Ka Tipemecheres le Witiwit fán Mosonottam?

1, 2. (a) Met a tongeni efisi ach eis: “Ifa úkúkún fansoun?” (b) Pwata pwóróusen ekkewe aramas mi tuppwél me lóóm a tongeni apéchékkúlakich ikenái?

“IFA ükükün fansoun?” Ina án ekkewe soufós mi tuppwél Aisea me Apakuk kapas eis. (Ais. 6:11; Ap. 1:2) Lupwen King Tafit a makkeei Kölfel 13, a pwal eáni ena kapas eis fán nimu. (Kölf. 13:1, 2) Me lupwen Jesus Kraist a nóm lein ekkewe aramas ese wor ar lúkú, a erá: “Ifa ükükün fansoun?” (Mat. 17:17) Neman sia pwal eáni ena esin kapas eis fán ekkóch.

² Met a tongeni efisi ach sipwe eis: “Ifa úkúkún fansoun?” Neman och mettóch ese pwúng a fis ngenikich. Are neman sia semmwen are chinnapeló. Neman sia aúrek pokiten sia manaw lón ei “fansoun weires.” (2 Tim. 3:1) Are neman án aramas ekiek mi mwáál a epekkusukich me elichippúngúkich. Ese lifilifil popun, nge sia péchékkúletá ren ach silei pwe Jiowa ese apwúngú néún kewe aramas mi tuppwél mi eáni ena kapas eis me lóóm.

3. Met a tongeni álisikich lupwen sia nóm fán weires?

³ Met a tongeni álisikich lupwen a fis ngenikich och mettóch mi weires ach sipwe likiitú fan? Iei met pwiin Jesus we James a makkeei fán emmwenien án Kot manaman mi fel: “Ämi pwii kana, oupwe mosonotam tori ach Samol epwe war.” (Jas. 5:7) Iwe, a lamot ngenikich meinisin ach sipwe mosonottam. Nge met weween mosonottam, me ifa usun sia tongeni pwáraatá ena napanap mi múrinné?

MET WEWEEN MOSONOTTAM?

4, 5. (a) Met weween mosonottam, me ifa usun sia tongeni mosonottam? (b) Ifa usun James a áweweei mosonottam? (Ppii ewe sasing lepoputáán ei lesen.)

⁴ Ewe Paipel a erá pwe mosonottam a pop seni án Kot we manaman mi fel. Ika ese wor án Kot álillis, iwe epwe weires ngeni aramas rese unuséch ar repwe mosonottam fán weires. Mosonottam, ina eú liffang seni Kot, me sia pwári ach tong fán iten Jiowa me aramas atun sia pwári mosonottam. Atun sise mosonottam, a apwangapwangoló ewe tong lefilach me ekkewe ekkóch. (1 Kor. 13:4; Kal. 5:22) Met a kapachelong lón ach pwári mosonottam? Ina ach likiitú atun fansoun weires fitifengen me ach eáni ekiek mi pwúng. (Kol. 1:11; Jas. 1:3, 4) Mosonottam a pwal álisikich le amwéchú ach tuppwél ngeni Jiowa ese lifilifil osukosuk sia kúna. A álisikich ach sisap liwiningaw atun sia riáfféú. Ewe Paipel a pese ngenikich ach sipwe tipemecheres le etiwa lamoten ach sipwe witiwit. Ina ewe lesen mi lamot sia káé lón James 5:7, 8. (Álleani.)

⁵ Pwata a lamot sipwe tipemecheres le witi án Jiowa epwe apwénúetá an kewe pwon? Ewe chón káé James a aléllééi nónnómuch ngeni nónnómun emén chón atake. Inaamwo ika emén chón atake a angang weires le fót pwikil, nge ese tongeni nemeni mwékútúkútún ásepwál are mwittirin máárin ekkewe irá. A lamot an epwe witiwit fán mosonottam fán iten ewe “ua mi fokun aüchea.” Pwal ina chék usun, a wor chómmóng mettóch sise tongeni nemeni atun sia witiwiti pwénútáán án Jiowa kewe pwon. (Mark. 13:32, 33; Föf. 1:7) A lamot sipwe mosonottam le witiwit usun chék ewe chón atake.

