Áppirú án Jiowa me Jises Ekiek

1-2. Met a kapachelong lón ach tongei Jiowa, me ifa ussun Jises a pwáári pwe a tongei Jiowa ren unusen ekiekin?

JISES a áweweei ewe mettóch mi kon aúchea lón án Kot kewe allúk atun a apasa: “Kopwe tongei Jiowa óm Kot ren unusen letipom me ren unusen manawom me ren unusen péchékkúlom me ren unusen ekiekum.” (Luk 10:27) Ina minne, sia tongei Jiowa ren meinisin met mi wor rech me ren unusen nónnómuch. Weween, a kapachelong mochenich, meefiach, me péchékkúlach. A pwal kapachelong napanapen ach áeá ach tufichin ekiek. Ewer, sise fókkun tongeni unusen weweiti meinisin án Jiowa ekiek. Nge a tongeni lapóló ach weweiti an ekiek iká sipwe kákkáé ussun “án Kraist ekiek” pokiten i a unusen áppirúfichi án Seman na ekiek.—1 Kor. 2:16.

² Jises a tongei Jiowa ren unusen ekiekin. A silei met letipen Kot fán itan me a úppós le etipeeú féfférún ngeni letipan inaamwo iká an féri ena epwe wewe ngeni an epwe kúna riáfféú fán iten minne mi pwúng. Pokiten Jises a nefótófót wóón an apwapwaai Seman we, iwe ese mut ngeni och mettóch lón manawan an epwe aúchea lap seni ena.

3. Met aposel Piter a káé seni Jises, me met a pese ngeni chienan kewe Chón Kraist ar repwe féri? (1 Piter 4:1)

³ Piter me chienan kewe aposel ra feiéch ren ar chiechi ngeni Jises me káé seni napanapen an asukul. Atun Piter a makkeei néún we áeúin taropwe fán emmwenien Kot, a pesei ekkewe Chón Kraist ar repwe pwal ammólneeretá le eáni ekiekin Kraist. (Álleani 1 Piter 4:1.) Lón ewe popun kapas, atun Piter a erá: “Ammólnakemi,” a néúnéú ewe kapas mi áweweei ussun án ekkewe soufiu fán ar pisekin maun mmólnefichitá le maun. Ina minne, iká ekkewe Chón Kraist ra káé le áppirú ekiekin Jises, iwe repwe tufichin pworacho ngeni ar mochen le féri minne ese pwúng me ú ngeni angangen ei fénúfan mi nóm fán nemenien Setan.—2 Kor. 10:​3-5; Efi. 6:12.

4. Ifa ussun ei lesen a tongeni álisikich le apwénúetá án Piter we kapasen pesepes?

⁴ Sipwe etittina án Jises ekiek me ppii ifa ussun sia tongeni áppirú. Sipwe ppii ifa ussun sia tongeni (1) áppirú án Jiowa ekiek, ewe epwe álisikich meinisin ach sipwe tipeeúfengen, (2) tipetekison, me (3) eáni mirit ren ach lúkúlúk wóón Jiowa lón iótek.

ÁPPIRÚ ÁN JIOWA EKIEK

5. Lón eú atun, ifa ussun Piter a pwáári pwe ese eáni án Jiowa ekiek?

⁵ A wor eú atun Piter a pwáári pwe ese eáni án Jiowa ekiek. Jises a fen ereni néún kewe aposel pwe epwe ló Jerusalem, ikewe ekkewe néúwisin lamalam repwe aresini me ie, me epwe kúna riáfféú me ninniiló. (Mat. 16:21) Piter a silei pwe Jises i ewe Messaia mi pwonetiw, ewe epwe angasaaló néún Kot aramas. Iwe nge, eli a weires ngeni Piter an epwe lúkú pwe Jiowa epwe mut ngeni Jises an epwe ninniiló. (Mat. 16:16) Ina minne, Piter a panaló Jises ekis me ereni: “Samol, kosap apasa ena sókkun, ekkena mettóch resap fókkun fis ngonuk.” (Mat. 16:22) Jises me Piter rese tipeeúfengen wóón ena mettóch pokiten Piter ese eáni án Jiowa ekiek.

