Kapas Eis Seni Chón Állea
Alon Tafit lón Kölfel 37:25 me alon Jesus lón Mateus 6:33 ra itá wewe ngeni pwe Jiowa esap fókkun mut ngeni emén Chón Kraist an epwe nafangawen anan mwéngé?
Iei met Tafit a makkeei: “Use mo kuna emon mi pung nge sochoul, use pwal nengeni noun kewe semirit ra tingor aner pilaua.” An kana kapas ra lóngólóng wóón met a fen kúna lón pwisin manawan. A silefichi án Kot túttúmúnú i. (Kölf. 37:25, Testament Mi Fö) Iwe nge alon Tafit kana esap weween pwe chón fel ngeni Kot rese kúna are resap kúna riáfféún nafangaw.
Fán ekkóch Tafit pwisin a kúna weires lón manawan. Eú atun, fansoun an súsúfeil seni Saul nge i me chienan kewe ra nafangawen ener mwéngé. Tafit a ereni emén an epwe ngeni pilawa fán itan me chienan kewe. (1 Sam. 21:1-6) Lón na atun Tafit a nafangawen anan mwéngé nge ese lamot an epwe tittingorfetál. A silei pwe Jiowa epwe túmúnú i.
Lón Mateus 6:33, TF, Jesus a anúkúnúkúkich pwe Kot epwe ataweei osupwangen néún kewe chón angang mi akkomwa ewe Mwú lón manawer. Iei alon: “Oupwe kuttafichi lom an mu o an pung; iwe, ekkeei mettoch meinisin [kapachelong mwéngé, minen ún me úf] repwap kapach ngenikemi.” Iwe nge, Jesus a pwal apasa pwe pokiten riáfféúmwáál, ‘pwiin’ kewe repwe tongeni echik. (Mat. 25:35, 37, 40) Ina met a fis ngeni ewe aposel Paulus. Mi wor ekkewe fansoun a echik me kaka.—2 Kor. 11:27.
Jiowa a apasa pwe sipwe kúna sókkópaten sókkun riáfféúmwáál. Neman epwe mut ngenikich ach sipwe kúna nafangaw pwe sipwe tufichin pélúweni án Satan kewe kapasen tipimwáál. (Hiop 2:3-5) Ren chék áwewe, ekkóch pwich kewe usun chókkewe ra nónnóm lón án chón Nazi ika chón peni Hitler kewe leenien fétek ra feiengaw ren ewe riáfféúmwáál. Eú mettóch mi ngaw ekkena chón Nazi ra féri ar repwe atai án Chón Pwáraatá tuppwél, ina ar amwéchú seniir ener mwéngé. Ekkena Chón Pwáraatá mi tuppwél ra chúen álleasochisi Jiowa. Jiowa ese likitiireló. A mut ngeniir ar repwe nóm fán ena sóssót usun chék pwal an mut ngeni meinisin Chón Kraist ar repwe kúna sókkópaten sókkun sóssót. Iwe nge, ese wor tipemwaramwar pwe Jiowa a álisi meinisin mi kúna riáfféú fán itan. (1 Kor. 10:13) Sipwe chechchemeni ekkeei kapas seni Filipi 1:29: “Kot a ngenikemi ewe wis mi aüchea pwe oupwe angang ngeni Kraist, sap chök ren ämi oupwe lükü i, nge pwal ren ämi oupwe riaföü fän itan.”
Jiowa a pwonei pwe epwe nóm ren néún kewe chón angang. Áwewe chék Aisea 54:17 a apasa: “Esap wor och pisekin maun epwe tongeni afeiengauok.” Ena pwon me pwal ekkóch usun chék ra anúkúnúkúkich pwe néún Jiowa aramas usun eú chó, repwe kúna túmún. Nge, eli emén me emén epwe tongeni kúna sóssót, pwal mwo nge máló.