6. Met sia tongeni káé seni án ewe soufós Mika leenien áppirú?

⁶ Usun chék kich ikenái, ewe soufós Mika a kúna weires me a lamot ngeni likiitú. A manaw lemwúún King Ahas, ewe king mi fókkun ngaw. Ina minne, a watte féfféringaw lón Israel. Ewe Paipel a áweweei úkúkún ngawólóón aramas lón ena fansoun ren an erá pwe aramas ra “fokun sipeöch le föri mine a ngau.” (Álleani Mika 7:1-3.) Mika a silei pwe ese tongeni siwili ekkena mettóch. Iwe, met epwele féri? A erenikich: “Ngang üpwe neta ngeni ewe Samol mi Lapalap. Üpwe ösüküsükü Kot ai we Chon Amanau. Ai Kot epwe aüselingaei.” (Mik. 7:7) Usun chék Mika, a lamot sipwe “ösüküsükü Kot,” are witiwit fán mosonottam.

7. Pwata a lamot ach sisap chék witiwiti án Jiowa epwe apwénúetá an kewe pwon?

⁷ Ika ach lúkú a usun péchékkúlen án Mika lúkú, iwe sipwe tipemecheres le witiwiti Jiowa. Nónnómuch esap usun nónnómun emén chón kalapus mi witiwiti ránin an epwele ninniiló. A witiwit fán echchimw me ese mwétéresiti ena rán. Nge nónnómuch a fókkun sókko seni ena! Sia tipemecheres le witiwiti Jiowa pokiten sia silei pwe epwe apwénúetá an pwon le ngenikich manaw esemuch lón ewe atun mi fókkun fich! Iwe, sia “likitü o mosonotam” fán “pwapwa.” (Kol. 1:11, 12) Atun sia witiwit, sia túmúnú pwe sisap ngúnúngúnúngaw le erá pwe Jiowa a mmang. Ika sia ina usun, Jiowa esap pwapwa.​—Kol. 3:12.

PWÓRÓUSEN EKKÓCH MI TUPPWÉL ME MOSONOTTAM

8. Met sia káé seni ekkewe mwán me fefin me lóóm mi tuppwél?

⁸ Met epwe álisikich le alapaaló ach tipemecheres le witiwit? Sia tongeni ekieki usun ekkewe mwán me fefin me lóóm mi tuppwél mi witiwit fán mosonottam fán iten án Jiowa epwe apwénúetá an kewe pwon. (Rom 15:4) Atun sia ekieki ar leenien áppirú, a éch sipwe chechchemeni úkúkún ttamen ar witiwit, pwata ra tipemecheres le witiwit, me ifa usun Jiowa a efeiéchúúr ren ar mosonottam.

9, 10. Ifa úkúkún ttamen án Apraham me Sara witiwiti Jiowa?

⁹ Ekieki usun pwóróusen Apraham me Sara. Pokiten ar “lükü me mosonotam,” ra angei ekkewe “pwon.” Paipel a erenikich pwe mwirin án “Apraham a likitü fän mosonotam,” Jiowa a pwon ngeni pwe epwe efeiéchú me féri an epwe semelapen eú mwúún aramas mi watte. (Ipru 6:12, 15) Pwata a lamot án Apraham epwe mosonottam? Pokiten ena pwon esap mwittir pwénútá. Lón Nisan 14 lón ewe ier 1943 mwen Kraist, Apraham me Sara me meinisin chón leimwer kewe ra pwereló lón ewe Chénúpupu Oifrat me tolong lón ewe Fénúen Pwon. Nge mwirin, epwe lamot ngeni Apraham an epwe witiwit 25 ier me mwen uputiwen néún we Isaak, nge a pwal witiwiti 60 ier ren uputiwen néún Isaak kewe, Esau me Jakop.​—Ipru 11:9.

