SÓPWUN NIMU
Áiti Néúmi we Seni Lekúkkúnún
1, 2. Án ié álillis ekkewe sam me in repwe kútta lón ar túmúnú néúr kewe?
IEI alon emén sam 3,000 som ier ra ló mi meefi kilisou fán meseik: “Nau eu lifang seni ewe Samol mi Lapalap.” (Kölfel 127:3) Ewe pwapwa sam me in ra meefi atun ra féri wiser, ina eú feiéch mi aúchea seni Kot mi kawor ngeni lap ngeni ekkewe mi pwúpwúlú. Iwe nge ra mirititi pwe wisen sam me in a apwapwa, nge a pwal kapachelong chómmóng wis.
2 Ákkáeúin lón ei fansoun, túmúnún semirit, ina eú angang mi chou. Iwe nge, chómmóng ra fen sópwéch me ewe soumakken kél mi fel a áweweei ifa usun: “Are ewe Samol mi Lapalap esap aüetä ewe imw, a solap än ekewe chon aüetä angang.” (Kölfel 127:1) Lapólóón óm kopwe apwénúetáéchú án Jiowa kewe kapasen emmwen, pwal ina lapólóón óm kopwe wiliti emén sam are in mi múrinné. Ewe Paipel a apasa: “Kopwe lükü ewe Samol mi Lapalap ren unusen lelukom, nge kosap lükülükü püsin om sile.” (Än Salomon Fos 3:5) Itá kopwe tipemecheres le aúseling ngeni án Jiowa kewe fén atun kopwe eáni ewe angangen túmúnún semirit lón úkúkún 20 ier?
ETIWA ÁN PAIPEL EKIEK
3. Ifa wisen ekkewe sam lón angangen túmúnún semirit?
3 Lón chómmóng famili wóón unusen fénúfan, ekkewe mwán ra ekieki pwe wisen chék ekkewe fefin ar repwe ákkáiti semirit. Ewer, ewe Kapasen Kot a apasa pwe wisen ekkewe sam ar repwe awora osupwangen chón ar famili lón pekin aion. Iwe nge, me ren ekiekin Kot pwe sam me in repwe álillisfengen le ákkáiti néúr kewe.—Än Salomon Fos 1:8, 9.
4. Itá epwe ifa ekiekin ekkewe sam me in usun néúr kewe?
4 Ifa ekiekimi usun néúmi kewe? Lón ekkóch fénú, famili ra eéreni le mwuuti néún aramaser kewe. A tongeni fókkun weires ngeni emén an epwe apasa aapw atun aramasan a tingor néún. Iwe nge, mi lamot ngeni sam me in ar repwe ekieki pwe wiser ar repwe túmúnú pwisin néúr kewe. Ewe Paipel a kan menlapei ewe riri lefilen sam, in me néúr kewe. (Tuteronomi 6:6, 7; Efisos 6:4) Ámi kana sam me in, oupwe ekieki pwe néúmi kewe semirit, iir “lifang seni ewe Samol mi Lapalap,” oupwe meefi pwe emén me emén leir, iir néúmi “mi achengicheng.”—Kölfel 127:3; Än Salomon Fos 31:2.
