“Mettoch Meinisin Üa Föri Fänäsengesin ewe Pworausen Manau”
1. Met emön chon afalafala ewe Mwu a tipemecheres le föri fän iten aramas me pwata?
1 Ewe aposel Paul a lükü pwe mei wor wisan an epwe esilefeili ewe kapas allim ngeni aramas. (1 Kor. 9:16, 19, 23) Pwal ussun chök kich, ach ekieki met epwe öch ngeni manauan aramas lon mwach kkan tori feilfeilo a amwökütükich le akkota ach fansoun pwe sipwe arongafeili ewe kapas allim ngeni meinisin.
2. Lupwen sia fiti ewe angangen afalafal, ifa ussun sipwe tongeni siwili ach we kokkot me pwata?
2 Kütta Ia Aramas Repwe Nonnom Ie me Ineet Atun: Emön chon attau mi angöch esap chök attau ese lifilifil fansoun are leeni, nge epwe küttaöchü ikewe epwe liapeni chommong iik ie pwe tongeni pwou are oturatiu an we chew. Pwal kich, chon “attaua aramas” a lamot sipwe siwili ach kokkot pwe sipwe chuuri chommong aramas lon ach leenien afalafal. Ina minne, sipwe alapalo ach pwapwaiti ei angang mi aüchea lon ach sipwe ionfengeni “sokopaten ik.” (Mt. 4:19; 13:47) Sia tongeni afalafal lekuniol me lesesorisich chök pwe sipwe tongeni chuuri aramas lon imwer? Paul a achocho le aunusöchülo an angangen “pwärätä ewe Pworausen Manau” me nengenifichi ifa ussun a tufichin afalafal ngeni chommong aramas. (Fof. 17:17; 20:20, 24)
3, 4. Atun sia föri ewe angangen afalafal, ifa ussun sipwe siwili napanapen ach afalafal me met mwiriloon?
3 Siwili Om Afalafal pwe epwe Weneiti Minne a Lamot ngeni Aramas: Chon attau ra siwili met sokkun attau repwe tongeni eäni pwe repwe liapeni och sokkun ik. Ifa ussun sipwe afalafala ewe kapas allim ussun ewe Mwu fän eü napanap mi mürinnö ngeni ekkewe aramas lon ach leenien afalafal? Ika sia kerän poputääni ach fos ngeni aramas ussun ekkewe pworaus ra kan ekieki woon sipwe föri ena ren süföl me aüselingöch meefier. (Jem. 1:19) Sipwe tongeni eäni och kapas eis pwe sipwe silei meefier woon och mettoch. (SalF. 20:5) Ekkeei mettoch ra atufichikich le siwili napanapen ach afalafal pwe aramas repwe aüselingöch me ekiekiöchü met ra rongorong. Paul a manaueni “sokun manau meinisin lein sokun aramas ese lifilifil.” (1 Kor. 9:22) Ach tipemecheres le siwili napanapen ach afalafal ina ewe kii mi älisikich le achüngü letipan ekkewe aramas.
4 A ifa me watteen ewe pwapwa ach sipwe uwei ngeni aramas ewe “kapasen feiöch”! (Ais. 52:7) Amwo kich meinisin sipwe föri “mettoch meinisin . . . fänäsengesin ewe Pworausen Manau” pwe sipwe tufichin chuuri chommong aramas. (1 Kor. 9:23)