Ifa Úkúúkún Aúchean Iten Jiowa me Reom?

1-2. Pwata sia silei pwe iten Jiowa we a fókkun aúchea me ren Jises?

ESE wor och mettóch me lúkún iten Jiowa we a kon aúchea me ren Jises. I ákkáeménún chón penaatá iten Seman we. Sia káé lón ewe lesen mwen ei, pwe Jises a tipemecheres le máló pwe epwe ánnetatá pwe Jiowa i mi pin me meinisin féfférún ra pwúng. (Mark 14:36; Ipru 10:​7-9) Iwe, mwirin án Jises Nemenem Úkúúkún Engéréú Ier, epwe tipemecheres le eliwini ngeni Jiowa unusen an nemenem pún a mochen pwe unusen ewe ling epwe ló ngeni. (1 Kor. 15:​26-28) Meinisin met Jises a féri fán iten Jiowa, ra ánnetatá pwe a fókkun tongei i.

² Jises a feito fénúfan pwe epwe wisen kapas fán ásengesin iten Seman we. (Jon 5:43; 12:13) A esilei ngeni néún kewe chón káé iten Seman we. (Jon 17:​6, 26) Atun a asukula aramas me féri manaman, a affata pwe Jiowa ewe a fang ngeni tipáchem me manaman le féri ekkena mettóch. (Jon 10:25) Ren enletin, Jises a tingorei Jiowa an epwe mammasa néún kewe chón káé ‘fán ásengesin itan we.’ (Jon 17:11) A ffat pwe iten Kot we a kon aúchea me ren Jises lap seni meinisin. Iwe, ifa ussun emén a tongeni erá pwe i néún Kraist chón káé iká ese silei are nénnéúnéú iten Jiowa we?

3. Met sipwele káé lón ei lesen?

³ Pokiten kich Chón Kraist mi enlet, sia áppirú Jises ren ach aúcheani me súféliti iten Jiowa we. (1 Pit. 2:21) Lón ei lesen, sipwe ppii pwata Jiowa a fang itan we ngeni ekkewe chón afalafala ewe “kapas allim ussun ewe Mwú” lón ei fansoun. (Mat. 24:14) Sipwe pwal pwóróusfengen wóón ifa ussun emén me emén kich sipwe aúcheani iten Jiowa we.

EÚ KÚMIIN ARAMAS “FÁN ÁSENGESIN ITAN WE”

4. (a) Ifa ewe angang Jises a ewisa ngeni néún kewe chón káé me mwen an liwiniti láng? (b) Ifa ewe kapas eis sipwele pwóróusfengen wóón?

⁴ Me mwen chék án Jises epwele liwiniti láng, a ereni néún kewe chón káé: “Oupwe angei manaman atun ewe ngún mi fel epwe feito wóómi, me oupwe chón pwáraatá ussui lón Jerusalem, lón unusen Jutia me Sameria, me tori lesopwuchikin fénúfan.” (Féf. 1:8) Ina minne, ewe kapas allim epwele afalafalfeil ekis meinisin, esap chék lón Israel. Ló, ló, ló, a suuk ngeni aramasen mwú meinisin ar repwe wiliiti néún Jises chón káé. (Mat. 28:​19, 20) Nge Jises a apasa: “Oupwe chón pwáraatá ussui.” Mi lamot án ekkena mineféén chón káé repwe silei iten Jiowa we, are repwe chék chón pwáraatá ussun Jises? Minne a mak lón Féffér sópwun 15 epwe álisikich le pélúweni ena kapas eis.

5. Ifa ussun ekkewe aposel me mwán mi ásimaw lón Jerusalem ra pwáári pwe mi lamot án meinisin aramas repwe silei iten Jiowa we? (Pwal ppii ewe sasing.)

⁵ Lón ewe ier 49, ekkewe aposel me ekkewe mwán mi ásimaw lón Jerusalem ra mwichfengen pwe repwe pwóróusfengen wóón iká mi lamot án ekkewe esap iir chón Jus repwe sirikomsais pwe repwe wiliiti Chón Kraist. Lesópwólóón ar na pwóróusfengen, Jemes, pwiin Jises we, a erá: “[Piter] a kerán apwóróusa ngenikich pwe iei Kot a etiwa ekkewe ekkóch mwú, pwe epwe tongeni pwal filaatá aramas seniir fán ásengesin itan we.” Iten ié na Jemes a fós ussun? A aloni alon ewe soufós Amos, me erá: “Ekkewe lusun aramas repwe kútta ngang, Jiowa, seni letiper, iir me meinisin aramasen ekkewe ekkóch mwú, ekkewe aramas mi iteit ren itei we, ngang Jiowa úa apasa ei.” (Féf. 15:​14-18) A lamot án ekkena mineféén chón káé repwe káé ussun Jiowa me repwe pwal ‘iteit ren itan we.’ Weween repwe wisen esilefeili iten Kot we me repwe pwal silleló ren ena it.

