Ekkewe Pwóróus Ka Silei Atun Ka Kerán Poputá Káé Paipel Ra Chúen Álilliséch Ngonuk?

1. Ifa ussun ekkewe mettóch ka silei atun ka kerán poputá káé Paipel a ekkesiwili manawom?

EKKEWE mettóch sia káé atun sia kerán poputá káé Paipel ra ekkesiwili manawach. Áwewe chék, atun sia silei pwe iten Kot Jiowa, sia poputá le wiliiti chiechian. (Ais. 42:8) Lupwen sia silei ewe enlet ussun ekkewe mi máló, sise chúen ekieki iká attongeach kewe mi máló ra riáfféú. (SalAf. 9:10) Me atun sia káé ussun án Kot pwon ussun ewe Paratis wóón fénúfan, sise chúen lólilen ussun met epwe fis lón mwachkkan. Sia lúkúlúk pwe sia tongeni manaw tori feilfeiló, esap chék ren fansoun mwochomwoch, 70 are 80 ier.—Kölf. 37:29; 90:10.

2. Ifa ussun 2 Piter 1:​12, 13 a áiti ngenikich pwe pwal mwo ekkewe Chón Kraist mi ásimaw ra tongeni kúna feiéch seni ar ekieki ussun ekkewe mettóch ra fen káé seni Paipel?

² A lamot sisap fókkun ménúki úkúúkún aúchean ekkewe mettóch sia káé atun sia kerán poputá káé Paipel. Lón néún aposel Piter we oruuen taropwe, a mak ngeni ekkewe Chón Kraist mi “núkúchar lón ewe enlet.” (Álleani 2 Piter 1:​12, 13.) Iwe nge, lón ena atun a wor aramas mi ngaw lón ewe mwichefel iir mi mochen okulluur seni ewe enlet. (2 Pit. 2:​1-3) Piter a mochen apéchékkúla chienan kena Chón Kraist pwe repwe túmúnúúr seni ekkewe asukul mi chofona ekkena aramas ra eáni. Ina minne, a áchchema ngeniir ekkóch ekkewe mettóch ra fen káé ussur. Ekkena mettóch ra tongeni álisiir le akkamwéchú ar túppwél ngeni Jiowa.

3. Áweweei pwata a lamot án meinisin Chón Kraist repwe sópweeló le ekilonei ekkewe mettóch ra káé ewe atun ra kerán poputá káé Paipel.

³ Inaamwo iká sia fen nóm lón ewe enlet ren langattam fansoun, nge sia chúen tongeni kúna feiéch seni ekkewe mettóch sia káé seni Paipel atun sia kerán poputá káé. Áwewe chék, emén inelap mi fókkun angéch kuk me néún we nengngin ra kuku eú sókkun supw, nge eli mi chék taitap ekkewe nofitin mwéngé ra áeá. Iwe nge, ló, ló, ló, ena inelap a silei ifa ussun epwe áeá ekkena nofitin mwéngé le féri pwal eú sókkun mineféén mwéngé mi anné. A pwal ina ussun ren néún Jiowa kewe chón angang mi angang ngeni ren fansoun langattam me ekkewe mineféén chón káé, eli ra tongeni káé lesen mi sókkofesen seni eú chék wokisin. Pwata? Pún nónnómuch me met sia féri lón ach angang ngeni Jiowa, eli a siwil seni ewe atun sia kerán papatais. Atun sia ekieki ussun ekkewe mettóch sia káé me lóóm, sia tongeni kúna pwal ekkóch alen ar álisikich lón ei fansoun. Iei sipwele ppii met ekkewe Chón Kraist mi ásimaw ra tongeni káé seni ekkewe úlúngát mettóch ra káé ewe atun ra kerán poputá káé Paipel.

JIOWA I EWE CHÓN FÉRAATÁ

4. Ach silei pwe Jiowa i ewe Chón Féraatá, met a atoto ngenikich?

⁴ Sia silei pwe fénúfan me masouan férien emén Chón Féraatá mi tipáchem me manaman. Paipel a apasa: “Ewe Chón Féraatá mettóch meinisin, ina i Kot.” (Ipru 3:4) Nge mi chómmóng met sia tongeni káé seni ena wokisin. Pokiten Jiowa a férikich, iwe a silei mettóch meinisin ussuch. A pwal tongekich me a silei met epwe échitikich. Iwe, ach silei pwe Jiowa i ewe Chón Féraatá, a ekkesiwili manawach lón sókkopaten napanap mi amwarar, me a pwal awora ngenikich popun manawach.

