Sopwun 10
Ifa Ussun Kopwe Alapalo Om Angangen Afalafal
LUPWEN Jises a tinalo nöün kewe chon käeö pwe repwe chon afalafala ewe Mwuun Kot, a ereniir: “Ewe ras mi lapalap, nge ekkewe chon angang mi chok chokukkun. Iei minne, oupwe iotek ngeni ewe Samolun ras, pwe epwe tinato chon angang lon an ras.” (Mt. 9:37, 38) Jises a äiti ngeni nöün kewe chon käeö ifa ussun repwe föri ewe angangen afalafal. Ren ngünün atapwalapwal, Jises a erä: “Pun, enlet, upwe apasa ngenikemi, pwe ousap awesalo ekkewe telinimwen Israel mwen an ewe Noun-Aramas waroto.”—Mt. 10:23
Ikenäi, a pwal watte ewe osupwang lon ewe angangen afalafal. Ei fansoun epwele mwüchülo me a lamot pwe ewe kapas allim ussun ewe Mwuun Kot epwe esilesilfeil me mwen ewe sopwoloon. (Mk. 13:10) Pokiten sia wisen afalafal ngeni unusen fönüfan, sia pwal küna ewe osupwang Jises me nöün kewe chon käeö ra küna lon ar fansoun, nge mi fen watte ach osupwang seniir. Ussun lon fansoun Jises, choochoon chon afalafal iei a mmen kükkün seni ekkewe fite bilion aramas woon fönüfan sipwe afalafaler. Nge sipwe tongeni lükülük pwe pöün Jiowa ese mwochomwoch. A wor an tufich le efisi pwe ewe kapas allim ussun ewe Mwuun Kot epwe esilesilfetäl woon unusen fönüfan. Ewe kapas allim epwe chök esilesilfeil me ewe sopwoloon epwe chök war lon ewe fansoun Jiowa a filatä. Nge lupwen a war ena rän, Jiowa epwe pwal küna pwe kich sia fen apwönüöchüetä wisach le afalafal fän tuppwöl? (Is. 33:8, 9) Sipwe kan akkomwa än Kot we Mwu lon manauach? Ikkefa ekkewe mettoch sipwe achocho ngeni pwe repwe älisikich le unusen apwönüetä ach angangen afalafal?
Jises a pwäralo met Jiowa a kütta seni ir kewe mi fen fangolo manauer ngeni lupwen a apasa: “Iwe, kopwe tongei om Samol Kot ren unusen letipom, o ren unusen ngunum, o ren unusen ekiekum, pwal ren unusen tufichum.” (Mk. 12:30) A lamot ngenikich meinisin ach sipwe angang ngeni Kot lon unusen letipach. A wewe ngeni pwe emön me emön leich epwe pwäralo alolloolun an pacheöch ngeni Kot me enletin an tong ngeni ren an unusen achocho lon ei angangen afalafal. (2 Tim. 2:15) A suuk ngenikich chommong angang sipwe tongeni föri me ren en me nonnomun me tufichin. Nengeni ekkoch me leir me filatä menni kopwe tongeni achocho ngeni pwe kopwe unusen apwönüetä om angangen afalafal.
WISEN EMÖN CHON AFALAFAL
Meinisin ekkewe ra etiwa ewe enlet repwe tongeni eäni ewe wis chon afalafala ewe kapas allim. Iei ewe popun angang Jises a awisa ngeni nöün chon käeö. (Mt. 24:14; 28:19,20) Lupwen emön nöün chon käeö a mirititi lamoten ewe kapas allim, mwittir chök a poputä le afalafala aramas ussun. Ina met Antru, Filip, Kornilios me pwal ekkewe ekkoch ra föri. (Jon 1:40, 41, 43-45; Föf. 10:1, 2, 24; 16:14, 15, 25-34) Weween pwe emön mi tongeni fiti ewe angangen afalafala ewe kapas allim inaamwo ika esaamwo papatais? Ewer. Lupwen emönnewe a tufichin wiliti emön chon afalafal esaamwo papatais, a suuk ngeni an epwe fiti ewe angangen afalafal imw me imw. Pwal och, me ren an tufich me nonnomun, a pwal tongeni fiti ekkewe ekkoch kinikinin angang lon ewe angangen afalafal.