¹⁰ Ifa úkúkún ewe Fénúen Pwon a angei? Ewe Paipel a erá pwe Jiowa “esap ngeni Apraham och kinikin me lon ei fanü pwe epwe fanüeni, sap mwo nge ükükün chöchön eu chök ipw. Nge Kot a pwon ngeni, pwe i me mwirimwirin kana repwe fanüeni ewe fanü. Lon ewe fansoun Kot a eäni ei pwon, esamwo wor nöün Apraham.” (Föf. 7:5) Fépúkú ilik ier mwirin án Apraham pwereló lón ewe Chénúpupu Oifrat ngeni ena Fénúen Pwon, mwirimwirin kewe ra wiliti eú mwú, chókkewe repwe álemwiri ena fénú.​—Eks. 12:40-42; Kal. 3:17.

11. Pwata Apraham a tipemecheres le witiwit, me ikkefa ekkewe feiéch epwe kúna ren an mosonottam?

¹¹ Apraham a tipemecheres le witiwit pokiten a lúkúlúk pwe Jiowa epwe apwénúetá an kewe pwon. A lúkú Jiowa. (Álleani Ipru 11:8-12.) Apraham a pwapwa le witiwit inaamwo ika ese kúna pwénútáán meinisin án Jiowa kewe pwon me mwen an máló. Nge sótun anchangei pwapwaan Apraham lupwen epwe manawsefál lón paratis wóón fénúfan. Epwe máirú lupwen a álleani pwóróuseer me an famili lón chómmóng kinikinin ewe Paipel.a Anchangei úkúkún pwapwaan lupwen a silei aúchean wisan lón pwénútáán minne Jiowa a tipeni fán iten ewe Messaia mi pwonetiw! Sia tongeni lúkúlúk pwe esap meefi lusmwáálin an witiwiti ekkena feiéch.

12, 13. Pwata a lamot ngeni Josef mosonottam, me ifa ewe ekiek mi pwúng a eáni?

¹² Josef mwirimwirin Apraham we a pwal tipemecheres le mosonottam. A weires manawan ren ekkóch mettóch ese pwúng ra fis ngeni. Akkomw, eli lupwen a 17 ierin, pwiin kewe ra améméló pwe epwe slave. Mwirin, pwúlúwen néún we masta a chofonatá pwe a sótun reipei, iwe Josef a kalapus. (Ken. 39:11-20; Kölf. 105:17, 18) Inaamwo ika Josef i emén chón angang ngeni Kot mi tuppwél, nge usun itá a anúmamaú nge ese fen feiéch. Nge mwirin 13 ier, a fis eú watteen siwil. Josef a musowu seni kalapus me wiliti emén néúwis nampa ruu fán Farao lón Isip.​—Ken. 41:14, 37-43; Föf. 7:9, 10.

¹³ Itá ekkena mettóch ra efisi an epwe maras letipen Josef? A meefi pwe Jiowa a likitaló? Aapw. Josef a mosonottam le witiwit. Met a álisi? An lúkúlúk wóón Jiowa. A kúna án Jiowa emmweni minne a fis. A pwá ena lón minne a ereni pwiin kewe: “Ousap niuokus, pun ngang üa nom fän nemenien Kot. Ewer, ämi oua ekiekin föföringau ngeniei, nge Kot a awili ngeni mürina pwe epwe amanaua chomong aramas, usun a fis ikenai.” (Ken. 50:19, 20) Josef a silei pwe ese lusmwáál an witiwiti ekkewe feiéch seni Jiowa.

14, 15. (a) Pwata sia ingeló ren mosonottamen Tafit? (b) Met a álisi Tafit an epwe mosonottam le witiwit?

¹⁴ King Tafit a pwal weires ren chómmóng mettóch ese pwúng ra fis ngeni. Jiowa a filatá Tafit an epwe kingen Israel lupwen a chúen kúkkún. Nge a lamot án Tafit epwe witi 15 ier mwen an epwap wiliti kingen pwal mwo nge pwisin an we einang. (2 Sam. 2:3, 4) Lón ekkóch ekkena atun, King Saul a chei Tafit me sótun nieló.b (Ppii ewe pwóróus fan.) Pokiten ena, iwe Tafit a chék súsúfetál. Fán ekkóch a nóm lón ekkewe fénúen ekis me fán ekkóch lón ekkewe pokungo lón ewe fénúpéén. Ló, ló, ló, Saul a ninniiló lón ewe maun. Nge a chúen lamot án Tafit epwe pwal witi fisu ier me mwen an epwe wiliti kingen unusen ewe mwúún Israel.​—2 Sam. 5:4, 5.