5. Ifa ewe pwóróus mi enlet mi tongeni álisikich le ámááraatá tipetekison? (Aisea 45:​9-12)

⁵ Ewe pwóróus mi enlet pwe Jiowa i ewe Chón Féraatá, a tongeni áiti ngenikich eú lesen ussun tipetekison. Mwirin án Jop kon nefótófót wóón pwisin i me ekkewe ekkóch, Jiowa a áchchema ngeni pwe i ewe Chón Féraatá mi unusen manaman. (Hiop 38:​1-4) Ena mettóch a álisi Jop le weweiti pwe meinisin met Jiowa a féri a pwúng fansoun meinisin. Iei met ewe soufós Aisea a makkeei mwirin ussun ena mettóch: “Ifa usun, ewe pwül epwe aisini ewe mi angang won, ‘Met ka föri?’”—Álleani Aisea 45:​9-12.

6. Ineet atun epwe kon lamot ach sipwe ekieki úkúúkún tipáchemen me manamanen ewe Chón Férikichetá? (Pwal ppii ekkewe sasing.)

⁶ Iká emén a angang ngeni Jiowa ren fite fite ier, a tongeni poputá le kon lúkúlúkú pwisin an ekiek lap seni an kútta emmwen seni Jiowa me an we Kapas. (Hiop 37:​23, 24) Nge met epwe fis iká emén a ekilonei úkúúkún tipáchemen me manamanen ewe Chón Féraatá? (Ais. 40:22; 55:​8, 9) Ena mettóch a tongeni álisi le tipetekison me mirititi pwe a kon aúchea ekiekin Jiowa lap seni pwisin an ekiek.

7. Met Rahela a féri pwe epwe fiti eú mineféén siwil?

⁷ Rahela, ewe mi nóm Slovenia, a kúna pwe an ekieki ussun ewe Chón Féraatá a álisi an epwe fiti eú siwil mi fis lón ach mwicheich. A erá: “Fán ekkóch, ese mecheres ái úpwe fiti ekkewe kefil chókkewe mi wisen emmwenikich ra apwúngaló. Áwewe chék, pwal mwo nge mwirin ái katol ewe 2023 Governing Body Update #8, úa chúen máirú lón ewe áeúin atun úa kúna ewe chón eáni afalafal mi ttam enisan. Ina popun úa iótek ngeni Jiowa an epwe álisiei le éérenaaló ei siwil.” Rahela a mirititi pwe pokiten Jiowa i ewe Chón Féraatá, iwe fansoun meinisin a silei ifa ussun epwe emmweni an we mwicheich lón ewe napanap mi fókkun múrinné. Iká a weires ngonuk óm kopwe fiti eú mineféén áwewe are etiwa eú mineféén emmwen, pwata kese awora fansoun le ekilonei úkúúkún tipáchemen me manamanen ewe Chón Férikichetá?—Rom 11:​33-36.

POPUN ÁN KOT MUTATÁ RIÁFFÉÚ

8. Pwata ach silei ewe popun Jiowa a mutatá riáfféú a álilliséch ngenikich?

⁸ Pwata Kot a mutatá riáfféú? Ekkóch chókkewe rese silei pélúwen ena kapas eis ra song ren Kot are ekieki pwe ese fókkun wor Kot. (SalF. 19:3) Nge en ka fen káé pwe aramas ra riáfféú me máló pokiten iir chón tipis me rese unuséch, nge esap pokiten Jiowa a efisi riáfféú. Ka pwal káé pwe án Jiowa mosonottam ngeni aramas a atufichi án fite million repwe silei i me káé ifa ussun epwe amóeló riáfféú. (2 Pit. 3:​9, 15) Ekkena pwóróus mi enlet, ra anúkúnúkuk me eririéchuk ngeni i.

9. Ineet atun epwe kon lamot ach sipwe ekilon wóón ekkewe popun Jiowa a mutatá riáfféú?

⁹ Atun sia witiwiti án Jiowa epwe amóeló riáfféú, a lamot sipwe mosonottam. Iwe nge, atun kich are chón ach famili sia kúna weires are pwúngúngaw, eli sipwe song atun sia ekieki iká pwata Jiowa ese mwittir aúkatiw riáfféú. (Ap. 1:​2, 3) Lón ekkena atun, eú alen tipáchem ach sipwe ekilonei ekkewe popun pwata Jiowa a mut ngeni aramas mi pwúng ar repwe kúna riáfféú.a (Kölf. 34:19) Sia pwal tongeni ekilonei an fókkun mochen amóeló riáfféú tori feilfeiló.