Ren om wiseni ewe wis chon afalafal lon ewe mwichefel, ese mwääl ka mochen föri ükükün om tufich le älisi aramas ar repwe silei ewe kapas allim. Mi suuk ngeni ekkewe mwän me fefin ei wis le fiti ei angangen afalafal mi feito seni Kot. Meinisin repwe isetiu eü leenien äppirü mi mürinnö lupwen ra apwönüetä en me wisan lon ewe mwichefel. (1 Tim. 2:9-15; Tait. 2:1-10; 1 Pit. 5:5) Ika ra eäni ewe sokkun tufich me ren ewe Paipel, ekkewe brother mi feffeitä lon pekin ngün lon ewe mwichefel, repwe tongeni eäni ewe wis ministerial servant. (1 Tim. 3:8-10, 12, 13) Nge ekkewe ra mochen wiseni wisen elter me ra apwönüetä met ewe Paipel a kütta seniir mi tongeni eäni ena wis. Ir ra wisen afalafal lon ewe mwichefel me ra wisen chon mäsen ekkewe siip. (1 Tim. 3:1-7; Tait. 1:5-9) A eü wis mi aüchea än emön älisi feffeitään ekkewe mettochun Mwuun Kot inaamwo ika ekis chök. Mi pwapwa ekkewe ra ounusalo ar angangen afalafal ren ar achocho le eäni pwal ekkoch wis.
ANGANG LON EWE LEENI A WATTE OSUPWANGEN CHON AFALAFAL IE
Neman ka nonnom lon eü mwichefel a kan unusen awesalo ewe territory iteitan. Ika ina ussun, eli ka meefi pwe kopwe tongeni alapalo om angangen afalafal ren om mwöküt ngeni pwal eü leeni mi osupwangen chon afalafal ie. (Fof. 16:9) Ewe circuit overseer mi tongeni awora emmwen ngonuk ren menni mwichefel ka tongeni älisi lon ewe circuit. Ika ka mochen angang lon pwal eü leeni lon pwisin fönüom, en mi tongeni mak me kapas eis ngeni ewe branch ofes. Ika en emön ministerial servant are elter, neman mei wor eü mwichefel lon pwisin fönüom epwe aücheani om älisi osupwangen ena mwichefel.
En mi mochen älisi feffeitään angangen ewe Mwuun Kot lon eü fönü ekis? Kopwe ekiekiöchü ei mettoch. Ei siwil epwe wesewesen kkü manauom me manauen chokkewe repwe fituk le mwöküt. (Luk 14:28) Ika kese pwal ekieki pwe kopwe nomottam lon ena fönü ekis, neman epwe fen öch ika kopwe chök angang lon pwisin fönüom.
Ewe Congregation Service Committee epwe akkom mak taropwe mi pwäratä pwe en emön chon afalafal mi üöch ngeni ewe branch ofes, iwe mwirin ewe branch ofes lon pwisin fönüom are lon pwal eü fönü ekis epwap awora ngonuk iten ekkewe mwichefel mi osupwang ren älillis. A lamot ena taropwe ese pwal lifilifil ika en emön elter, ministerial servant, pioneer are emön chon afalafal. Ewe service committee epwe tinalo ena taropwe mi pwäratä pwe ra tipeeü ngeni om mochen, pachelong nöüm we taropween kapas eis ngeni ewe branch ofes lon ewe fönü ekis ia ka mochen angang ie.
Ika en mi mochen awora om älillis lon ewe leeni a wor watteen osupwang ie, pwata kese fos ngeni ekkewe elter lon om mwichefel? Repwe tongeni awora emmwen ren ifa ussun kopwe tongeni mwöküt ngeni pwal eü leeni are ifa ussun epwe tufich reom ena wis lon ekkan fansoun.
