Ekkewe Kii Ngeni Pwapwaan Famili
Pwoppworausfengen me ekkewe Säräfö
“Me loom, a mecheres ai upwe fos ngeni nei we ät, nge iei a 16 ierin. A weires ngenikem me pwülüwei aupwe silei met a eäni ekiek. A chök imulo lon ruumwan we nge ese kon lien foffos ngenikem!”—MIRIAM, MEXICO.
“Lon eü fansoun, nei kewe ra mwasangasang le rongorong met upwe apasa. Ra fokkun mochen aüseling ngeni aloi! Iei, ra säräfö, iwe, ra ekieki pwe usap fokkun weweitiir.”—SCOTT, AUSTRALIA.
IKA a wor noum säräfö, eli ka weweiti meefien ekkena sam me in kana a mak asan. Eli me loom, om pwoppworausfengen me noum we a mecheres ussun chök ruuofoch al mi affanger. Iei, a kaülo pworausfengen lefilemi. Emön inelap lon Itali itan Angela a apasa, “Lupwen nei we ät a kükkün, a soun kapas eis ngeniei. Iei, ika ngang use wisen poputä le kapas ngeni, eli äm ause tongeni pworausfengen fitu rän.”
Ussun chök Angela, meni ka küna pwe noum we mi piin wakkaawu meefian a siwili napanapan, a wiliti emön säräfö ese chüen lien foffos. Inaamwo ika ka resin achocho pwe oupwe fosfengen, nge a chök mwochomwoch an pölüweni minne ka apasa. Eli, kopwe eisini noum we ät: “Ifa ussum ikenäi?” A pölüweni lon an osenimu: “Pöchökkül.” Eli, kopwe eisini noum we nengngin: “Met pworausen om sukul ikenäi?” A apasa, “Esor,” nge a chök eki afaran. Ika kopwe ereni, “Pwata kese foffos?” ina epwe chök fanafanelo.
Ekkoch säräfö ra kan foffos, nge minne repwe apasa semer kewe me iner resap efich. Emön in itan Edna lon Nigeria a apasa, “Lupwen ua ereni nei we nengngin an epwe föri och mettoch, a kan pölüweni, ‘Usap, ina chök.’” A pwal ina chök ussun emön re Mexico itan Ramon ren nöün we alüwöl, 16 ierin. Ramon a apasa, “Äm aua kan änini arapakkan iteiten rän. Lupwen ua ereni an epwe föri och mettoch, a kunetipengen le apasa ewe popun esap tongeni föri.”
Sam me in ra kan mängaü ika ra resin foffos ngeni nöür kewe säräfö nge rese mochen pölüweniir. Ewe Paipel a apasa pwe “Are esap wor kapasen öüröür, esap fis mine aramas ra ekiekietä.” (Än Salomon Fos 15:22) Anna, emön in lon Russia esor pwülüwan, a apasa: “Lupwen use silei met ekiekin nei we ät, üa fokkun letipechou, üa pwal mochen püchör.” Atun ekkewe nau ra tori ierin säräfö, a fokkun lamot ar repwe fosfengen me semer kewe me iner, nge pwata ussun itä nge a weires?
Esilla ekkewe Minen Eppetin Pworausfengen
Pworausfengen a lu seni fos chök. Jises a apasa pwe “eman aramas epwe chök apasawu met mi nom lon letipan.” (Luk 6:45) Sia käeö seni aramas me pwal pwärawu mettoch ussuch ika a wor pworausfengen mi mürinnö. Eli epwe weires ena ngeni ekkoch säräfö, pun lupwen emön semirit mi piin sou kapas epwe tori ierin säräfö, epwe tongeni wiliti emön mi nisässäü are kinipwo. Ekkewe säräfö ra kan meefi pwe aramas meinisin ra chök akkatola minne ra föri me apasa. Pokiten rese mochen aramas repwe nennengeniir, ra imulo seni aramas, pachelong semer kewe me iner.
Pwal iei eü minen eppet, ekkewe säräfö ra mochen pwisin nemenemeniir. Epwe chök fis pwe noum we epwe mämmääritä, weween, ekis me ekis, epwe imulo seni an famili. Nge eli esap tongeni imulo lon pwisin imwan iei chök. Lon chommong mettoch, epwe chüen lamot ngeni om älillis. Nge an imulo sonuk ekis me ekis epwe poputä fitu ier me mwen an epwe wattetä. Iei eü kinikinin an äsimaüetä, epwe ekieki loom mwen an epwe pwärawu meefian ngeni ekkewe ekkoch.
