Chómmóng aramas ra fen úkútiw seni ar fiffiti angangen ar kewe lamalam, pokiten rese kúna álillis ren pélúwen ar kewe kapas eis mi kon lamot lón manawer are ouruur. Iwe, pwata kese fiti án Chón Kraist kewe mwich mi fis kkótun me ren Chón Pwáraatá Jiowa? Met kopwe kúna me lón ekkena mwich?

Apwapwaan om nom lein aramas mi eáni tong. Le manawen ekkewe aposel, ekkewe Chón Kraist ra nóm lón ekkewe mwichefel me féri ar kewe mwich pwe repwe fel ngeni Kot, káé ewe Paipel, me apéchékkúlafengeniir. (Ipru 10:24, 25) Ra chufengen lón ar kewe mwich mi ur ren tong, me ra meefi pwe ra nóm lein chiechier mi enlet, weween pwiir kewe lón pekin lúkú. (2 Tesalonika 1:3; 3 Johannes 14) Sia áppirú napanapen án ekkewe Chón Kraist lóóm kewe mwich me kúna ewe sókkun pwapwa ra pwal kúna.

Feiéchún ach kákkáé ifa usun sipwe apwénúetá án Paipel kewe kapasen emmwen. Ekkewe mwán, fefin me semirit ra mwichfengen lón ewe napanap Paipel a fen áweweei. Ekkewe souemwen mi lipwákéch ra néúnéú ewe Paipel le álisikich le silei ifa usun sipwe apwénúetá ekkewe kapasen emmwen lón manawach iteiten rán. (Tuteronomi 31:12; Nehemia 8:8) Oukich meinisin sia tongeni uwawu meefiach me kél, iwe, a atufichikich le pwári ach ápilúkúlúkún Chón Kraist.​—Ipru 10:23.

Feiéchún an a péchékkúleló om lúkú Kot. Ewe aposel Paulus a ereni eú me lein ekkewe mwichefel le mwúún we: “Üa fokun mochen churikemi . . . pwe ämi me ngang sipwe apöchökülafengenikich ren ach lükülük.” (Rom 1:11, 12) Ach chichchiechi ngeni pwiich kewe chón lúkú atun ach kewe mwich, a apéchékkúla ach lúkú me úppos le manaweni manawen Chón Kraist.

Pwata kese etiwa ám etiwetiw ngonuk le fiti ám kewe mwich me pwisin kúna napanapen ám kewe mwich? Ka fókkun ketiw. Ám kewe mwich an Chón Kraist ese kamé.

• Napanapen án ié kewe mwich sia áppirú?

• Ifa usun sia tongeni pwisin feiéch ren ach fiffiti an Chón Kraist kewe mwich?

Inaamwo ika aua fetál lein petewel mi kiroch are fansoun ráningaw, nge aua fiffiti án Chón Kraist kewe mwich iteitan. Pwata ekkewe Chón Pwáraatá Jiowa ra achocho le mwichfengen me chiener kewe chón lúkú, inaamwo ika ra kúna osukosuk lón manawer are pekkus sáriir me angang?

Chiechi lón mwich a efisi ám pwapwa. Paulus a makkeei: “Sipwe ekiekifichi  . . . emon me emon lefilach,” a fósun chókkewe sia chiechi ngeniir lón ewe mwichefel. (Ipru 10:24, TF) Ena itiitin kapas a wewe ngeni ach sipwe sissilefengenikich. Iwe, alón Paulus na a pesekich ach sipwe chúngú ekkewe ekkóch. Ren ám sissileeló chón lón ewe mwichefel, aua silei pwe ekkóch me leir ra fen sópwéch le pwákini ar kewe osukosuk usun chék ach kewe, me ra pwal tongeni álisikich le sópwéch.