5. Ikkefa ekkewe mettóch eú pwúpwúlú repwe ekieki atun repwe filatá saisin ar famili?
5 Chón fénúom we ra kan kútta seni emén fefin an epwe oupwatiw chómmóng semirit? A wor án ewe pean pwúpwúlú pwúúng le filatá ika fitemén semirit repwe néúni. Nge ifa usun ika ekkewe sam me in ra tufichingaw le awora mwéngé, úf me asukul fán iten chómmóng semirit? Iwe, mi lamot repwe ekieki ekkena mettóch atun repwe apwúngaló saisin ar famili. Ekkóch pwúpwúlú rese tongeni atufichi meinisin néúr kewe, ra ngeni aramaser kewe ewe wis ar repwe túmúnú ekkóch néúr kewe semirit. Mi éch ena sókkun féffér? Aapw. Me ese angasaaló ekkewe sam me in seni wiser kewe ngeni néúr kewe. Ewe Paipel a apasa: “Nge are eman esap püsin tümwünü aramasan, fokun püsin chon an famili, a amamäsini an lükülük o an föför a ngau seni föförün eman esap souläng.” (1 Timoty 5:8) Ekkewe pwúpwúlú mi alúkúlúk ra akkóta saisin ‘chon ar famili’ pwe repwe tongeni ‘püsin tümwünüür.’ Ifa usun, iir mi tongeni áeá minen eppetin pwopwo ren ar repwe féri ena? Ina pwal eú mettóch repwe pwisin filatá. Nge ika ekkewe pwúpwúlú ra mochen aúkúkú ar néúnéú, iwe repwe pwal pwisin filatá met sókkun minen eppetin pwopwo repwe áeá. “Eman me eman epwe püsin mwärei wosan wosochou.” (Kalatia 6:5) Iwe nge, eú minen eppetin pwopwo mi tongeni atai ménúkol lón luken inan we, a ú ngeni án Paipel kewe kapasen emmwen. Jiowa Kot i “ewe popun manau.” (Kölfel 36:9, KG) Ina popun, án emén atai néún atun an kerán poputá le fis, a pwáraatá watteen súfélúngaw ngeni Jiowa me a wewe ngeni tipisin ni manaw.—Ekistos 21:22, 23; Kölfel 139:16; Jeremaia 1:5.
AWORA MET MI LAMOT NGENI NÉÚMI WE
6. Itá ineet epwe poputá ewe angangen káit ngeni semirit?
6 Iei met Än Salomon Fos 22:6 a apasa: “Kopwe akaiti ngeni eman semirit usun mine epwe föri lon manauan.” Ewe angangen ákkáiti semirit, ina pwal eú wisen sam me mi kon lamot. Iwe nge, ineet atun epwe poputá ena angangen káit? Seni chék lekúkkúnún. Ewe aposel Paulus a apasa pwe Timoty a angei káit ‘seni chök lekükünun.’ (2 Timoty 3:15) Itiitin ekkena fós lón kapasen Krik a tongeni wewe ngeni emén ménúkol are pwal mwo nge emén esaamwo uputiw. (Lukas 1:41, 44; Föför 7:18-20) Ina popun, Timoty a káit seni chék lekúkkúnún, me a fich ena. Seni chék lekúkkúnún ewe semirit, ina ewe fansoun mi fókkun múrinné ekkewe sam me in repwe poputá le ákkáiti. Emén ménúkol a pwal mwo nge fókkun mochen káé.
7. (a) Pwata a lamot án sam me in repwe ámááraatá ririéch lefiler me néúr we? (b) Ifa ewe riri lefilen Jiowa me Néún we áláemén?
7 Iei alon emén in: “Atun a kerán uputiw nei we, ua poputá le tongei.” Pwal ina meefien chómmóng inelap. Ena ririéch lefilen emén inelap me néún we ménúkol, a lallapóló atun ewe inelap a kan awora fansoun ngeni ewe ménúkol mwirin an uputiw. Án emén ménúkol oupw a pwal ámáári ena riri. (Apépé ngeni 1 Tesalonika 2:7.) Án emén in tottofi néún we ménúkol me fóffós ngeni, a fókkun lamot pwe epwe awora met mi lamot ngeni ewe ménúkol lón pekin memmeef. (Apépé ngeni Aisea 66:12.) Nge ifa usun ren ewe sam? Mi lamot an epwe pwal ririéch ngeni néún we upufé. Jiowa pwisin a awora eú leenien áppirú usun ena. Lón ewe puken Än Salomon Fos, sia káé án Jiowa riri ngeni Néún we áláemén mi erá: “Ewe Samol mi Lapalap a föriei, a akom le föriei . . . ngang popun an pwapwa iteiten rän.” (Än Salomon Fos 8:22, 30; Johannes 1:14) Pwal ina usun ren emén sam mi múrinné, a ámááraatá eú riri mi tong lefilan me néún we seni chék leuputiwan. Iei alon emén sam: “Pwáraatá tong lón sókkópaten napanap. Ese wor emén semirit epwe má ren ach foropachei me kisi.”