6. Ifa ussun Jises a pwáári pwe an ekiek a tipeeú ngeni án Jiowa ekiek?

⁶ Án Jises ekiek a unusen tipeeú ngeni án Seman we lón láng ekiek. Jises a ereni Piter: “Feiló lúkúsékúrúi, Setan! En eú minen chepetek ngeniei, pún óm ekiek, esap án Kot ekiek nge án aramas.” (Mat. 16:23) Jises a silei pwe epwe kúna riáfféú me epwe ninniiló ren an féri letipen Jiowa. Ina pwata Jises ese mochen etiwa án Piter we kapasen éúréúr ngeni inaamwo iká eli Piter a mochen álisi. Ena mettóch a áiti ngeni Piter lamoten an epwe achocho le eáni án Kot ekiek. Ina ewe lesen mi aúchea a lamot ach sipwe pwal káé seni.

7. Ifa ussun Piter a pwáári pwe a mochen ekkesiwili an ekiek pwe epwe tipeeú ngeni án Jiowa ekiek? (Ppii ewe sasing.)

⁷ Mwirin och fansoun, Piter a pwáári pwe a mochen káé le eáni án Jiowa ekiek. Ina ewe fansoun án aramasen ekkewe ekkóch mwú repwele kapachelong lein néún Jiowa kewe aramas. Kot a emmweni Piter an epwe afalafal ngeni Kornelius, ewe mi akkomw me lein ekkewe chón lúkún Israel le wiliiti emén Chón Kraist. Ekkewe chón Jus rese kan chiechi ngeni ekkewe chón lúkún Israel, ina pwata a lamot án Piter epwe ekkesiwili an ekiek pwe epwe tongeni afalafal ngeni ekkewe chón lúkún Israel. Iwe atun Piter a mirititi met Kot a mochen epwe féri, a ekkesiwili an ekiek. Ina pwata ‘ese fókkun wor an tipemwárámwár’ atun Kornelius a tingorei an epwe chuuri. (Féf. 10:​28, 29) A afalafal ngeni Kornelius me chón lón imwan we, iwe ra papatais.—Féf. 10:​21-23, 34, 35, 44-48.

8. Ifa ussun sipwe pwáári pwe ach ekiek a tipeeú ngeni án Jiowa ekiek? (1 Piter 3:8)

⁸ Fitu ier mwirin, Piter a pese ngeni chienan kewe Chón Kraist ar repwe “eáni eú chék ekiek.” (Álleani 1 Piter 3:8.) Pokiten kich néún Jiowa aramas, sia kan etipeeú ach ekiek ngeni an ekiek mi affat lón an we Kapas. Áwewe chék, Jises a pesei ekkewe chón tapweló mwirin ar repwe akkomwa ewe Mwúún Kot lón manawer. (Mat. 6:33) Pokiten ena, iwe eli emén lón óm we mwichefel a filaatá an epwe pioneer are angang ngeni Jiowa full-time lón ekkewe pwal ekkóch angang. Iwe a lamot ach sipwe fen eáni kapasen apéchékkúl ngeni me ereni pwe sipwe álisi, nge sisap fen pesei an epwe kútta kinamween manawan.

KOPWE TIPETEKISON

9-10. Ifa ussun Jises a pwáári pwe i mi fókkun tipetekison?

⁹ Lón ewe pwinin me mwen án Jises epwele ninniiló, a áiti ngeni Piter me ekkewe ekkóch aposel eú lesen mi aúchea ussun tipetekison. Me mwen ena, Jises a tiinaaló Piter me Jon ar repwe ammólnatá ekkewe mettóch mi lamot ngeni ewe sáingoon mwéngéén lefááf repwe eáni me mwen an epwe máló. Eli eú me lein ekkewe mettóch ra ammólnatá, ina ewe waspesen me ekkewe taul mi lamot ngeni téttélún pechen ekkewe waséla me mwen ar repwe mwéngé. Nge epwe ié na epwe tipetekison le télú pechen ekkewe ekkóch?