10. Met a álisi Anne an epwe likiitú mwirin málóón inan we?

¹⁰ Ewe pwóróus mi enlet ussun riáfféú a tongeni álisikich ach sipwe likiitú. Anne, a nóm lón ewe leeni itan Mayotte, lón Indian Ocean, a erá: “Málóón inei we fitu ier a ló, a efisi ái úpwe fókkun letipechou. Iwe nge, úa kan ákkáchema ngeniei iteitan pwe esap efisien Jiowa ekkewe riáfféú. I a fókkun mochen amóeló sókkun riáfféú meinisin me amanawasefáli attongeach kewe mi máló. Ái ekilonei ekkena pwóróus mi enlet, a atoto kinamween letipei me ekieki.”

11. Pwata ach silei popun án Jiowa mutatá riáfféú a álisikich le sópweeló le afalafal?

¹¹ Ach silei ewe enlet ussun popun Kot a mutatá riáfféú, a tongeni álisikich le mochen sópweeló ach angangen afalafal. Mwirin án Piter áweweei pwe Jiowa a mosonottam pún a mochen án aramas repwe áier me kúna manaw, a pwal apasa: “Oupwe ekieki met sókkun aramas oupwe ussuni. Oupwe eáni féffér mi pin me pwáári lón ámi angang pwe oua túppwél ngeni Kot.” (2 Pit. 3:11) Eú me lein ekkewe angang sia féri mi pwáári ach “túppwél ngeni Kot,” ina ach angangen afalafal. Sia tongei aramas, ussun chék Semach we. Sia mochen ar repwe manaw lón án Kot we ótót mi pwúng. Jiowa a mosonottam le suuki ngeni aramasen lón leeniom we alen ar repwe fel ngeni i. A ifa me watteen feiéchum ren óm chieneni Kot le angang me álisi chómmóng aramas le káé ussun i me mwen warotoon ewe sópwólóón!—1 Kor. 3:9.

SIA MANAW LÓN “EKKEWE RÁNIN LESÓPWÓLÓÓN”

12. Pwata ach silei pwe sia nóm lón “ekkewe ránin lesópwólóón” a álilliséch ngenikich?

¹² Ewe Paipel a affataéchú ngenikich met napanapen aramas lón “ekkewe ránin lesópwólóón.” (2 Tim. 3:​1-5) Lupwen sia kúna napanapen ekkewe aramas mi nóm óruch, sia tongeni kúna pwúngún met Paipel a apasa. Atun sia kúna pwe napanapen aramas a ngangngawoló, a lapóló ach lúkú pwe án Kot we Kapas mi alúkúlúk.—2 Tim. 3:​13-15.

13. Ifa ussun án Jises ei kapas áwewe lón Luk 12:​15-21, a tongeni álisikich?

¹³ Ach silei pwe sia manaw lón ekkewe ránin lesópwólóón a pwal álisikich le nefótófót wóón ekkewe mettóch mi fókkun aúchea. Sia tongeni silei pwata a lamot ach sipwe féri ena seni ach káé án Jises ei kapas áwewe lón Luk 12:​15-21. (Álleani.) Pwata ewe mwán mi pisekisek “ese mirit”? Esap pokiten án ena mwán pisekisek, nge pokiten an akkomwa met ese kon aúchea. A iseis “wéú fán pwisin itan nge ese pisekisek me ren Kot.” A mwáál án ena mwán áeá an fansoun pún ekiseló chék epwele máló. Iei met Kot a ereni: “Lón ei pwinin repwe angei sonuk manawom.” Ifa ussun ena pwóróus a tongeni álisikich lón ach ei fansoun? A fókkun arapoto ewe sópwólóón, ina minne a mmen éch ach sipwe pwisin eisinikich: ‘Minne úa achocho ngeni a pwáári pwe úa nefótófót wóón met mi kon aúchea? Met sókkun mettóch úa álisi nei kewe ar repwe achocho ngeni? Úa áeá ái péchékkúl, ái fansoun, me tufichi lón pekin áion le alapaaló wéú fán pwisin itei are iseis wéú fán iten lón láng?’