ANGANG REN EWE MWICHEFEL MI EÄNI FOSUN EKIS
Ren om kopwe alapalo om angangen afalafal, kopwe ppi ika ka tongeni käeö pwal eü fosun fönüfan, pachelong ewe fos mi fiti pwoomw. Lon ekkoch famili mi eäni ruu fosun fönü, ekkewe sam me in me nöür kewe ra alapalo ar angangen afalafal ren ar angang ren ewe mwichefel mi eäni fosun ekis. Ika ina om goal, om kopwe käeö pwal eü fosun fönü, pwata kese fos ngeni ekkewe elter me ewe circuit overseer? Ra tongeni älisuk me apöchökkülok. Fän ekkoch, fän emmwenien ewe branch ofes, ekkewe circuit ra fen akkota eü sukulen käeö fosun ekis ren an epwe atufichiir le afalafal ngeni ekkewe chon ekis lon leenier kewe.
ANGANGEN AUXILIARY, REGULAR, ME SPECIAL PIONEER
Meinisin chon afalafal repwe itä silei met ra kütta seni ekkewe auxiliary, regular me special pioneer ren pwal ekkoch kinikinin angangen afalafal full time. Fän ekkoch, Ach Angangen Afalafala ewe Mwu a awora pwal ekkoch pworaus ussun ekkeei sokkun angang. Mi lamot pwe ewe pioneer i emön Chon Kraist mi papatais me üöch, me nonnomun a mut ngeni an epwe tikeri ewe ükükün awa iteiten maram le afalafala ewe kapas allim ngeni aramas. Ewe Congregation Service Committee a wisen apwüngalo ekkewe taropwe fän iten ewe angangen auxiliary pioneer, nge ekkewe regular me special pioneer ra kefil me ren ewe branch ofes.
Ekkewe auxiliary pioneer mi tongeni eäni ewe wis lon ükükün eü maram, fite maram mi chök tettelilo are iteiten maram me ren an tufich. Chommong ra pwapwaiti le auxiliary pioneer lon ekkewe fansoun mi kkolo aüchean, awewe chök, atun ewe fansoun Ächechchem, are maramen ewe circuit visit. Ekkoch ra pioneer lupwen ra asösö seni ar angang. Ekkewe chon sukul mi papatais mi tongeni auxiliary pioneer atun asösöön sukul. Ese lifilifil ifa nonnomum, nge ika ka amwöchü eü manau mi limöch, ka fen akkota le tikeri ewe ükükün awa fän iten pioneer, kopwe tongeni pioneer lon ükükün eü maram are lap seni, ekkewe elter repwe pwapwa le etiwa nöüm taropween pioneer.
Ren om kopwe tongeni eäni ewe wis regular pioneer, mi lamot kopwe tufichin tikeri ewe ükükün awa mi affat pwe kopwe tori iteiten ier. Ach Angangen Afalafala ewe Mwu a pesei pwe kopwe achocho le tikeri eü aükükün awa iteiten maram pwe kopwe tori om aükükün awa fän iten unusen ier. A lamot ngeni emön regular pioneer an epwe angangfengen me ewe mwichefel. Ekkewe pioneer mi tinikken ir eü feiöch lon ewe mwichefel, ra efisi mwasangasang lon ewe angangen afalafal me ra apöchökküla ekkoch ar repwe pwal fiti ewe angangen pioneer. Me mwen ekkewe elter repwe apwüngalo pwe mi tufich ngonuk om kopwe eäni ewe wis regular pioneer, mi lamot ka fen papatais lon ükükün wonu maram, ka limelimöch lon manauom me en emön chon afalafal mi angangöch. Mi lamot kopwe fiti om schedule pwe epwe atufichuk le tori ewe ükükün awa mi affat pwe kopwe tikeri lon ewe angangen afalafal.