¹⁰ Jises ese tipemwárámwár le féri ena angang. A pwáári pwe i emén mi tipetekison. Ese mwáál, ekkewe aposel ra fókkun máirú ren án Jises féri ena angang ekkewe slave ra kan wisen féri. Jises a pwilitawu úfan kewe úféúfen lúkún, finiti ngeni eché taul lukanapan, alélééi konik ewe waspesen, me poputá le télú pecher kewe. (Jon 13:​4, 5) Eli mi ekis ttam ewe fansoun án Jises télú pechen meinisin ekkewe 12 aposel, kapachelong Jutas, ewe epwele afangemá i. Nge fán tipetekison, Jises a áwesaaló ena angang. Mwirin, fán mosonottam Jises a áweweei ngeniir, a erá: “Oua weweiti met úa féri ngenikemi? Oua kér ngeniei ‘Sense’ me ‘Samol,’ iwe ámi mi pwúng, pún ngang Sense me Samol. Iwe nge, iká ngang, ewe Samol me ewe Sense, úa télú pechemi, ámi oupwe pwal télú pechen emén me emén leimi.”—Jon 13:​12-14.

11. Ifa ussun Piter a pwáári pwe a káé tipetekison? (1 Piter 5:5) (Pwal ppii ewe sasing.)

¹¹ Piter a káé seni án Jises tipetekison. Mwirin án Jises liwiniti láng, Piter a féri eú manaman ren an echikaraatá emén mwán mi pechemá seni leuputiwan. (Féf. 1:​8, 9; 3:​2, 6-8) Eú mwichen aramas ra kúna ena manaman, iwe ra rongeeló Piter. (Féf. 3:11) Nge Piter ese mochen án aramas repwe ingeiti inaamwo iká a mááritá lón eú ééreni ikewe ekkewe aramas ra fókkun sani ar repwe iteféúló. Piter a tipetekison me ereni ekkewe aramas ar repwe mwareiti Jiowa me Jises ren an apasa: ‘Ren iten [Jises] we, me ren ám lúkú lón itan, ei mwán oua kúna me silei a péchékkúletá.’ (Féf. 3:​12-16) Mwirin och fansoun, Piter a mak ngeni ekkewe Chón Kraist ussun lamoten ar repwe tipetekison. Lón ewe popun kapas, a néúnéú ekkewe kapas mi áweweei ussun án emén úféúfolong ewe napanap tipetekison ussun itá nge eché úf. Ena mettóch, a áchchema ngenikich ifa ussun Jises a finiti ngeni lukanapan eché taul me télú pechen néún kewe aposel.—Álleani 1 Piter 5:5.

12. Ifa ussun sia tongeni áppirú Piter me sópweeló le ámááraatá tipetekison?

¹² Sia tongeni áppirú Piter me sópweeló le ámááraatá tipetekison. Chemeni pwe enletin tipetekison esap chék pwá ren kapas. Ewe kapas Piter a néúnéú fán iten “tipetekison,” a pwáári pwe a kapachelong lón tipetekison napanapen ach ekiek ussun pwisinkich me ekkewe ekkóch. Sia angang fán iten ekkewe ekkóch pokiten sia tongei Jiowa me tongei aramas, nge esap pokiten sia mochen án ekkewe ekkóch repwe ingeitikich. Sia pwáári pwe sia enletin tipetekison iká sia pwapwa le angang ngeni Jiowa me angang fán iten chienach kewe Chón Kraist inaamwo iká ekkewe ekkóch rese kúna met sia féri.—Mat. 6:​1-4.

“OUPWE MIRIT”

13. Met weween án emén epwe “mirit”?

¹³ Met weween án emén epwe “mirit”? (1 Pit. 4:7) Emén Chón Kraist mi mirit a achocho úkúúkún an tufich le féri kefil mi múrinné mi pwáári pwe a eáni ekiekin Jiowa. Ena esin aramas a silei pwe ese wor och mettóch mi aúchea epwe lap seni an riri ngeni Jiowa. A eáni ekiek mi múrinné ussun pwisin i, me a mirititi pwe a aúkúk silean. A pwal pwáári pwe a lúkúlúk wóón Kot ren an tittingorei an emmwen lón iótek.