8. Ifa usun ekkewe sam me in repwe mwittir anganga ekiekin néúr kewe ménúkol?
8 Nge a pwal lamot ngeni ekkewe ménúkol ekkóch mettóch. Seni chék leuputiwer, a fen mmólnetá tupwuer le angei me isoni ekkóch pwóróus, iwe ekkewe sam me in repwe ákkáeúin awora. Áwewe chék ren ewe mettóch fós. Soukáé ra erá pwe tufichin án emén semirit káé le fós me állea “a lóngólóng wóón napanapen ar fóffósfengen me seman kewe me inan mi fis seni atun a kerán uputiw.” Kopwe fós me állea ngeni noum we seni leménúkolun. Ekiseló epwe mochen nikáppiruk me ekiseló kopwe áiti állea. Ese mwáál, a tongeni sile állea me mwen epwe sukul. A fókkun álilliséch ena ika oua nóm lón eú fénú ikewe ia mi nafangaw sense ie me ekkewe classroom mi kon chómmóng chón sukul lón.
9. Ifa ewe mettóch ekkewe sam me in repwe fókkun achocho ngeni?
9 Ewe mettóch mi kon lamot ngeni ekkewe sam me in Chón Kraist, ina ar awora met mi lamot ngeni néúr we lón pekin lúkú. (Ppii Tuteronomi 8:3.) Nge met repwe achocho ngeni? Repwe álisi néúr we le ámááraatá an napanapeni napanapen Chón Kraist, weween epwe eáni ‘lapalap mi fo.’ (Efisos 4:24, TF) Ren ena, ekkewe sam me in repwe ekieki ekkewe pisekin kaú imw mi fich me napanapen kaú imw mi pwúng lón kapas áwewe.
ÁKKÁITI NÉÚMI WE EWE ENLET
10. Met sókkun napanap mi lamot ekkewe semirit repwe ámááraatá?
10 Péchékkúlen are apwangapwangen eú imw a fókkun lóngólóng wóón met sókkun pisekin imw ra áeá le kaú. Ewe aposel Paulus a erá pwe ikkeei ekkewe pisek mi fókkun múrinné fán iten napanapen Chón Kraist, “kolt, silifer ika fau aüchea.” (1 Korint 3:10-12) Ra wewe ngeni ekkewe napanap lúkú, tipachem, mirit, tuppwél, súfél me aúcheani Jiowa me an kewe allúk. (Kölfel 19:7-11; Än Salomon Fos 2:1-6; 3:13, 14) Ifa usun ekkewe sam me in repwe álisi néúr kewe seni lekúkkúnúr le ámááraatá ekkena napanap? Ren ar apwénúetá ewe emmwen mi fen kawor seni me lóóm.
11. Ifa usun ekkewe sam me in chón Israel repwe álisi néúr kewe le ámááraatá napanapen Kot kewe?
11 Iei met Jiowa a ereni ekkewe sam me in chón Israel, ekiseló mwen ar repwe tolong lón ewe Fénúen Pwon: “Ekei kapas üa allük ngonuk ikenai repwe nom lon lelukom. Iwe, kopwe achocho le aiti [“fótukalong,” NW] ngeni noum kewe ekei kapas, kopwe pwal fos usur lupwen kopwe mot lon imwom pwal lupwen kopwe fetal won al, lupwen kopwe konola pwal lupwen kopwe pwätä.” (Tuteronomi 6:6, 7) Ewer, mi lamot pwe ekkewe sam me in repwe eú leenien áppirú ngeni néúr kewe, repwe chiechien néúr kewe, repwe pwóppwóróus ngeniir me repwe chón káit ngeniir.
12. Pwata a lamot ekkewe sam me in repwe leenien áppirú mi múrinné?
12 Oupwe eú leenien áppirú. Akkomw, Jiowa a apasa: “Ekei kapas . . . repwe nom lon lelukom.” Mwirin a apasa: “Kopwe achocho le aiti ngeni noum kewe ekei kapas.” Ina popun mi lamot án sam are in akkomw lefareni lón letipan napanapen Kot kewe. Emén sam are in epwe tongei ewe enlet me etipeeú manawan ngeni. Pún ina chék atun epwe tongeni achchúngú letipen néún we. (Än Salomon Fos 20:7) Pwata? Pún ekkewe semirit ra kon chúng ren met ra kúna lap seni met ra rongorong.—Lukas 6:40; 1 Korint 11:1.
