rán. Atun kopwe filatá met kopwe fós usun, met sókkun kél me nikáttik kopwe aúseling ngeni, met sókkun mettóch kopwe katol, are met sókkun puk kopwe állea, kopwe akkomw eisinuk ekkeei kapas eis: ‘Met sókkun mettóch ua mochen amasouaalong lón letipei? Jiowa epwe etiwa ei mettóch? Are, ei mettóch a álisatá féffér mi limengaw, féfférún akkachofesá, tipemmóng, achéchééi pwisin ngang, ekkewe napanap rese pwúng me ren Jiowa?’ (Fil. 4:8) Ika ekkewe kefil ka filatá ra tipeeú ngeni letipen Jiowa, iwe, ka mut ngeni an kewe allúk usun minne mi pwúng ar repwe túmúnú letipom.

16-17. Ifa usun Aisea 48:18 a anúkúnúkú ngenikich pwe sia tongeni álleasochisi án Jiowa kewe allúk tori feilfeiló?

¹⁶ Ka kan lólilen ika kopwe fen tongeni sópweló le álleasochisi án Jiowa kewe allúk usun minne mi pwúng iteiten rán, me pwal lón ekkan ier repwe feito? Ekieki ei kapas áwewe Jiowa a eáni mi mak lón Aisea 48:18. (Álleani.) Jiowa a erá pwe ach pwúng a tongeni “wewe ngeni nomongun lematau.” Anchangei pwe itá ka útá wóón eú beach me kakkatol ekkewe lóó mi kan chék akkatapw. Lón ena atun mi fókkun ekinamwe, kopwe itá lólilen pwe eú rán ekkena lóó repwe kaúló? Aapw! Ka fen silei pwe ren fitengeréú ier a kan chék ikkina usun wóón ena beach, iwe epwe chék fókkun sópwósópwóló le ina usun.

¹⁷ Óm pwúng a tongeni wewe ngeni ekkewe lóó lemataw. Ifa usun? Lupwen a wor eú óm kefil, kopwe akkomw ekieki met Jiowa a mochen, mwirin filatá met kopwe féri. Ese lifilifil úkúkún weiresin ewe kefil kopwe féri, nge Semom we mi tong a chék mmólnetá fansoun meinisin le fang ngonuk péchékkúl me álisuk pwe kopwe chék féfféri minne mi pwúng iteiten rán.​—Ais. 40:29-31.

18. Pwata a lamot ach sisap apwúngú ekkewe ekkóch ren pwisin meefiach usun minne mi pwúng me mwáál?

¹⁸ Aúlúngátin: Mut ngeni Jiowa an epwe wisen filatá ika a pwúng are mwáál minne ekkewe ekkóch ra féri. Atun sia achocho le féri meinisin met Jiowa a mochen, a lamot sisap apépékich ngeni ekkewe ekkóch are ekieki pwe sia múrinné seniir. Ese wor ach pwúúng ach sipwe apwúngaló ika ekkewe ekkóch ra féri met Jiowa a mochen. A lamot ach sipwe chemeni pwe Jiowa i “ewe Souapwüngün unusen fanüfan.” (Ken. 18:25) Jiowa ese ewisa ngenikich ena wis. Nge fen iei met Jesus a allúkú: “Ousap apwüngü aramas, pwe Kot esap apwüngükemi.”​—Mat. 7:1.b

19. Ifa usun Josef a pwári pwe a lúkúlúk wóón án Jiowa kapwúng?

¹⁹ Ekiekisefáli pwóróusen ewe mwán mi pwúng Josef. Ese kan apwúngú ekkewe ekkóch, pwal mwo nge chókkewe mi kirikiringaw ngeni. Pwiin kewe ra kirikiringaw ngeni, améméló pwe epwe slave, me otupu semer we ren ar ereni pwe Josef a máló. Fite ier mwirin, Josef a chuursefáli chón an na famili. Lón ena atun, a emén sounemenem mi watte manan, iwe a tongeni apwúngúchowu pwiin kewe me liwini ngeniir tipisiir. Pwiin Josef kewe ra niwokkus ika epwe ina usun ngeniir inaamwo ika ra fókkun omusomus ngeni ren minne ra féri. Nge Josef a ereniir: “Ousap niuokus, pun ngang üa nom fän nemenien Kot.” (Ken. 37:18-20, 27, 28, 31-35; 50:15-21) Fán tipetekison, Josef a mirititi pwe Jiowa chék a wor an pwúúng le apwúngú pwiin kewe.

20-21. Ifa usun sipwe ttii senikich ewe ekiek pwe sia múrinné seni ekkewe ekkóch?

²⁰ Sipwe áppirú Josef le likit ngeni Jiowa ewe angangen kapwúng. Áwewe chék, sisap ekieki pwe sia silei popun án chienach kewe féri och mettóch. Sise tongeni silei masouen letipen aramas, Jiowa chék a etittina are ‘apwüngü ekiekin letip.’ (SalF. 16:2) Jiowa a tongei sókkun aramas meinisin seni sókkopaten fénú me eéreni, me a pesekich ach sipwe ‘fokun suki letipach.’ (2 Kor. 6:13) Sipwe achocho le tongei meinisin chienach kewe Chón Kraist, nge sisap fen apwúngúúr.

²¹ Sisap pwal apwúngú ekkewe chón lúkún. (1 Tim. 2:3, 4) Kopwe tongeni apwúngú emén aramasom ese lúkú minne ka lúkú, me erá, “Esap fókkun tongeni wiliti emén Chón Pwáraatá Jiowa”? Aapw, pwe ika sia féri ena, iwe sia lamalamtekia me ekieki pwe sia múrinné seni. Jiowa a chúen suuki ngeni “aramas meinisin lon ekewe leni meinisin” fansoun ar repwe aier. (Föf. 17:30) Kopwe chemeni pwe chókkewe iir mi lúkú pwe ra fókkun pwúng lap seni ekkewe ekkóch, fen iir rese pwúng me ren Jiowa.

22. Pwata kopwe úppós le aúcheani minne mi pwúng?

²² Amwo ach aúcheani án Jiowa kewe allúk usun minne mi pwúng epwe alapaaló ach pwapwa me álisikich le isetiw leenien áppirú mi múrinné ngeni ekkewe ekkóch pwe epwe pwal lapóló ar tongekich me tongei Jiowa. Amwo sisap úkútiw le “mochen föri mine a pwüng.” (Mat. 5:6) Kopwe lúkúlúk pwe Jiowa a kúna óm achocho, me fansoun meinisin a pwapwa le kúna óm feffeitá. Atun a lallapóló án chón ei fénúfan féfféri minne ese pwúng, kosap ápilúkúngaw nge kopwe fen chemeni pwe Jiowa a “echeni ekewe chon pwüng.”—Kölf. 146:8.