Káé Seni Án Kot we Kapas

Pwata A Lamot Sipwe Néúnéú Iten Kot We?

Lón ei lesen a wor ekkewe kapas eis eli ka fen eáni me epwe áit ngonuk ia kopwe tongeni kúna me ie pélúwer seni noum Paipel. Chón Pwáraatá Jiowa repwe pwapwa le pwóróus ngonuk usun pélúwen ekkeei kapas eis.

1. Pwata Kot a awora pwisin itan?

Ese mwáál, ka sani án aramas repwe kér ngonuk pwisin itom lap seni och itelap, usun choweán “mwán,” “mister,” are “fefin.” Eú it a assókkofesenuk seni ekkewe ekkóch. Aramas ra kéri Kot ren ekkewe sókkun itelap usun chék “Ai Samol me ai Kot,” “Kot mi Unusen Manaman,” me “Chon Forata.” (Keneses 15:2; 17:1; Kölfel 149:2, TF) Nge i a pwal awora pwisin itan pwe epwe álisikich le ririéch ngeni. Lón fósun Chuuk, Jiowa, ina wesewesen iten Kot we.​—Álleani Aisea 42:8.a

Inaamwo ika chómmóng chón afféwú Paipel ra siwili ewe iten Kot ngeni ekkóch itelap, áwewe chék ren “Kot” me “Samol,” nge ena it a mak arapakkan fán 7,000 lón ekkewe kapiin Paipel minen lóóm lón fósun Ipru. A ffat pwe Kot a mochen pwe aramas repwe silei itan.​—Álleani Aisea 12:4.

2. Pwata a lamot ach sipwe silei iten Kot?

Ach silei iten Kot ese chék wewe ngeni ach silei newenewen itan we. Sia silei Kot ren itan ika a wor ach ririéch ngeni i. Ewe it Jiowa a wewe ngeni “A Efisi An Epwe Wiliiti.” A eú minen alúkúlúk pwe Kot epwe wiliti minne chék a lamot fán iten an epwe apwénúetá minne a tipeni. Ina minne, ach silei iten Kot a wewe ngeni ach lúkú pwe i epwe apwénúetá an kewe pwon. (Kölfel 9:10) Lúkúen ekkewe aramas mi silei Kot me nénnéúnéú itan we, a amwékútúúr le lúkúlúk wóón me akkomwa i lón manawer. Jiowa Kot epwe túmúnú ekkena esin aramas.​—Álleani Kölfel 91:14.

3. Pwata Kot a mochen aramas repwe silei itan?

Kot a mochen aramas repwe silei i ren itan pun a tongeni amúrinnéló manawer. A suuk ngeniir ar repwe wiliti chiechien Kot me eáni eú ápilúkúlúkún manaw esemuch. Ina popun, Jiowa a mochen ach sipwe pwáraaló itan we.​—Álleani Johannes 17:3; Rom 10:13, 14.

Jesus a pwáraaló iten Kot we ren an asukula aramas usun án Kot kewe féffér, an kewe allúk me an kewe pwon. Lón ei fansoun, néún Jesus kewe chón káé ra sópweló ei angangen esilefeili iten Kot we ngeni ekkewe mwú meinisin. Ra féri ei angang usun eú mwichen ‘aramas fan asengesin iten’ Kot, iir mi tipeeúfengen.​—Álleani Föför 15:14, TF; Johannes 17:26.

4. Ifa usun Kot epwe elingaaló itan we?

Jiowa a mochen elingaaló itan we pun a fen itengaw. Áwewe chék, ekkóch aramas ra erá pwe esap i a fératá mettóch meinisin, me ese lamot ar repwe álleasochisi i. Ekkóch ra erá pwe ese chúngúkich me a efisi riáfféú wóón ei fénúfan. Ekkena aramas ra eitengaw iten Kot, nge minne ra féri epwe muchuló. Pun Kot epwe nieló chókkewe mi ésúfélúngawa itan we.​—Álleani Kölfel 83:17, 18.

Jiowa epwe elingaaló itan we lupwen an we Mwú epwe ataieló mwúún aramas meinisin me enniwilató kinamwe me núkúnúkéch ngeni aramas. (Taniel 2:44) Ekiseló chék, meinisin aramas repwe silei pwe Jiowa, i ewe Kot mi enlet.​—Álleani Isikiel 36:23; Mateus 6:9.

Met itá kopwe féri? Arap ngeni Kot ren om kákkáé an we Kapas me chiechi ngeni chókkewe mi tongei i. Lupwen Jiowa epwe elingaaló itan, epwe chechchemeni néún kewe chón angang mi tuppwél.​—Malakai 3:16.

Ren pwal ekkóch pwóróus, ppii sópwun 1 lón ei puk, Met Ewe Paipel A Wesewesen Apasa?, férien Chón Pwáraatá Jiowa.

[Sasing lon pekin taropwe 10]

Iten Kot we a mak lón ewe kapiin Paipel minen lóóm lón fósun Ipru