Ekkewe mwich ra aworato chiechi mi núkúchar. Atun ám kewe mwich aua chufengen me chiechiem kewe aua kon chiechiéchfengen. Fán ekkóch aua chufengen pwe aupwe eáni ekkewe sókkun kunou mi fich. Met mwirilóón ekkena sókkun kunou? Ám aua káé le akkaúcheanaalo emén me emén, me a péchékkúleló ám ririin tong. Atun pwiim kewe ra nóm lón osukosuk, aua mmolnetá le álisiir pwe a fen péchékkúl ewe chiechi lefilem. (Än Salomon Fos 17:17) Ám chiechi ngeni meinisin chón ewe mwichefel, a pwári pwe aua ‘chüngüfengenikem.’​—1 Korint 12:25, 26.

Aua peseok le filatá chiechiom me lein chókkewe mi féfféri letipen Kot. Kopwe kúna ekkena sókkun chiechi lein ekkewe Chón Pwáraatá Jiowa. Kosap mut ngeni och mettóch epwe pineuk le chiechi ngenikem.

• Pwata ám aua kon aúcheani ám chiechifengen lón ekkewe mwich?

• Ineet kopwe chiechi ngeni chón ám mwichefel?

Ikeei met a wesewesen fiffis lón án ekkewe Chón Kraist lóóm kewe mwich, ra kél, iótek, állea me pwóróusfengen usun ewe Paipel. (1 Korint 14:26) Ese sókkóló minne kopwe pwal kúna lón ám kewe mwich.

Kapasen éúréúr mi lóngólóng wóón Paipel me mi fichiiti manawach. Eú me eú mwichefel ra mwichfengen lón Ráninfel, pwe repwe aúseling lón 30 minich eú afalafal seni Paipel mi weneiti manawach me ei fansoun sia nónnóm lón. A lamot kich meinisin sipwe nelong lón pwisin néúch Paipel me fiti álleaan. Mwirin ena afalafal, a pwal wor eú Káéén “Ewe Leenien Mas,” úkúkún eú awa. A suuk ngeni chón mwich ar repwe uwawu meefier lón káéén ewe lesen lón Ewe Leenien Mas. Ei káé a álisikich le apwénúetá án Paipel kapasen emmwen lón manawach. Lap seni 110,000 mwichefel wóón unusen fénúfan ra pwal káé ena lesen.

Ám aua angei álillis pwe aupwe lipwákéchúló lón ám tufichin asukul. Aua pwal mwichfengen leólopan are lekuniolun eú ekkewe rán lúkún Ammol me Ráninfel le eáni ekkewe úlúngát kinikinin mwich itelapan, Manawach Chón Kraist me Ach Angangen Afalafal. Ena mwich a alóngólóng wóón ekkewe taropwe mi kawor iteiten maram itelapan, Manawach me Ach Angangen Afalafal Minen Káé fán Iten Mwich. Ewe áeúin kinikinin ena mwich, ewe Pwóróus Aúchea Seni Kapasen Kot, a álisikich le sileéchú ekkóch wokisin lón Paipel nge ewe mwichefel ra fen álleani me mwan. Mwirin, ewe Elipwákéchuk lón Angangen Afalafal, a kapachelong lón ekkewe pwoomw mi áiti ngenikem ifa usun aua tongeni pwóróusfengen usun Paipel ngeni ekkewe ekkóch. Ewe chón emmweni ena sukul epwe nengeniéchú ám angang lón ewe sukul pwe epwe álisikem le lipwákéchúló lón ám tufichin állea me fós. (1 Timoty 4:13) Ewe sáingolóón, ewe Manawen Chón Kraist, lón ena kinikin aua pwóróusfengen ifa usun a mmen álilliséch ám aupwe apwénúetá án Paipel kapasen emmwen lón manawem iteiten rán. A pwal wor kapas eis me pélúwan pwe epwe alapaaló ám weweiti ewe Paipel.

Atun ka fiti ám kana mwich, enlet kopwe fókkun mwaar ren aúchean ewe asukul ka angei seni Paipel.​—Aisea 54:13.

• Met ka ekieki kopwe rong lón án Chón Pwáraatá Jiowa kewe mwich?

• Menni mwich mi fis iteiten wiik ka mochen kopwe fiti fán eú?