Lesen 2
Io Ena Kot?
Io ewe Kot mi enlet, me ifa itan we? (1, 2)
A inisini met sokkun inis? (3)
Ifa lapalapan kewe mi sokkolo aucheaar? (4)
Sipwe kan aea ekkewe uluulun me esissin lon ach fel ngeni i? (5)
Ikkefa ekkewe ruu mettoch sipwe tongeni kaeo ussun Kot ren? (6)
1. Aramas ra fel ngeni chommong mettoch. Nge ewe Paipel a erenikich pwe mei wor emon chok Kot mi ENLET. A forata mettoch meinisin lon lang me won fonufan. Pokiten a ngenikich manau, i ewe chok Emon sipwe fel ngeni.—1 Korint 8:5, 6; Pwarata 4:11.
2. Kot a wor chommong itelapan nge eu chok itan. Itan we, JIOWA. Lon lap ngeni Paipel meinisin, ekkewe chon fori rese kan makkei ewe it lon ekkewe Paipel nge ra chok siwili ewe it ngeni SAMOL are KOT. Nge lupwen ekkewe chon mak ra makkei ewe Paipel, ewe it Jiowa a mak arapakan fan 7,000!—Ekistos 3:15; Kol Fel 83:18.
3. A pwal wor inisin Jiowa, nge ese ussun chok inisich. Ewe Paipel a apasa pwe “Kot mi ngun.” (Jon 4:24) Emon ngun, ina eu sokkun manau mi fokkun tekia seni manauach. Esor emon aramas mi tongeni kuna Kot. Jiowa a manau lon lang, nge a tongeni kuna mettoch meinisin. (Kol Fel 11:4, 5; Jon 1:18) Nge, meta ewe ngun mi fel? Esap emon ussun chok Kot. Nge, ina an Kot we manaman.—Kol Fel 104:30.
4. Ewe Paipel a pwarata ngenikich lapalapen Kot kewe. A pwarata pwe tong, pwung, tipatchem, me manaman, ikkena lapalapen Kot kewe mi sokkolo aucheaar. (Tuteronomi 32:4; Hiop 12:13; Aisea 40:26; 1 Jon 4:8) Ewe Paipel a erenikich pwe i emon mi pwal umoumoch, kirokiroch, omusalo tipisin ekkewe ekkoch, kisaseu, me mosonottam. Ussun chok ekkewe nau mi alleasochis, sipwe sotun appiru i.—Efisus 5:1, 2.
5. Sipwe ita chapetiu are iotek ngeni ekkewe uluulun, lios, esissin, are ekkewe pisekin fel? Aapwi! (Ekistos 20:4, 5) Jiowa a apasa pwe sipwe fel ngeni i chok. Esap aeafengen an we ling ren pwal emon are och mettoch. Ese wor manamanen ekkewe uluulun pwe repwe alisikich.—Kol Fel 115:4-8; Aisea 42:8.
6. Epwe ifa ussun sipwe tongeni alapalo ach silei Kot? Sipwe tongeni nengeni forien Kot kewe me ekkekieki ussun minne ra aiti ngenikich. Forien Kot kewe ra pwarata ngenikich pwe a fokkun lapalap an we manaman me tipatchem. Sia kan kuna an tong lon forian kewe meinisin. (Kol Fel 19:1-6; Rom 1:20) Ach sipwe kaeo ewe Paipel ina pwal eu mettoch sipwe tongeni fori pwe sipwe silei Kot. Lon ewe Paipel Kot a erenikich ika i met sokkun Kot. Iwe, a pwal erenikich ussun an we kokkot me minne a mochen fori.—Amos 3:7; 2 Timoti 3:16, 17.
[Ekkewe sasing lón pekin taropwe 5]
Sipwe kaeo ussun Kot seni forian kewe me pwal seni ewe Paipel