Ekkewe special pioneer ra kan kefil me lein ekkewe regular pioneer mi lipwäköch lon ewe angangen afalafal me ir kewe mi tongeni angang ese lifilifil ia ewe branch ofes epwe tinirelo ie. Lap ngeniir repwe feilo lon ekkewe leeni mi towau ikkewe ie mi wor chommong aramas ra etiwa ewe enlet ie me ekkena pioneer ra tongeni föratiu mineföön mwichefel. Fän ekkoch ra tinalo ekkewe special pioneer ngeni ekkewe mwichefel ra osupwangen älillis le föri ar territory iteitan. Ekkoch special pioneer ir pwal elter ra feilo pwe repwe älisi ekkewe kükkün mwichefel inaamwo ika ese kon lien osupwang ren chon afalafal. Ekkewe special pioneer ra angei ekis monien älillis fän iten tufichin manauer.
MINISTERIAL TRAINING SCHOOL
Chommongoloon ekkewe mineföön mwichefel iteiten ier a eü minen pwäratä pwe Jiowa a efeiöchü achochoon nöün kewe aramas le afalafala ewe kapas allim ussun ewe Mwu. (Fof. 16:5) Ren lapaloon choochoon ekkena mwichefel, a pwal wattelo ewe osupwang fän iten ekkewe ministerial servant me ekkewe elter. Ina popun a pwal wor pesepes fän iten ekkewe brother mi lipich me mi eäni ena sokkun tufich ar repwe awora älillis me apasa ngeni Jiowa: “Ngang üa mochen, kopwe tiniei.” (Ais. 6:8) Chommong ra fen mochen awora älillis ren ar fiti ewe Ministerial Training School, ewe sukul fän iten chök ekkewe ministerial servant me elter mi lipich, ir kewe mi tufich ngeniir me mi mochen älisi ekkewe leeni mi osupwang. Repwe pwal tongeni silei och pworaus mi tichik ussun ewe Ministerial Training School lupwen repwe fiti ewe mwich a kan fis iteiten circuit mwichelap.
Ewe sukul a ussun äitien ewe Paipel me kokkotun ewe mwicheich pwe ekkena brother repwe lipwäköch lon wiser le tümünü me mammasa ewe mwichefel me pwal ekkoch wis lon mwichefel. (Jer. 23:4) Pokiten ena sukul, ekkoch ra fen ttittilo ngeni ekkewe leeni mi wor osupwangen älillis lon pwisin fönüer ie, nge ekkoch ra ttittilo ngeni ekkewe fönü towau. Ekkoch ra liwiniti pükün ar mwichefel pwe repwe älisi me apöchökküla pwiir kewe lon ena leeni. Ätekkewe mi fiti ewe sukul ra fen angangöchülo le älisi nöün Kot kewe aramas lon pekin ngün me lon kokkotun ewe mwicheich.—2 Tim. 3:16, 17.
ANGANGEN MISINERI
Ren än ewe kapas allim ussun ewe Mwu epwe esilesilfeil “lon unusen fonufan meinisin” me mwen ewe sopwoloon, a fen lamot ar repwe tinalo ekkewe misineri lon chommong fönü. (Fof. 1:8; Mat. 24:14). Iwe, a suuk ngeni fite ngeröü Chon Pwäratä Jiowa ewe tufich ar repwe alapalo ar angang, äkkäeüin ngeni ir kewe mi fen tinikken, mi letip unus me lipwäköch lon ei angangen afalafal. Ekkewe mi fen ketiw lon ei angangen misineri ra fiti ewe sukul mi kkolo aüchean lon ewe Watchtower Bible School of Gilead.
A lamot emön epwe pöchökkül inisin me likiitü pokiten chommong misineri ra feilo ngeni ekkewe fönü ikkena ie mi weires nonnomun aramas ie. Me lükün än epwe tongeni üri sokkopaten semwen lon ekkena fönü, mi pwal lamot ngeni emön misineri än epwe tipemecheres le siwili nonnomun ngeni ewe fönü epwe nonnom ie me etiwa ar eöreni.
