Ren ám aupwe apwénúetáéchú wisem le esilefeili ewe kapas allim ngeni “sokun mwich me ainang, kapas me mwü meinisin,” aua féri ekkewe puk lón lap seni 750 fósun fénú. (Pwärätä 14:6) Ifa usun aua féri ei angang mi watte? Ren álillisin ekkewe chón mak pwóróus seni sókkópaten fénú me eú kúmiin chón afféú mi tuppwél, iir meinisin Chón Pwáraatá Jiowa.

Ewe pwóróus lón néúm kewe puk a kan akkomw mak lón fósun Merika. Ewe Mwichen Soupwúngúpwúng a túmúnú angangen ewe Ofesin Pekin Mak lón ám we ofesilap. Ei ofes a akkóta me ewisa ngeni ekkewe chón mak lón ám we ofesilap are lón ekkóch keangen ofesilap minne repwe makkeei. Pokiten ekkewe kúmiin chón mak ra feito seni sókkópaten fénú, iwe ra tongeni makkeei ekkewe sókkun pwóróus lón néúm kewe puk aramas seni sókkópaten fénú repwe pwapwaiti.

Ewe pwóróus a titiiló ngeni ekkewe chón afféú. Mwirin an a chek me kapwúngúló ewe pwóróus, iwe a titiiló lón computer ngeni ekkewe chón afféú wóón unusen fénúfan pwe repwe afféúni. Ra achocho le kútta “kapas mi . . . pwüng” pwe minne repwe afféúni epwe unusen wewefengen me minne a mak lón fósun Merika.​—Än Salomon Afalafal 12:10.

Ekkewe computer ra emwittiri ewe angang. Computer esap tongeni féri wisen ekkewe chón mak me ekkewe chón afféú. Iwe nge, computer a tongeni ámecheresi ar angang ren ekkewe dictionary, minen álillis lón pekin afféú, ekkewe minen kútta weween pwóróus me metakkan. Chón Pwáraatá Jiowa ra féri eú minen prokram lón computer itan MEPS mi atufichi an epwe taipelóng ewe pwóróus lón fitepúkú sókkópaten makken fénú, iwe ena prokram a tongeni ochufengeni ewe pwóróus mi fen taipelóng fitifengen me ekkewe chúnga are sasing. Iwe mwirin, a anapanapaéchú me ammolnatá an epwe peres.

Met popun aua achocho le féri meinisin ekkeei angang pwal mwo nge fán iten ekkóch fósun fénú fite ngeréú chék aramas ra eáni? Popun, pun letipen Jiowa pwe “aramas meinisin repwe küna manau, repwe pwal silei ewe let.”​—1 Timoty 2:3, 4.

• Ifa usun a fis angangen makken néúch kewe puk?

• Met popun aua afféúni néúm kewe puk lón chómmóng sókkópaten fósun fénú?

Ám mwicheich a peresei me eineti fitepúkú million Paipel me ekkóch puk iteiten ier nge rese kamé. Aua aúetá me túmúnú ekkewe Leenien Mwich me keangen ofesilap. Aua túmúnú fitengeréú chón Bethel me ekkewe misineri, pwal awora álillis lón fansoun feiengaw watte. Ina pwata, eli kopwe ekieki, ‘Ia a feito me ie ewe moni pwe epwe pwénúetá ekkeei angang?’

Ám ause eáni asor ewe leengol, assawa sepien asor me ese kamé ám féri felin apwúpwúlú, papatais me metakkan. Inaamwo ika a watte moni towu fán iten ekkeei angang mi álisatá ewe angangen afalafal, nge ause tingor fetál moni. Lap seni ipúkú ier ra lo, oruuen peresin néúm we puk Watchtower a apasa pwe aua lúkú pwe Jiowa, i ám chón álillis, iwe ausap “fókkun tingorei aramas ren ar álillis” me seni lóóm tori ikenái esap mwo fán eú aua tingor!​—Mateus 10:8.