13. Ifa usun ekkewe sam me in Chón Kraist repwe áppirú Jesus lón ar chúngú néúr kewe?
13 Oupwe chiechien néúmi kewe. Jiowa a ereni ekkewe sam me in chón Israel: ‘Oupwe pwal fos ngeni néúmi kewe lupwen oupwe mot lon imwemi pwal lupwen oupwe fetal won al.’ Weween ekkewe sam me in repwe awora fansoun ngeni néúr kewe inaamwo ika ra kon osukosuk. A ffat pwe Jesus a meefi pwe mi fich an epwe ngeni ekkewe semirit an fansoun. Lesópwólóón an angangen afalafal, “aramas ra uwato nöür semirit ren Jesus, pwe epwe iseis pöün wor.” Nge met meefien Jesus? “Jesus a romi ekewe semirit . . . o a afeiöchüür.” (Markus 10:13, 16) Anchangei mwo pwe a arapoto muchún manawen Jesus. Nge a chúen ngeni ekkena semirit an fansoun me chúngúúr. A ifa me échún ena leenien áppirú!
14. Pwata a álilliséch án ekkewe sam me in awora ar fansounfengen me néúr kewe?
14 Oupwe pwóppwóróus ngeni néúmi kewe. Ámi awora fansoun ngeni néúmi, epwe álisikemi le pwóppwóróus ngeniir. Lapólóón ámi pwóppwóróus ngeniir, pwal ina lapólóón ámi oupwe tongeni mirititi ifa usun mámmáárin napanaper kewe. Iwe nge, chechchemeni pwe pwóppwóróusfengen ese chék wewe ngeni fóffós. Iei alon emén in lón Brazil: “A lamot ai upwe ámááraatá ai tufichin aúseling, weween ai upwe aúseling seni letipei.” A uwaéch an mosonottam pokiten néún we át a poputá le uwawu meefian ngeni.
15. Met mi lamot sam me in repwe chechchemeni usun ekkewe minen kunou me apwapwa?
15 A lamot ngeni semirit “fansoun takir . . . pwal fansoun pwörük,” weween fansoun kunou me apwapwa. (Än Salomon Afalafal 3:1, 4; Sekaraia 8:5) Ewe fansoun kunou me apwapwa epwe fókkun álilliséch ika ekkewe sam me in me néúr kewe ra pwapwaiti. A eletipechou pokiten me ren chómmóng famili pwe minen kunou me apwapwa a wewe ngeni ar repwe katol TV. Eli ekkóch ekkewe prokram lón TV ra apwapwa nge lap ngeni ra atai múrinnéén emén, me katol TV a eppeti án ewe famili fansoun pwóppwóróusfengen. Ina popun, pwata ouse féri ekkeei mettóch ngeni néúmi kewe, áwewe chék kél, urumwot, kukkunou ren chienemi kewe me kunou lón ekkewe leeni mi apwapwa? Ekkena sókkun mettóch ra álisatá alen pwóppwóróusfengen.
16. Met ekkewe sam me in repwe áiti ngeni néúr kewe usun Jiowa me ifa usun repwe féri ena?
16 Oupwe chón káit ngeniir. Iei alon Jiowa: ‘Oupwe achocho le aiti [“fótukalong,” NW] ngeni noumi kewe ekei kapas.’ Ewe wokisin me mwan a apasa met oupwe eáni asukul me ifa usun. Áeúin, ‘oupwe echeni ewe Samol mi Lapalap ämi Kot ren unusen lelukemi, ren unusen ngünumi, pwal ren unusen tufichimi.’ (Tuteronomi 6:5) Mwirin, fótukalong “ekei kapas.” Asukula néúmi kewe pwe repwe ámááraatá ar unusen tongei Jiowa me an kewe allúk. (Apépé ngeni Ipru 8:10.) Ewe kapas “fótukalong” a wewe ngeni an epwe fis asukul iteitan. Ina popun usun itá Jiowa a ereni sam me in pwe ren ar fóffós ngeni néúr kewe iteitan, ina ákkáeúin alen ar repwe álisiir le ámááraatá napanapan kewe lón manawer. A kapachelong ar repwe káé ngeniir ewe Paipel iteitan.
17. Met mi lamot ekkewe sam me in repwe ámááraatá lón néúr we? Pwata?
17 Chómmóng sam me in ra silei pwe ese mecheres ar repwe fótukalong lón letipen emén semirit och mettóch. Ewe aposel Petrus a pesei chienan kewe Chón Kraist: “Oupwe usun chök ekewe mönükol mi upufö, fansoun meinisin oupwe fokun moneti ewe chönün oup mi wewe ngeni Kapasen Kot.” (1 Petrus 2:2) Pokiten esap meinisin ra pwisin mwoneiti ewe mwéngé lón pekin lúkú, ina popun mi lamot án sam me in repwe kútta alen án néúr we epwe fókkun mwoneiti ewe milik lón pekin lúkú usun chék ekkewe upufé.