6-7. (a) Pwata Jises a feitiw fénúfan? (b) Ifa ewe popun mi kon aúchea án Jises feitiw fénúfan?

⁶ Iten Jises we a wewe ngeni “Jiowa ewe Chón Amanaw,” me Jiowa a néúnéú i le seláni chókkewe mi lúkú i me néún na. Jises a feito fénúfan pwe epwe fangoló manawan fán iten aramas. (Mat. 20:28) An féri ena, a atufichi an epwe musoló ar kewe tipis me kúna manaw esemuch.—Jon 3:16.

⁷ Nge pwata a lamot ewe méén kepich ngeni chón fénúfan? Pokiten minne a fis lón ewe tánipiin Ichen. Ussun met sia fen káé me lón ewe lesen mwen ei, pwe ekkewe popun aramas, Atam me If, ra ú ngeni Jiowa ina minne a péút seniir ar tufichin kúna manaw esemuch. (Ken. 3:​6, 24) Iwe nge, a wor met ewe mi fen kon aúchea lap seni an seláni aramas. Setan a pweni iten Jiowa we. (Ken. 3:​4, 5) Ina minne, a lamot án aramas repwe silei pwe ese wor och mettóch mi mwáál Jiowa a féri me i emén Sam mi tong. Jises i ewe emén mi fókkun fich ngeni an epwe ánnetatá ena pokiten a tupuni Jiowa me féri meinisin met i a mochen an epwe féri.

8. Met a lamot án meinisin chókkewe mi lúkú Jises repwe weweiti?

⁸ A lamot án meinisin néún Jises kewe chón káé, ekkewe chón Jus me chón lúkún Israel, repwe weweiti pwe ar kúna manaw a wesewesen pop seni Semen Jises we, Jiowa Kot. (Jon 17:3) Pwal och, ussun chék Jises, a lamot repwe iteit seni iten Jiowa we. A pwal lamot ar repwe weweiti úkúúkún aúchean ar repwe epinaaló ena it, pún ar kúna manaw a lóngólóng wóón ena. (Féf. 2:​21, 22) Ina minne, a lamot án meinisin chókkewe mi túppwél le tapweló mwirin Jises repwe káé ussun Jiowa me pwal Jises. Sia tongeni weweiti pwata iwe Jises a asopwaló an we iótek lón Jon sópwun 17 ren ekkeei kapas: “Úa fen esilei ngeniir itom we me úpwe sópweeló le esilei, pwe ewe tong ka tongeei ren, epwe pwal nóm rer me ngang úpwe tipeeú ngeniir.”—Jon 17:26.

“ÄMI NEI CHON PWÄRÄTÄ”

9. Ifa ussun sia tongeni pwáári pwe a aúchea me rech iten Jiowa we?

⁹ Seni met sia fen káé, a ffat pwe ren ach sipwe tapweló mwirin Jises, a lamot ach sipwe epinaaló iten Jiowa we. (Mat. 6:​9, 10) A lamot pwe iten Jiowa na epwe ina ewe it mi fókkun aúchea me rech, me sipwe pwáári pwe ina meefiach ussun ena it. Iwe, met sia tongeni féri pwe sipwe epinaaló iten Jiowa me ánnetatá pwe ese pwúng minne Setan a apasa ussun Jiowa?

10. Pwóróusen met ewe a nóm lón Aisea sópwun 42 ngeni 44? (Aisea 43:9; 44:​7-9) (Pwal ppii ewe sasing.)

¹⁰ Lón Aisea sópwun 42 ngeni 44, sia káé ussun met sia tongeni féri pwe sipwe epinaaló iten Jiowa we. Lón ekkena sópwun, Jiowa a ereni ekkewe aramas rese fel ngeni ar repwe ánnetatá iká ar kewe kot, iir wesewesen Kot. Ussun chék met a kan fis lón eú imwen kapwúng, Jiowa a pwal eis iká a wor chón pwáraatá mi tongeni ánnetatá ena. Iwe nge, ese fókkun wor ié a tongeni ánneta!—Álleani Aisea 43:9; 44:​7-9.