Pwüngün pwe ekkoch säräfö repwe pwärawu meefier ngeni chiener kewe säräfö. Ina met emön in lon Mexico itan Jessica a küna. A apasa: “Le kükkünün nei we nengngin, a mwittir ssäto rei ren an kewe osukosuk. Nge iei, a feilo ngeni chiechian kewe.” Ika a ina ussun noum we säräfö, kesap ekieki pwe a atokowu seni wisom, wisen sam are in. Aapwi, nge ekkoch minen kütten ekiekin aramas ra küna pwe ra aücheani kapasen emmwen seni semer kewe me iner lap seni chiechier kewe. Iwe nge, ifa ussun kopwe anükünükü pwe ewe alen pworausfengen epwe chök sussuuk?
Atai ekkewe Minen Eppetin Pworausfengen
Anchangei pwe ka unteng woon efoch al mi langattam me wenechar. Ren chommong mail, ka chök äkkäekis okullu ewe kasi. Nge mwirin chök, ka küna pwe ewe al a rikilo. Iwe, kopwele fet, kopwe okullu om we kasi ngeni ikewe ewe al a rikilo ie. Iwe, epwe pwal ina chök ussun fansoun noum we epwe wiliti emön säräfö. Ren fitu ier, neman ka ekis siwili napanapen om foleni me foffos ngeni me a chök sopwöch. Iwe nge, iei, manauen noum we a watte siwilin, me kopwe pwal siwili napanapen om foffos ngeni. Kopwe pwisin eisinuk ekkeei kapas eis.
▪ Atun nei ät are nengngin a mochen fos ngeniei, üa kan etiwa aupwe fosfengen? Ewe Paipel a apasa: “Eu kapas eman a apasa lon fansoun fich a usun chök ekewe föün ringo mi oleol usun kolt mi nom lon eu sepi seni silifer.” (Än Salomon Fos 25:11) Me ren ena wokisin, a lamot epwe fich ewe fansoun. Awewe chök: Emön chon atake esap tongeni amwittiri are ammanga ewe räs. Epwe chök föri minne a tongeni atun a tori fansoun räs. Iwe, pwal ina chök ussun, epwe wor fansoun noum we säräfö epwe mochen fos. Kopwe fokkun awora om fansoun. Frances, emön in esor pwülüwan lon Australia, a apasa: “Fän chommong, nei we föpwül, a tolong lon rumwei lepwin, me a tongeni nonnom ina epwe ükükün eü aua. Ese mecheres ai upwe nennelo lepwin, nge lon ekkena pwinin, am aua kan pworausfengen ussun mettoch meinisin ese pwal lifilifil.”
SOTUNI EI METTOCH: Ika noum we säräfö ese kon lien mochen fos, oupwe mwin le föri och mettoch, awewe chök, fetälfengen, kunou woon taraku, urumotfengen, are angangfengen leimw. Fän chommong, ekkewe säräfö repwe mochen fos lon ekkena fansoun.
▪ ‘Üa kan weweiti sap chök an fos nge pwal wesewesen meefian kewe?’ Hiop 12:11 a apasa: “Ifa usun, sap än ewe seling angang pwe epwe alefila lefilen kapas mürina me kapas ingau, usun chök ewe chönaw a alefila lefilen nennen mongö mi anö me mongö mi ngau?” Iei lap seni loom, a lamot kopwe “alefila lefilen” minne noum we alüwöl are föpwül a apasa me minne wesewesen meefian. Fän chommong, ekkewe säräfö ra alapa pworaus. Awewe chök, eli noum we alüwöl are föpwül epwe apasa, “Iteiten fansoun meinisin ussun itä nge ka föri pwe ngang emön semirit!” are “Kese fokkun akkaüseling ngeniei!” Esor lamoten oupwe änini woon ekkena kapas, nge kopwe esilla pwe noum we ese eäni kapas wesewesan. Awewe chök, ika a apasa, “Kesap chüen ekieki pwe ngang emön kükkün!” a tongeni wewe ngeni “Üa meefi pwe kese lüküei.” Ika epwe erä, “Kese fokkun akkaüseling ngeniei,” a tongeni wewe ngeni “Üa mochen eronuk wesewesen meefiei.” Sotun mirititi wesewesen meefian nge sap chök alon.