Ekkewe asor ra álisatá ám kewe angang. Chómmóng aramas ra aúcheani ám ei angangen asukula aramas ewe Paipel, iwe, ra awora ar monien álillis. Pwal pwisin ekkewe Chón Pwáraatá Jiowa ra pwapwa le fangoló ar fansoun, péchékkúl, néúr moni me pwal ar tufich fán iten pwénútáán letipen Kot ngeni unusen fénúfan. (1 Kronika 29:9) Lón ewe Leenien Mwich a kawor ekkewe pworun asor, ikena ie chókkewe mi mochen awora álillis ra tongeni isenalong ie are áeá ám website, jw.org, fán iten ar repwe awora asor. Lap ngeni ewe monien álillis a feito seni chókkewe rese wéúéch, usun chék ewe fefin mi má pwúlúwan Jesus a ingeiti pun inaamwo ika a wéúngaw, nge a asor seni mochenin letipan. (Lukas 21:1-4) Ina minne, emén a tongeni “aimwüela och alilis” iteitan pwe epwe fang seni pwisin “mefien letipan.”​—1 Korint 16:2; 2 Korint 9:7.

Aua lúkúlúk pwe Jiowa epwe akkamwékútú letipen chókkewe mi mochen ‘asamolu i ren ar fang ngeni seni wour,’ fán iten kálisitáán angangen ewe Mwú, pwe epwe pwénúetá letipan.​—Än Salomon Fos 3:9.

• Met a asokkaalóói ám mwicheich seni ekkewe pwal ekkóch lamalam?

• Ifa usun ám we mwicheich a áeá ekkewe asor?

Me lón ekkewe Leenien Mwich a kan kakkatowu ewe pwóróus seni Paipel mi itelapei Mwúún Kot, nge pwal ina itelapen án Jesus afalafal.​—Lukas 8:1.

Iir leenien ewe fel mi enlet lón ewe leeni. Seni ena leeni ekkewe chón afalafal ra akkóta ar we angangen afalafala ewe kapas allim usun ewe Mwúún Kot me ie. (Mateus 24:14) Mi sókkópat saisin me napanapen ekkewe Leenien Mwich, nge iir meinisin mi chék úkúkéch me rese eingeing. Chómmóng leir lap seni eú mwichefel ra áeá. Pokiten chómmóngólóón chón afalafal me ekkewe mwichefel, iwe, lón ekkewe ier kukkuto chék, aua fen aúetá fite ngeréú mineféén Leenien Mwich, (usun nimu Leenien Mwich ra kaú iteiten rán). Ifa usun a tongeni pwénútá ei angang?​—Mateus 19:26.

Ra kaú ren ekkewe asor mi feito seni ekkewe asor fán iten ewe kókkótun Angangen Kaú Leenien Mwich. Ekkewe asor ra titiiló ngeni ewe keangen ofesilap pwe epwe kawor ngeni ekkewe mwichefel mi osupwangen Leenien Mwich are an epwe fférsefál.

Ra kaú ren álillisin ekkewe chón angang rese peiof mi sókkópat nonnomur me ar angang. Lón chómmóng fénú a fen kkótóló ekkewe Kúmiin Chón Kaú Leenien Mwich. Ekkewe kúmiin chón angang me ekkewe volunteer ra mwékút ngeni ekkewe leeni ikewe ia repwe kaú Leenien Mwich ie, pwal mwo nge lón ekkewe leeni mi towau, pwe repwe emmweni ewe angangen kaú, me áiti chón ekkewe mwichefel ena esin angang. Lón pwal ekkóch leeni a kefilitá ekkewe ekkóch Chón Pwáraatá mi sipeéch pwe repwe emmweni kaútáán me fférsefálin ekkewe Leenien Mwich mi nóm fán túmúnúan. Inaamwo ika mi wor chómmóng volunteer mi lipwákéch lón angangen paw ra álillis, nge lón eú me eú angangen kaútáán ekkewe Leenien Mwich, lap ngeni ekkewe chón álillis iir chón ena mwichefel. Ren álillisin án Kot we manaman me án néún kewe aramas angang weires, a tongeni pwénútá ei angang.​—Kölfel 127:1; Kolose 3:23.

• Ifa usun ewe angangen kaú Leenien Mwich wóón unusen fénúfan a pwénútá?