14. Lón eú atun, ifa ussun Piter a pwáári pwe ese lúkúlúk wóón Jiowa?

¹⁴ Lón ewe pwinin me mwen án Jises epwele máló, iei met a ereni néún kewe chón káé: “Ámi meinisin oupwe chepetek lón ei pwinin.” Nge Piter a erá fán lúkúlúk: “Ikáámwo meinisin ekkewe ekkóch repwe chepetek ren met epwele fis ngonuk, ngang úsapw fókkun chepetek!” Lón ena pwinin Jises a éúréúra ekkóch me lein néún kewe chón káé, a erá: “Oupwe chék mammasa me sópweeló le iótek.” (Mat. 26:​31, 33, 41) Iká Piter a álleasochisi ena éúréúr, iwe eli epwe pwora le erá pwe i emén néún Jises chón káé. Iwe nge, a fen amamesini néún na Masta, mwirin a fókkun niamam.—Mat. 26:​69-75.

15. Met a álisi Jises an epwe eáni mirit lón ewe pwinin mwen epwele máló?

¹⁵ Jises a unusen lúkúlúk wóón Jiowa. Inaamwo iká i emén mi unuséch, nge lón ewe pwinin mwen epwele máló a kan iótek fán chómmóng. Ina met a apworai an epwe féri met Jiowa a mochen an epwe féri. (Mat. 26:​39, 42, 44; Jon 18:​4, 5) Iwe ese mwáál, Piter ese fókkun ménúki pwe Jises a iótek fán chómmóng lón ena pwinin.

16. Ifa ussun Piter a pwáári pwe a wiliiti emén mi mirit? (1 Piter 4:7)

¹⁶ Ló, ló, ló, Piter a káé an epwe alapaaló an lúkúlúk wóón Jiowa lón iótek. Mwirin án Jises manawsefál, a alúkúlúkú ngeni Piter me ekkewe pwal ekkóch aposel pwe epwe kawor ngeniir ewe ngún mi fel pwe repwe tongeni afalafala ewe kapas allim. Iwe nge, Jises a ereniir ar repwe witiwit lón Jerusalem tori an epwe fis ena. (Luk 24:49; Féf. 1:​4, 5) Met Piter a féri atun a witiwit? Piter me chienan kewe Chón Kraist ra “sópweeló le ikkiótek.” (Féf. 1:​13, 14) Mwirin, lón néún Piter we áeúin taropwe, a pesei ngeni chienan kewe Chón Kraist ar repwe eáni mirit me lúkúlúk wóón Jiowa lón iótek. (Álleani 1 Piter 4:7.) Piter a káé an epwe lúkúlúk wóón Jiowa me a wiliiti eú úrelapen ewe mwichefel.—Kal. 2:9.

17. Met a lamot ach sipwe kan féfféri? (Pwal ppii ewe sasing.)

¹⁷ Ren ach sipwe eáni mirit, a lamot sipwe ikkiótek ngeni Jiowa iteitan. Kich sia mirititi pwe a lamot ach sipwe kútta emmwen seni Jiowa lón iótek inaamwo iká sia ekieki pwe mi mecheres ach sipwe féri ekkóch mettóch. Ina minne, atun sia féri kefil mi aúchea a fen kon lamot ach sipwe tingor án Jiowa emmwen me lúkúlúk pwe i a silei met mi múrinné ngenikich.

18. Ifa ussun sia tongeni ekkesiwili ach ekiek pwe epwe tipeeú ngeni án Jiowa ekiek?

¹⁸ Sia fókkun kilisou ren án Jiowa férikich lón ewe napanap sia tongeni áppirú napanapan kewe. (Ken. 1:26) Ewer, kich sise tufichin unusen áppirú Jiowa. (Ais. 55:9) Iwe nge, ussun chék Piter, sia mochen sópweeló le kákkáé le eáni án Jiowa ekiek, achocho le tipetekison, me eáni mirit.