En Mi Silei?

Pwata Jesus a apwúngú án aramas akkapél?

A WOR atun a mumutá me ren ewe Allúkún Moses án aramas repwe akkapél ren ar erá, “Ua akkapélú Kot,” are “Ua akkapélú ewe it Jiowa.” Iwe nge, lón fansoun Jesus we a fókkun terú án aramas eáni akkapél, iwe ekkewe chón Jus ra akkapél lape ngeni wóón iteiten met ra erá. Ra féri ena ren ar repwe ánneta ngeni aramas pwe mi pwúng met ra apasa, nge fán ruu Jesus a apwúngú ena sókkun féffér mi lamotmwáál. Iei met a eáni káit: “Kopwe chök apasa, ‘Ewer, ewer,’ ika ‘Apw, apw.’”​—Mat. 5:33-37; 23:16-22.

Me ren ewe puk itelapan Theological Dictionary of the New Testament, pwe ewe puken allúkún me eérenien chón Jus itan Talmud a pwáraatá terúún án ekkewe chón Jus eáni akkapél. A pwá ena pokiten a fókkun tichik áweween ewe Talmud ren menni akkapél mi lamot aramas repwe apwénúetá me menni akkapél aramas ra tongeni atai.

Esap chék Jesus a apwúngú ena sókkun féffér mi mwáál. Áwewe chék, ewe re Jus sou uruwo itan Flavius Josephus a makkeei pwe eú kúmiin lamalamen Jus rese kan mochen akkapél. Chón ena kúmi ra meefi pwe án emén eáni akkapél epwe fen ngaw lap seni an chofona. Ra meefi pwe ika emén epwe akkapél ren án aramas repwe lúkú i, iwe a fen pwári pwe i emén mi kapas chofona. Eú néún chón Jus puk mi iteni Kapasen Tipachemen Sirach a pwal erá: “Emén mi kan eérenaaló le akkapél, i emén mi fókkun ngaw.” Jesus a apwúngú án aramas eáni akkapél wóón met mi lamotkisikis. Ika sia chék kapas wenechar iteitan, iwe itá úrúrún ese pwal lamot ach sipwe akkapél ren ach sipwe alúkúlúkú minne sia apasa.