¹⁵ Pwata Tafit a tipemecheres le witiwit fán mosonottam? Pélúwan a nóm pwal chék lón Kölfel 13 ikewe a eáni ei kapas eis fán nimu “Ifa ükükün fansoun?” A erá: “Üa anomu ai apilükülük won om tong ellet, üpwe pwapwa ren om amanauaei. Ngang üpwe köl ngonuk, ai Samol mi Lapalap, pun ka fokun eäni kirikiröch ngeniei.” (Kölf. 13:5, 6) Tafit a silei pwe Jiowa a tongei me epwe tuppwél ngeni fansoun meinisin. A ekieki usun ekkewe fansoun Jiowa a álisi me lóóm, me a mwétéresiti ewe fansoun Jiowa epwe asopwaló an kewe weires. Tafit a silei pwe ese lusmwáál an witiwiti ekkewe feiéch seni Jiowa.

16, 17. Ifa usun Jiowa Kot me Jesus Kraist ra isetiw leenien áppirú mi fókkun múrinné ren ar tipemecheres le witiwit?

¹⁶ Jiowa ese erenikich ach sipwe féri och mettóch pwisin i esap tipemecheres le féri. I pwisin a isetiw ewe leenien áppirú mi lapalap usun tipemecheres le witiwit. (Álleani 2 Petrus 3:9.) Áwewe chék, fitengeréú ier a ló, lón ewe tánipiin Eten, Satan a tipi ngeni Jiowa pwe a féri minne ese pwúng. Jiowa a chék “witiwiti” ewe fansoun epwe unusen piniló itan we. Ena mettóch epwe atoto feiéch mi amwarar ngeni chókkewe mi “witiwiti i fán mwétéres.”​—Ais. 30:18; NW, footnote.

¹⁷ Jesus a pwal tipemecheres le witiwit. Lupwen a nóm fénúfan, a tuppwél tori máló. Lón ewe ier 33, a mwei ngeni Jiowa lón láng aúchean an we asor. Nge a lamot epwe witiwit tori ewe ier 1914 ren an epwe poputááni nemeneman lón wisan wisen King. (Föf. 2:33-35; Ipru 10:12, 13) Nge epwe pwal witiwit tori lesópwólóón an we Nemenem Úkúkún Engeréú Ier me mwen meinisin chón oputan repwe ninniiló. (1 Kor. 15:25) A fókkun ttam fansoun an witiwit. Iwe nge, esap lusmwáál an witiwiti ekkena feiéch.

MET EPWE ÁLISIKICH?

18, 19. Met epwe álisikich le tipemecheres le witiwit fán mosonottam?

¹⁸ A mmen ffat pwe Jiowa a mochen ach sipwe mosonottam are tipemecheres le witiwit. Met epwe álisikich le féri ena? A lamot sipwe tingor án Kot we manaman mi fel lón iótek. Chemeni pwe mosonottam a pop seni án Kot we manaman mi fel. (Ef. 3:16; 6:18; 1 Tes. 5:17-19) Iwe, tingormaú ngeni Jiowa an epwe álisuk pwe kopwe likiitú fán mosonottam!

¹⁹ Pwal chechchemeni met a álisi Apraham, Josef, me Tafit le witiwit fán mosonottam fán iten pwénútáán án Jiowa kewe pwon. Ina ar lúkú me lúkúlúk wóón Jiowa. Rese ekieki chék pwisin iir me met ra mochen. Atun sia etittina sópwéchúr, sia pwal mochen pwári ena napanap mosonottam.

20. Met sipwe úppós le féri?

²⁰ Iwe inaamwo ika eli sipwe weires ren ach kewe sóssót, nge sia kan úppós le witiwit fán mosonottam. Fán ekkóch eli sipwe eis: “Ai Samol mi Lapalap, ifa ükükün fansoun?” (Ais. 6:11) Nge ren álillisin án Kot we manaman mi fel, sia tongeni áppirú ewe soufós Jeremaia me erá: “Ewe Samol mi Lapalap i wisei, iei mine üpwe eäni apilükülük” are witiwiti fán mosonottam.​—KölK. 3:21, 24.