Sipwe Itá Fiti are Féri Apwapwaan Holiday?

LÓN chómmóng fénú ikenái, aramas ra kan féfféri apwapwaan holiday lón pekin lamalam me pwal ekkewe ekkóch, nge sap minne ra popu seni ewe Paipel. Iwe, ifa populapen ekkena apwapwa? Ika a wor library lón fénúom, kopwe kúna amwararen minne ekkena puken áweween pwóróus ra apasa usun ekkewe holiday mi chéúfetál lón fénúom. Nengeni mwo ekkeei pwóróus fan.

Easter. Iei alon The Encyclopædia Britannica: “Ese wor och pwóróus usun apwapwaan Easter lón ewe Tes mi Fé.” Ifa usun Easter a poputá? A poputá seni ekkewe lamalam mi fel ngeni kot chofona. Ena holiday, itá áchechchemen án Jesus manawsefál, nge ekkewe féffér are eéreni lón rese popu seni ewe lamalamen Chón Kraist. Ren chék áwewe, The Catholic Encyclopedia a apasa: “Chómmóng eérenien ekkewe lamalam mi fel ngeni kot chofona usun apwapwaan pwúksefál ra pacheri Easter. Ewe sokun a liosuetá pwúkusefálin manaw fán March me April.”

Apwapwaan New Year. Lón fénú me fénú, mi sókkofesen ewe rán me ekkewe eéreni fán iten apwapwaan New Year. Iei alon The World Book Encyclopedia usun poputáán ena ránin apwapwa: “Ewe sounemenemen Rom itan Julius Caesar a apwúngaló lón ewe ier 46 me mwen Kraist pwe ewe Ránin New Year epwe fis lón January 1. Chón Rom ra pinini ena rán fán iten Janus, ewe koten ttit, asam me fansoun poputáán mettóch. Iten ewe maram January a iteit seni Janus, ewe a rúúepek wóón mesan, epek a sápeló mwan nge ewe epek a sápeló lúkúsékúrún.” Iwe, apwapwaan New Year a alóngólóng wóón eérenien lamalam mi fel ngeni kot chofona.

Halloween. Iei alon The Encyclopedia Americana: “Ekkewe eéreni are féffér lón fansoun Halloween ra popu seni án Druid [kókkótun án chón Celt mwichen samolfel] fansoun fel me lóóm me mwen poputáán lamalamen Chón Kraist. Ekkewe chón Celt ra féri apwapwaan rúúemén ar kot, emén koten akkar me emén koten ekkewe mi máló . . . , ena apwapwa a fis lón November 1, ina ewe rán án chón Celt New Year a poputá. Ekis me ekis, ena fansoun apwapwa fán iten ekkewe mi máló a kapachelong lón án ewe lamalamen Chón Kraist fel.”

Pwal Ekkewe Ekkóch Holiday. Sise tongeni apwóróusa ekkewe holiday meinisin mi fiffis wóón unusen fénúfan. Iwe nge, Jiowa ese tipeeú ngeni ekkewe holiday mi átekiatáái aramas are ar kewe mwicheich. (Jeremaia 17:5-7; Föför 10:25, 26) Sipwe pwal chechchemeni pwe minne ekkena holiday ra popu seni repwe affata ika iir mi apwapwaai Kot are rese. (Aisea 52:11; Pwärätä 18:4) Ekkewe kapasen emmwen mi mak lón Sópwun 16 lón ei puk ra pwal tongeni álisuk le silei ekiekin Kot usun án aramas fiti are féri ekkena apwapwaan holiday esap án lamalam.