Ewe Paipel a fen oesini pwe mwirin málóón Kraist, epwe wor sense chofona lein ekkewe Chón Kraist me lóóm, me repwe atokaló ewe enlet seni Paipel. (Föför 20:29, 30) Ló, ló, ló, ina met a wesewesen fis. Ra nofitifengeni áitien Jesus kewe me áitien ekkewe lamalam mi fel ngeni ekkewe kot chofona, iwe mwirin, a wililó ngeni eú sókkun tipitipin Chón Kraist. (2 Timoty 4:3, 4) Ifa usun sia tongeni lúkúlúk pwe ikenái mi pwúng ach weweiti met ewe Paipel a wesewesen apasa?

A tori ewe fansoun Jiowa epwe pwári ewe enlet. A oesini pwe atun ewe ‘fansoun sopolan, epwe lapala’ ewe sile mi enlet. (Taniel 12:4) Lón 1870 eú kúkkún kúmiin chón kútta ewe enlet a mirititi pwe chómmóng án ekkewe lamalam afalafal rese pop seni ewe Paipel. Ina minne, ra poputá le kúkkútta ar repwe weweiti án Paipel kewe popun afalafal, iwe, Jiowa a álisiir le weweiti ewe Paipel.

Ekkóch mwán mi letip wenechar ra káéfichi ewe Paipel. Ei Chón Káé Paipel mi tinikken, ina iten Chón Pwáraatá Jiowa me lóóm, a eáni eú tettelin napanapen káé, iwe ei sókkun káé aua chúen ákkáeá tori ikenái. Ra pwóróusfengen wóón eú me eú itelap. Atun ra tori eú pwóróus lón Paipel mi weires ar repwe weweiti, ra pwal katol ekkóch wokisin mi áweweei ena pwóróus. Atun minne ra apwúngaló a tipeeú ngeni ekkewe wokisin lón Paipel, iwe, ra makkeretiw. Ren ar féri ena, ra mut ngeni án Paipel epwe pwisin affata ekkena pwóróus. A pwásefál ewe enlet usun iten Kot we me an we Mwú, minne a fen tipeni me lepoputáán fán iten aramas me fénúfan, napanapen ekkewe mi máló me ewe ápilúkúlúkún manawsefál. Ar kúkkútta ekkena pwóróus mi enlet, a angasereló seni chómmóng lúkú me eéreni mi chofona.​—Johannes 8:31, 32.

Lupwen a tori 1879, ekkewe Chón Káé Paipel ra mirititi pwe a tori ewe fansoun pwe ewe enlet epwe pwáló ekis meinisin. Iwe lón ena ier, ra poputá le féri ewe puk itan Ewe Leenien Mas A Esilefeili Án Jiowa We Mwú. Iwe ina ewe puk aua chúen peresei tori ikenái. Iei aua ákkáiti ngeni aramas ewe enlet seni Paipel lón lap seni 240 fénú me lón lap seni 750 sókkun fósun fénúfan. A fen kon lapoló ewe sile mi enlet lap seni lóóm!

• Met a fis ngeni ewe enlet lón ewe Paipel mwirin málóón Kraist?

• Met a atufichikem le kúnasefáli ewe enlet seni án Kot we Kapas?

Ren fite fite ier, Chón Pwáraatá Jiowa ra néúnéú, peresei, me eineti och sókkun afféún ewe Paipel. Nge mwirin, aua kúna lamoten ám aupwe pwisin féri eú mineféén afféún Paipel pwe epwe álisi aramas le “sineifichi minne mi enlet,” pwe ina letipen Kot ngeni aramas meinisin. (1 Timoty 2:3, 4, Testament Mi Fö Pwal Kol Fel) Ina minne, lón 1950 ám aua poputá le atowu néúm we Paipel, itan New World Translation lón ewe sókkun fós aramas ra kan nénnéúnéú. Ei Paipel a fen kon pwúng afféún lón lap seni 130 fós.a

A lamot eú Paipel mi mecheres ngeni aramas ar repwe weweiti. Fósun fénúfan a kan sissiwil, me chómmóng afféún Paipel ra masou ren ekkewe sókkun kapas are mwuten kapas aramas rese chúen nénnéúnéú, iwe, a weires án aramas repwe weweiti. Pwal och, ra kúna ekkewe Paipel minen lóóm mi fataffatéch me kkan ngeni kapasen lón ekkewe populapen taropwe. Iwe, a álisiir le weweéchúti ekkewe kapasen Ipru, Aramaic, me Krik, ekkewe fós Paipel a makketiw lón.

A lamot eú afféún Paipel epwe chék fiti kapasen lón ewe kapasen Kot. Ekkewe chón afféwú ewe Paipel repwe itá chék fiti kapasen ewe populapen kapi, nge resap siwili kapasen án Kot kapas mi pin. Iwe nge, lón lap ngeni sókkópaten afféún Paipel, ese nóm ewe it mi pin, Jiowa.

A lamot eú Paipel mi elingaaló ewe Sou Emmwenin Makkan. (1 Tesalonika 2:13) Iten Jiowa we a nómsefál lón ewe New World Translation ikewe ie itá a fen mak fán 7,000 som lón ekkewe kapiin Paipel minen lóóm lóóm, usun sia kúna lón ena lios fan. Mwirilóón ar tinikken ren fitu ier le kúttafichi pwóróus, a efisi ach pwapwaiti le álleani ei Paipel pun a fataffatéch an áweweei ekiekin Kot. Ese lifilifil ika a wor are ese mwo wor ewe Paipel New World Translation lón fósun fénúom, nge ám aua peseok le eérenaaló le ákkálleani án Jiowa we Kapas iteiten rán.​—Josua 1:8; Kölfel 1:2, 3.

• Pwata ám aua filatá pwe mi lamot epwe wor eú mineféén afféwún Paipel?

• Ifa ewe mettóch mi múrinné chókkewe mi mochen káé letipen Kot repwe féri iteiten rán?