Ika en emön pioneer full time me ka mochen achocho ngeni ewe wis misineri, kopwe silefichi ekkewe mettoch epwe kütta seni emön misineri ika kopwe fiti ewe mwich a kan fis iteiten district mwichelap. Nöüm we circuit overseer mi tongeni awora emmwen. Ika ka eäni ewe tufich, en mi tongeni wiseni ewe wis mi fen fokkun älisi chöüfetälin ewe fel mi enlet woon unusen fönüfan.
ANGANGEN BETHEL
Eü wis mi aüchea an emön epwe angang lon eü me lein ekkewe imwen Bethel woon fönüfan. Ewe it Bethel a wewe ngeni “Imwen Kot”, me a mmen fich ena it pun ikkena ie, ina iolapen än Kot kewe sokkopaten angang woon unusen fönüfan. Pwiich kewe lon Bethel ra föri eü angang mi lamot mi weneiti förün me ainetiin ekkewe puk me chassi Chon Pwäratä Jiowa woon unusen fönüfan ra nönnöünöü. Seni Brooklyn Bethel, ewe mwichen sou pwüngüpwüng ra tümünü me emmweni ekkewe mwichefel meinisin woon fönüfan.
Chommong angang lon Bethel mi aweires me apekkus. Ina popun, lap ngeni chon angangen Bethel ir ekkewe brother mi papatais, ir alüwöl me mi pöchökkül inisiir. Ika mei wor osupwang lon fönüom ren chon angangen Bethel nge ka mochen awora om älillis, kopwe tongeni silei met a lamot ussun ena angang ren om kopwe fiti ewe mwich a kan fis iteiten ier lon district mwichelap fän iten ir kewe mi mochen achocho ngeni ena wis. Ewe circuit overseer a pwal tongeni älisuk woon ei mettoch.
KAÜTÄÄN EKKEWE KINGDOM HALL
Kaütään ekkewe Kingdom Hall me Leenien Mwichelap a pwal eü angang mi pin, ussun chök ewe angangen kaütään än Solomon we imwen fel. (1 King 8:13-18) Chommong pwiich kewe ra pwäratä ar tinikken fän iten än Jiowa mwicheich ren ar awora ar fansoun me tufich pwe repwe föri ei angang.
Mi tufich reom om kopwe awora älillis lon ei angang mi pin? Ika en emön pwiich mi mürinnö mi papatais, me ka silei angangen kaü imw, ewe Regional Building Committee epwe fokkun etiwa om älillis. Ekkoch ra fen älillis ussun international construction servants lon kaütään ekkewe Kingdom Hall me Leenien Mwichelap lon ekkoch fönü. Ika kese silei kaü imw are en emön chon afalafal esaamwo papatais nge ka isetiu eü leenien äppirü mi mürinnö lon ewe mwichefel, eli kopwe tongeni älisi kaütään eü Kingdom Hall lon leeniom. Pwata kese esile ngeni ekkewe elter me circuit overseer ussun om mochen awora älillis?
MET KOPWE ACHOCHO NGENI LON PEKIN NGÜN?
Ika ka fen fangolo manauom ngeni Jiowa, ka fen pwäralo om mochen le angang ngeni Jiowa feilfeilo. Nge ikkefa ekkewe mettoch lon pekin ngün kopwe achocho ngeni pwe kopwe unusen apwönüetä ena mochen? Ika ka isetiu minne kopwe achocho ngeni lon pekin ngün epwe tongeni emmwenuk me älisuk le äeäöchü om pöchökkül me om tufich. (1Kor. 9:26) Kopwe tongeni angang fän iten eü mettoch mi aüchea. Ekkewe goal ka isetiu repwe fokkun älisuk le feffeitä lon pekin ngün me repwe älisuk om kopwe tikeri pwal och wis mi fokkun aüchea.—Fil. 1:10; 1 Tim. 4:15, 16.