14. Ifa ussun pwóróusen Miki a álisikich le kúna lamoten ach sipwe chemeni pwe sia nóm lón ekkewe ránin lesópwólóón?

¹⁴ Atun sia ekiekiéchú ussun ewe pwóróus pwe sia wesewesen nóm lón ekkewe ránin lesópwólóón, a tongeni álisikich le silei met sókkun kefil sipwe eáni. Ina met a fis ngeni emén Chón Kraist itan Miki. A erá: “Atun úa sochungio seni high school, úa fókkun mochen eáni eú angang mi suuki ngeniei ái úpwe káé pwóróusen ekkewe man. Úa pwal mochen wiliiti emén regular pioneer me mwékút ngeni ikewe mi osupwangen chón afalafal ie. Chienei kewe mi ásimaw ra peseei ái úpwe ekiekiéchú iká mi tufich ái úpwe eáni ena sókkun angang me pwal fiti angangen pioneer are mwékút ngeni ikewe mi osupwangen chón afalafal. Ra áchchema ngeniei pwe a arapakkan sópwólóón ei ótót. Nge ra pwal áchchema ngeniei pwe lón ewe ótót séfé, úa tongeni káé pwóróusen ekkewe man úkúúkún ái mochen. Ina minne, úa filaatá ái úpwe angei ewe course lón sukul ese ttam ewe fansoun ái úpwe fiti, nge mi álilliséch. Ena a atufichiei ái úpwe eáni eú angang mi álisaatá ái angangen pioneer me mwirin mwékút ngeni Ecuador, ikewe mi osupwangen chón afalafal ie.” Iei, Miki me pwúlúwan we ra fiti ewe angangen sáifetál lón ena leeni.

15. Ifa ussun pwóróusen Jemes a álisikich le kúna lamoten ach sisap fangetá wóón chókkewe resaamwo mochen aúseling ngeni ewe kapas allim? (Pwal ppii ekkewe sasing.)

¹⁵ Iká aramas rese mochen aúseling ngeni ewe kapas allim, sisap letipengaw. Aramas ra tongeni siwil. Áwewe chék ren pwiin Jises we itan Jemes. I a kúna án Jises mááritá, an wiliiti ewe Messaia, me an asukul ese wor emén aramas a tufichin eáni. Iwe nge, ren fansoun langattam, Jemes ese tapweló mwirin i. A chék kerán wiliiti emén chón káé mwirin án Jises manawsefál, me a wiliiti emén chón káé mi tinikken.b (Jon 7:5; Kal. 2:9) A fókkun lamot óm kosap fangetá wóón aramasom kewe resaamwo mochen káé ewe Paipel me kopwe afalafalsefál ngeni chókkewe rese mochen aúseling ngonuk me mwan. Kopwe chemeni pwe sia nóm lón ekkewe ránin lesópwólóón, ina popun ach angangen afalafal a atapwalapwal. Minne ka apasa ngeniir lón ei fansoun a tongeni amwékútúúr lón ekkan rán, eli pwal mwo nge mwirin poputáán ewe riáfféú mi lapalap.c

SÓPWEELÓ ÓM KILISOU REN ÁN JIOWA MINEN ÁCHCHEM

16. Ifa ussun ka kúna feiéch seni án Jiowa kewe kapasen áchchem? (Pwal ppii ewe pwóór “Néúnéú le Álisi Aramas.”)

¹⁶ Ekkóch me lein ekkewe mettóch mi kawor seni ach we mwicheich, ra ffér fán iten chókkewe rese kon silei Paipel. Áwewe chék, ewe afalafal fán iten aramas meinisin iteiten wiik, ekkóch ekkewe lesen me video wóón jw.org, me néúch kewe Leenien Mas fán iten aramas meinisin, ra ákkáeúin ffér fán iten ekkewe aramas esap iir Chón Pwáraatá. Iwe nge, pwal mwo kich sia kúna feiéch seni ekkena minen áchchem. Ra apéchékkúlaló ach tongei Jiowa, alapaaló ach lúkú an we Kapas, me álisikich le lipwákéchúló lón ach asukula aramas ewe Paipel.—Kölf. 19:7.

17. Ineet atun eli kopwe ekieki ussun ekkewe mettóch ka káé lón ewe atun ka kerán poputá káé Paipel?

¹⁷ Pokiten kich Chón Pwáraatá Jiowa, sia fókkun pwapwa atun a ffatoló ach weweiti eú pwóróus lón Paipel. Iwe nge, sipwe pwal fókkun kilisou ren ekkewe pwóróus mi enlet sia káé lón ewe atun sia kerán poputá káé Paipel me álisikich le ririéch ngeni Jiowa. Iká sia ekiekin péchéúló wóón pwisin meefiach lap seni ach álleasochisi emmwenien án Jiowa mwicheich, fán tipetekison sipwe chemeni ewe emén mi wisen emmweni ena mwicheich, ewe Chón Féraatá mi unusen manaman me tipáchem. Lupwen kich are chón ach famili sia nóm lón riáfféú, sia tongeni mosonottam me ekilonei popun án Jiowa mutatá riáfféú. Me atun sipwe filaatá ifa ussun sipwe áeá ach fansoun me tufichich lón pekin áion, sipwe chemeni pwe sia nóm lón ekkeei ránin lesópwólóón me ese chúen watte ewe lusun fansoun mwen warotoon ewe sópwólóón. Amwo án Jiowa kapasen áchchem epwe sópweeló le etipáchemakich, me álisikich le sópweeló ach angang ngeni fán túppwél.