Eáni Leenien Áppirú Ekkewe Soufós Usun Osea
1. Ifa ewe kapas eis neman ka fen pwisin eisinuk?
1 Atun ka ekilonei usun watteen múrinnéén me úméúméchún Jiowa, neman ka fen eáni ei kapas eis: ‘Met sókkun mettóch ua tipemecheres le pennúkú fán iten Jiowa?’ (Kölf. 103:2-4; 116:12) Osea a tipemecheres le féri minne Kot a allúk ngeni inaamwo ika a lamot an epwe pennúkú pwisin mochenin. Ifa usun sipwe áppirú Osea?
2. Ifa usun sipwe tongeni áppirú án Osea leenien áppirú mi múrinné ren an likiitú lón ewe angangen afalafal?
2 Afalafal lón Fansoun Weires: Ewe pwóróus Osea a uwei, a ákkáeúin kawor fan iten ekkewe engol einangen mwúún Israel mi úkútiw le eáni ewe fel mi enlet. King Jeropoam a féri minne mi ngaw mwen mesen Jiowa me a achéúfetálei ewe angangen fel ngeni kou, ewe king pwal itan Jeropoam a poputááni. (2 King 14:23, 24) Ekkewe king mwirin mi wisen nemeni ekkewe engol einang, ra sópweló le efisi án ekkewe aramas úkútiw le fel ngeni Kot tori ewe kata a fis lón 740 B.C.E. Inaamwo ika a chéúfetál fel mi chofona, nge Osea a tuppwél lón wisan we soufós ren úkúkún 59 ier are lap seni. Nge kich, sia pwal úppós le akkafalafal ren fitu fitu ier inaamwo ika aramas ra tanechepwak are ú ngenikich?—2 Tim. 4:2.
3. Ifa usun pwóróusen manawen Osea a liosuetá úméúméchún Jiowa?
3 Nefotofot Wóón Úméúméchún Jiowa: Jiowa a allúk ngeni Osea an epwe ‘angei eman fin lisowu pwe pwülüan.’ (Os. 1:2) Inaamwo ika pwúlúwen Osea we itan Komer a néúni emén át me wóón nge a ffat pwe mwirin, a pwal néúni rúúemén nge esap me wóón Osea. Án Osea tipemecheres le omusaaló tipisin pwúlúwan we a liosuetá watteen án Jiowa úméúméch ngeni ekkewe chón Israel atun ra áiersefál. (Os. 3:1; Rom 9:22-26) Sia pwal tipemecheres le pennúkú pwisin mochenich pwe sipwe pwári ngeni aramas meinisin usun úméúméchún Jiowa?—1 Kor. 9:19-23.
4. Ikkefa ekkóch mettóch sia tongeni pennúkúóló fán iten Jiowa?
4 Ekkóch me lein néún Jiowa kewe chón angang ra pennúkúóló angang mi watte peioffun are winnan pwe repwe alapaaló ar fansoun le afalafal. Ekkóch ra filatá ar repwe lipich are filatá ar resap néúnéú ren ar repwe akkomwa Mwúún Kot we. Ika sia ekilonei pwóróusen manawen Osea, iwe neman sipwe pwisin ekieki: ‘Use fókkun tongeni féri met a féri.’ Iwe nge, atun a mámmááritá ach aúcheani watteen kirekiréchún Jiowa me lúkúlúk wóón an we manaman mi fel an epwe apéchékkúlakich, neman epwe néúnéú kich lón och sókkun napanap sise fókkun ekieki pwe sipwe tongeni féri, usun chék met a fis ngeni Osea.—Mat. 19:26; Fil. 2:13.