Lesen 15

Chiechien Kot Ra Fori Minne Mi Murinno

Lupwen mei wor chiechiom en mi saani me sufoliiti, kopwe sotun le appiru lapalapan. “Ewe SAMOL mi murinno o pung,” alon ewe Paipel. (Kol Fel 25:⁠8) Ika sia mochen wiliiti chiechien Kot, sipwe pwal murinno me wenechar. Ewe Paipel a era: “Appiru Kot, usun chok noun kewe mi achengicheng. Iwe, oupwe fefetal lon tong.” (Efisus 5:​1, 2) Ikkeei ekkoch mettoch kopwe tongeni fori:

Alisi aramas. “Sipwe fofor-murinno ngeni aramas meinisin.”​​—⁠Kalesia 6:​10.

Angang weires. “Chon sola esap chuen solani, nge epwe chon angang o fori ren poun minne mi murinno.”​​—⁠Efisus 4:​28.

Tumunu limochum lon pekin aion me ren pekin lisowu. “Sipwe alimelimochu pwisin kich seni sokkun limengauen fituk meinisin me limengauen ngun meinisin, o sipwe aunusalo ach manau mi fel ren niuokusun Kot.”​​—⁠2 Korint 7:⁠1.

Tongei me sufoliiti chon om famili meinisin. “Inaamo, nge ami mwan kena, oupwe chok tongei en me puluan usun chok pwisin ami, pwal ewe fefin epwe menniniti puluan we. Ami semirit kena, oupwe alleasochisi sememi kewe me inemi lon ewe Samol.”​​—⁠Efisus 5:⁠33–​6:⁠1.

Pwaralo om tongei aramas. “Sipwe chok tongfengen lefilach. Pun tong a pop seni Kot.”​​—⁠1 Jon 4:⁠7.

Alleasochisi allukun fonuom. “Aramas meinisin repwe alleasochisi ewe mu mi nemeni ir. . . . Oupwe ngeni ekkewe tettelin aramas meinisin minne mi fich ngenir.”​​—⁠Rom 13:​1, 7.