Lon än Jises kapas awewe ussun ewe chon amora, a menlapei pwe mi sokkopat uwaaöchün ewe pwul mürinnö. A erä: “Nge ekkewe mi moretiu won pwul murinno, iei ewe mi rong ewe kapas o wewe ren. A fen uwa, ekkoch ra uwani ipuku, ekkoch wone, o ekkoch ilik.” (Mt. 13:23) Ika sia weweiti ena kapas, sipwe pwal ounusalo ach achocho le uwa chommong fän iten lingen Jiowa? Sia mochen uwaani uwaan ewe Mwu lupwen sia fiti ei angangen afalafal fän tinikken. Me sia pwal mochen uwaani uwaan än Jiowa ngün lon manauach iteitan rän. (Jon 15:2, 3; Kal. 5:22, 23) Ach isetiu ekkewe mettoch sipwe annefota lon pekin ngün, epwe älisikich le uwaaöch.
Ewe aposel Paul a isetiu eü leenien äppirü mi mürinnö pwe sipwe äppirü lon ach angang ngeni Kot. (1 Kor. 11:1) Paul a unusen achocho lon än angang ükükün an tufich. A mirititi pwe lon än Jiowa we angang, a suuk ngeni pwal chommong mettoch epwe tongeni föri. Paul a makkei ngeni chon ekkewe mwichefelin Korint: “Pun eu asam lap ngeni angang mi lamot a fen suuk ngeniei.” Kich sipwe pwal ina ussun? Lon ach angang ngeni Jiowa me än we mwichefel, a mmen chommong angang mi suuk ngenikich äkkäeüin lon ewe angangen afalafala ewe kapas allim ussun ewe Mwu. Nge ussun chök Paul, sipwe chechchemeni pwe ach pwerelong lon “eu asam lap” a wewe ngeni pwe epwe wor “chommong chon eppeti.” (1 Kor. 16:9) Paul a nemeni pwisin i iteitan, ussun chök än emön chon kitir a onout ren mettoch meinisin ren an epwe mwäreni epa mwärämwär nge mi chök mwittir morolo. Nengeni met Paul a erä: “Ua pwisin afolu inisi, pwe epwe fakkun nonnom fan nemenien letipei.” (1 Kor. 9:24-27) Sia pwal eäni ena sokkun ekiek?
Chommong ekkewe misineri ikenäi ra eäni ena wis pokiten semer me iner me pwal ekkewe ekkoch ra fen peseer seni me le kükkünür ar repwe achocho ngeni le wiliti misineri me fiti ewe sukulen Gilead. Pwal ussun chök ren chommong chon angangen Bethel ra fen achocho ngeni ar repwe angang lon Bethel lupwen ir mi chüen chök kükkün are lupwen ra kerän silei ewe kapas allim me rongorong ussun ei sokkun angang mi kkolo aüchean.
Mi öch ika meinisin repwe achocho ngeni ekkewe mettochun ngün me ren en me nonnomun manauan. Ikkeei ekkoch goal, achocho le fiffiti angangen afalafal iteiten wiik, nöüni emön chon käeö Paipel, awora fansoun ammolnatä fän iten ekkewe mwich, fiti ewe angangen auxiliary are regular pioneer, angang lon ekkewe leeni mi watte osupwangen chon afalafal ie, awora älillis lon kaütään ekkewe Kingdom Hall me Leenien Mwichelap, angang lon Bethel are wiseni ewe wis misineri. Pwüngün pwe lon ekkewe mwich, mwichelap are pwal lon nöüch kewe puk epwe tongeni wor pesepes ussun pwal ekkoch angang en mi tongeni ekieki om kopwe tikeri me ren pwisin nonnomum. Nge iei ewe mettoch mi lamot pwe kopwe lüküchar me unusen apwönüetä om angang. Ika ka föri ena, kopwe asamolü Jiowa me tikeri ewe goal mi lamot seni meinisin, ina om kopwe angang ngeni Jiowa tori feilfeilo chök.—Luk 13:24; 1 Tim. 4:7, 8.