11. Met Jiowa a ereni néún kewe aramas lón Aisea 43:​10-12?

¹¹ Álleani Aisea 43:​10-12. Iei met Jiowa a ereni néún kewe aramas: “Ämi oua nei chon pwärätä. . . . Ngang ewe Samol mi Lapalap.” Jiowa a eisiniir: “Ifa usun, a wor eman Kot lüki?” (Ais. 44:8) Ina minne, a nóm rech eú feiéch mi lap ach sipwe pélúweni ena kapas eis. Sia ánnetatá ren ach kapas me féffér pwe Jiowa i chék ewe Kot mi enlet. Itan we a tekia lap seni it meinisin. Sia pwáári pwe sia enletin tongei me túppwél ngeni ren ifa ussun sia áeá manawach inaamwo iká Setan a sótun éúkúkichetiw seni ach féri ena. Ach féri ena, a suuki alen ach sipwe álisaatá pinilóón itan we.

12. Ifa ussun a pwénútá ewe oesini lón Aisea 40:​3, 5?

¹² Atun sia peni are eitéchú iten Jiowa we, sia áppirú Jises Kraist. Aisea a pwal osuni pwe emén epwe “amolätä alen ewe Samol mi Lapalap.” (Ais. 40:3) Ifa ussun a pwénúetá ena? Jon ewe Chón Papatais a ammólnatá ewe al fán iten Jises, ewe emén epwe feito fán ásengesin iten Jiowa we me wisen kapas fán ásengesin ena it. (Mat. 3:3; Mark 1:​2-4; Luk 3:​3-6) Ena oesini a pwal apasa: “Lingen ewe Samol mi Lapalap epwe pwäpwäla.” (Ais. 40:5) Nge ifa ussun a fis ena? A fis atun Jises a fókkun áppirúfichi Jiowa atun a feito fénúfan pwe ussun itá nge pwisin Jiowa nge a feito fénúfan.—Jon 12:45.

13. Ifa ussun sia tongeni áppirú Jises?

¹³ Kich néún Jiowa chón pwáraatá, ussun chék Jises. Sia uwei iten Jiowa we me esilei an kewe angang mi amwarar ngeni meinisin chókkewe sia chuuriir. Nge ren ach sipwe emén néún Jiowa chón pwáraatá mi múrinné, a lamot ach sipwe esile ngeni ekkewe ekkóch ussun wisen Jises mi aúchea lón an epinaaló iten Jiowa. (Féf. 1:8) Jises, i ewe ákkáeménún Chón Pwáraatá ussun Jiowa, me sia áppirú met a féfféri. (Pwár. 1:5) Nge, epwe ifa úkúúkún aúchean iten Jiowa me ren emén me emén kich?

ÚKÚÚKÚN AÚCHEAN ITEN JIOWA ME RECH

14. Itá epwe ifa meefiach ussun iten Jiowa we me ren met a mak lón Kölfel 105:3?

¹⁴ Sia fókkun ingemwareiti iten Jiowa we. (Álleani Kölfel 105:3.) Jiowa a fókkun pwapwa atun sia einga ngeni ekkewe ekkóch ussun i. (Jer. 9:​23, 24; 1 Kor. 1:31; 2 Kor. 10:17) Ach “eingeing wóón Jiowa,” a wewe ngeni pwe sia pwapwa le ereni aramas pwe i ach Kot. Sia meefi pwe a eú feiéch ach ésúúfélú itan we me álisaatá itéchún. Sisap fókkun sáw le ereni chienach kewe chón angang, chón sukul, chón óruch, me ekkewe pwal ekkóch pwe kich Chón Pwáraatá Jiowa. Ewe Tefil a mochen ach sipwe úkútiw le áiti ngeni aramas iten Jiowa we. (Jer. 11:21; Pwár. 12:17) Ren enletin, Setan me chókkewe mi achéwú an kewe kapas mi chofona, ra mochen án aramas repwe ménúkaaló iten Jiowa we. (Jer. 23:​26, 27) Nge, pokiten sia aúcheani iten Jiowa na, iwe, sia mochen ellingaaló “iteiten rän.”—Kölf. 5:11; 89:16.

