Lesen 18
Chiechi Ngeni Kot Tori Feilfeilo Chok!
Epwe lamot ach sipwe angang ngeni chiechi ika sia mochen chiechioch me tumunuochu ach chiechi ngeni emon. Om angang le wiliiti chiechien Kot me tumunuochu ena chiechi epwe atoto ngonuk feioch wachemuk. Jises a apasa ngeni chokkewe mi eani luku lon i: “Minne mi enlet epwe angasalo ami.” (Jon 8:32) Met weween?
Kopwe tongeni pwapwaiti eu ngaselo iei. Kopwe tongeni ngaselo seni an Setan kewe afalafal me kapas chofona. Kopwe tongeni ngase seni ewe apilukulukungau a fen tori fite milion aramas rese silei ussun Jiowa. (Rom 8:22) Chiechien Kot kewe ra ngase seni pwal mwo ar “niueiti malo.”—Ipru 2:14, 15.
Kopwe tongeni pwapwaiti eu ngaselo lon an Kot fonufan sefo. A ifa me amwararen ewe ngaselo kopwe tongeni pwapwaiti lon mwach kkan! Lon ewe Paratis won fonufan, aramas repwe ngase seni maun, semmwen, me atai alluk. Repwe ngase seni woungau me echik. Resap chuen chinnapelo me malo. Resap chuen niuokkus, riaffou, me pwungungau. Ewe Paipel a apasa ussun Kot: “Ka suukalo poum, o ka amotalo mettoch meinisin minne mi manau.”—Kol Fel 145:16.
Chiechien Kot repwe manau tori feilfeilo chok. Manau esemuch eu liffang mi auchea Kot a ngeni ir meinisin mi kutta ar chiechioch ngeni i. (Rom 6:23) Ekieki mwo weween eu manau esap muchulo!
Kopwe taweoch le fori chommong mettoch. Neman en emon a mochen kaeo ngeni och pisekin nikattik. Are eli ka mochen kaeo ifa ussun kopwe chungani lios are fori angangen taiku. Neman ka mochen alapalo om sile ussun ekkewe man are ekkewe ira. Eli ka mochen saifetal me kuna ekkewe sokkopaten fonu me aramas. Ika kopwe manau esemuch, kopwe tawe le foriir!
Kopwe tawe le chiechioch ngeni chommong aramas. Om manau tori feilfeilo chok epwe atufichi om chiechi ngeni chommong aramas ra fen wiliiti chiechien Kot. Kopwe sile ar kewe tufich me lapalap mi murinno me repwe pwal wiliiti chiechiom. Kopwe tongeer me repwe tongeok. (1 Korint 13:8) Pokiten manauom esap much, kopwe tongeni chiechioch ngeni aramas meinisin won fonufan! Ewe a murinno seni ena, om chiechioch me Jiowa epwe poppochokkulelo ren fetallin ekkewe ier. Amwo kopwe chiechioch me Kot tori feilfeilo chok!