Pworun Kapas Eis

◼ Iir me rüüemön ekkewe sam me in repwe repotei ewe fansoun ra äeä fän iten ewe käeöön famili iteitan?

Inaamwo ika äkkäeüin wisen ewe sam an epwe awora “amirit me fonou me ren ewe Samol” fän iten nöür kewe, nge mi lamot ir me rüüemön repwe älillisfengen. (Ef. 6:4) Iei än ewe Paipel pesepes ngeni ekkewe nau: “Nei kopwe aüselinga än semom kewe kapasen öüröür, nge kosap aleasolap ngeni mine inom a aiti ngonuk.” (SalF. 1:8) Ewe kokkotun käeöön famili mi fokkun älillisöch ngeni ekkewe sam me in lon ar käit ngeni nöür kewe.

Me loom, emön chök me lein ekkewe sam ika in a wisen emmweni ewe käeö ngeni nöür kewe resaamwo papatais, iwe, i chök a tongeni repotei ewe awa, inaamwo ika iir me rüüemön ra nom atun ewe fansoun käeö. Iwe nge, iei a siwil. Ika ekkewe sam me in repwe älillisfengen le käeö ngeni nöür kewe atun ar famili käeö, iwe, iir me rüüemön repwe tongeni repotei esap lu seni eü awa iteiten wiik. Pwüngün pwe ekkewe sam me in ra kan nöüni lap seni eü awa lon eü wiik le käeö ngeni nöür kewe. Pun mi lamot ar repwe emiritiir iteiten fansoun meinisin. (Tut. 6:6-9) Iwe nge, ewe awa sia kan repotei iteiten maram a äkkäeüin weneiti ewe awa sia äeä le afalafal ngeni aramas ese lifilifil. Ina minne, repwe chök tongeni repotei esap lu seni eü awa iteiten wiik, inaamwo ika ewe käeö a lu seni eü awa, are ra käeö fän fite lon eü wiik, are emön me emön nöür kewe mi pwisin imulo ar fansoun käeö. Pwal och, emön chök me leir epwe wisen repotei ewe Bible study me ewe return visit iteiten wiik ra käeö ngeniir.