15. Met weween ach kékkéri iten Jiowa we?

¹⁵ Sia sópweeló le kékkéri iten Jiowa we. (Sow. 2:32; Rom 10:​13, 14) Ach kékkéri iten Jiowa na, ese chék wewe ngeni ach sipwe sissilei itan na me nénnéúnéú. Sia sissileeló pwe Jiowa i emén Kot mi wor ren memmeef me napanap, me sia tongeni ririéch ngeni, lúkúlúk wóón, me kútta emmwen me álillis seni. (Kölf. 20:7; 99:6; 116:4; 145:18) Sia pwal esilei ngeni aramas itan we me napanapan kewe. Sia álisiir le siwili manawer pwe repwe tongeni apwapwaai Kot me kúna manaw.—Ais. 12:4; Féf. 2:​21, 38.

16. Ifa ussun sia tongeni ánnetatá pwe Setan i emén chón kapas chofona?

¹⁶ Sia tipemecheres le kúna riáfféú fán ásengesin iten Jiowa we. (Jem. 5:​10, 11) Atun sia akkamwéchú ach túppwél ngeni Jiowa fán weires, sia ánnetatá pwe Setan i emén chón kapas chofona. Lón fansoun Jop we, iei met Setan a apasa ussun chókkewe mi angang ngeni Jiowa: “Eman aramas epwe fangala meinisin mine a eäni fän iten manauan.” (Hiop 2:4) Ussun itá weween alon Setan na pwe aramas repwe chék angang ngeni Jiowa lón fansoun mi mecheres, nge atun repwe nóm lón weires, repwe likitaaló i. Iwe, Jop a ánnetatá pwe ese fókkun pwúng ena! Lón ei fansoun, sia pwal tongeni ánnetatá pwe pwal mwo nge atun manawach epwe fókkun áweires are Setan epwe sótun elichippúngúkich, sisap fókkun úkútiw le angang ngeni Jiowa. Sia unusen lúkúlúk pwe Jiowa epwe túmúnúkich fán ásengesin itan we.—Jon 17:11.

17. Ifa pwal alen ach sipwe ellingaaló iten Jiowa we ussun met 1 Piter 2:12 a apasa?

¹⁷ Sia súféliti iten Jiowa we. (SalF. 30:9; Jer. 7:​8-11) Pokiten aramas ra silei pwe kich Chón Pwáraatá Jiowa, iwe minne sia féri a tongeni eitéchú are eitengawa itan na. (Álleani 1 Piter 2:12.) Ina minne, sia mochen achocho úkúúkún ach tufich le mwareiti Jiowa lón ach kapas me féffér. Iká ina, iwe sipwe ellingaaló itan úkúúkún ach tongeni inaamwo sise unuséch.

18. Pwal ifa alen ach sipwe pwáári ach aúcheani iten Jiowa we? (Pwal ppii ewe footnote.)

¹⁸ Sia kon chúngú itéchún Jiowa lap seni pwisin itéchúch. (Kölf. 138:2) Pwata a fókkun lamot ena? Pún ach aúcheani iten Jiowa we, a tongeni efisi án aramas repwe eitengawakich.a Jises a tipemecheres le mááli eú máló mi assaw ussun emén chón atai allúk ren an epwe ellingaaló Jiowa. I “ese ekieki ássáwan,” weween ese pwal aúreki met aramas repwe ekieki ussun. (Ipru 12:​2-4) A chék nefótófót wóón an féri letipen Kot.—Mat. 26:39.

19. Met meefiom ussun iten Jiowa we, me pwata?

¹⁹ Sia pwapwa ren án aramas silei pwe kich chón angang ngeni Jiowa, me sia aúcheani ach iteni Chón Pwáraatá Jiowa. Pokiten ena, iwe sia tipemecheres le likiitú fán ese lifilifil sókkun esiit sipwe kúna. Iten Jiowa a fókkun aúchea me rech lap seni pwal mwo nge pwisin itéchúch. Ina minne, sipwe tipeppós le sópweeló ach ellingaaló iten Jiowa we inaamwo iká Setan a achocho le elichippúngúkich. Iká sia féri ena, sipwe ánnetatá pwe iten Jiowa we a fókkun aúchea me rech ussun chék aúchean me ren Jises Kraist.