SOTUNI EI METTOCH: Ika noum we säräfö a eäni kapas pöchökkül, kopwe tongeni apasa: “Üa weweiti pwe ka osukosuk, me üa mochen aüseling ngeni meefiom. Kopwe aweweei ngeniei met popun ka meefi pwe napanapei ngonuk a ussun chök napanapei ngeni emön semirit.” Iwe, mwirin, kopwe chök aüseling ngeni, nge kosap pwal fos.
▪ ‘Use mirititi pwe üa kan aweiresi än nei we pwäppwärawu meefian ren ai sotun echimwa an epwe foffos?’
Ewe Paipel a apasa: “Ekewe chon afisätä kinamwe mi fofot fän kinamwe repwe kini ewe uän pwüng.” (Jemes 3:18) Ren om kapas me napanapen woon mesom, kopwe efisatä “kinamwe” pwe noum we säräfö epwe mochen kapas. Chechchemeni pwe en ewe chon älisi noum we. Ina popun, atun oua pworausfengen, tümünü pwe kosap soun kapas eis ussun chök emön chon etipisi lon kapwüng, nge kopwe ussun chök emön chon peni. Emön sam lon Korea itan Ahn a apasa: “Emön sam are in mi tipatchem esap eäni ei sokkun kapas eis ngeni nöün, awewe chök, ‘Inet kopwe mirit?’ are, ‘Fän fitu üa fen eronuk?’ Mwirin ai mwäällilo lon ai eäni ei sokkun fos ngeni nei kewe ät, ua küna pwe ra mängaü sap chök ren napanapen ai fos ngeniir pwe pwal ren met ua apasa.”
SOTUNI EI METTOCH: Ika noum we säräfö ese pölüweni om kewe kapas eis, sotun siwili napanapen om fos. Awewe chök, kosap chüen eisini noum we met pworausan lon ena rän, nge kopwe fen ereni met pworausom me ppii ika epwe pwal apworausa met a fis ngeni lon ena rän. Iwe, ika ka mochen silei meefien noum we ussun och pworaus, sotun eäni ewe esin kapas eis ese weneiti. Eisini met meefien chienan we ussun ewe mettoch. Mwirin, eisini met sokkun kapasen fön epwe ngeni chienan we.
Mei fokkun tufich ach sipwe pwoppworausfengen me ekkewe säräfö. Sotun siwili napanapen om fos ngeni noum we ren minne mi fich ngeni lon eü me eü fansoun. Kapas ngeni ekkoch sam me in mi lipwäköch. (Än Salomon Fos 11:14) Atun kopwe fosfengen me noum we, kopwe “müttir ngeni rong, mang ngeni kapas pwal mang ngeni song,” (Jemes 1:19) Kesap fokkun ükütiw lon om achocho le foleniöchü noum kewe säräfö “ren sokkun amirit me fonou me ren ewe Samol.”—Efisus 6:4.
EISINI PWISIN EN . . .
▪ Ikkefa ekkoch siwil üa küna ren nei we seni ewe fansoun an a wiliti emön säräfö?
▪ Ifa ussun upwe tongeni lipwäköchülo le fosfengen me nei we?
[Pwóór lón pekin taropwe 29]
Kapasen Pesepes Seni Ekkoch Sam me In
“Nei we alüwöl a kan uwawu meefian atun äm aua nom ren pwal ekkoch aramas. Ina minne, atun äm aua rüüemönülo chök, üa sopwelo le fos ngeni ussun ekkewe chök itelap äm meinisin aua fos ussun.’ —ANGELA, ITALY
“Fän chommong, nöüm kewe repwe fos ngenikem ika äm aua akkomw ingeiti ar föfför mürinnö me pwal esile ngeniir pwe äm aua fokkun tonger.” —DONIZETE, BRAZIL.
“Üa fos ngeni ekkoch watte nge semer kewe me iner ra ämääriiretä me ren äitien ewe Paipel. Üa eisiniir ika met meefier atun säräfö, me ifa ussun semer kewe me iner ra älisiir. Ina met a fokkun asarama ai ekiek.”—DAWN, BRITAIN.