18. Ikkefa ekkewe minen asukul Jesus a eáni mi pesei ekkewe sam me in le áppirú?
18 Jesus a achchúngú letipen aramas ren an néúnéú kapas áwewe. (Markus 13:34; Lukas 10:29-37) Ena sókkun asukul a ákkáeúin álilliséch ngeni ekkewe semirit. Oupwe áiti ngeniir án Paipel kewe kapasen emmwen ren ámi néúnéú ekkewe pwóróus mi ling me ámmeseik, eli ekkewe pwóróus lón ewe puk Nei Puken Pwóróusen Paipel.a Oupwe mut ngeni ekkewe semirit ar repwe pwal kapachelong lón ewe káé. Mut ngeniir ar repwe pwári ar tufichin chúnga me pwomweni ekkóch pwóróus seni Paipel. Jesus a pwal néúnéú kapas eis. (Mateus 17:24-27) Áppirú napanapen án Jesus minen asukul lón ámi famili fel. Lap seni ámi chék pwisin apasaatá eú án Kot allúk, eáni ekkóch kapas eis, usun chék: Pwata Jiowa a ngenikich ei allúk? Met epwe fis ika sia álleasochisi? Met epwe fis ika sise álleasochisi? Ekkena sókkun kapas eis ra álisi emén semirit le ekiekiéchú me kúna pwe án Kot kewe allúk, ra álilliséch me múrinné.—Tuteronomi 10:13.
19. Ika ekkewe sam me in ra álleasochisi án Paipel kewe kapasen emmwen fán iten néúr kewe, iwe ikkefa ekkewe feiéch ekkewe semirit repwe pwapwaiti?
19 Ren ámi wiliti leenien áppirú fán iten néúmi we, wiliti chiechian, pwóppwóróus ngeni me chón káit ngeni, oua tongeni álisi seni lekúkkúnún le ámááraatá pwisin an ririéch ngeni Jiowa Kot. Ena riri epwe apéchékkúla le pwapwa lón an eáni manawen emén Chón Kraist. Epwe achocho le tipeppós lón an lúkú pwal mwo nge fán etipetipaen chienan kewe me fán sóssót. Oupwe ákkálisi le aúcheani ena riri mi aúchea.—Än Salomon Fos 27:11.
AÚCHEAN LAMOTEN ANGANGEN EMIRIT
20. Met weween angangen emirit me ifa usun epwe fis?
20 Angangen emirit ina eú minen káit mi áwenechara ekiek me letip. A lamot ena ngeni ekkewe semirit iteitan. Paulus a fénéú ekkewe sam ar repwe “foleniochu ir [néúr kewe] ren sokkun amirit me fonou me ren ewe Samol.” (Efisos 6:4, TF) Sam me in repwe eáni ewe angangen emirit fán tong, usun met Jiowa a féri. (Ipru 12:4-11) Angangen emirit mi lóngólóng wóón tong epwe tongeni fis ren áweweéch. Ina popun sia fen angei pesepes ach sipwe “aüselinga” kapasen emirit. (Än Salomon Fos 8:33) Ifa usun epwe fis ewe angangen emirit?
21. Ikkefa ekkewe kapasen emmwen sam me in repwe ekieki atun ra emiriti néúr kewe?
21 Ekkóch sam me in ra ekieki pwe ar emiriti néúr kewe a wewe ngeni ar repwe chék eniwer lón ar fós, mineer are pwal mwo nge ákkápiir. Iwe nge, iei án Paulus fén usun ena: “Ämi sam . . . ousap föri ngeni nöümi kana mine repwe song ren.” (Efisos 6:4) Chón Kraist meinisin ra angei pesepes ar repwe ‘kirikiröch ngeni aramas meinisin . . . pwal tipepwetete lon ar fönöü chokewe mi ü ngeniir.’ (2 Timoty 2:24, 25) Sam me in Chón Kraist repwe chechchemeni ekkena kapasen pesepes lón ar emiriti néúr kewe fiti ar mirititi lamoten ar tipeppós lón ena angangen emirit. Fán ekkóch, ese naf án ekkewe sam me in repwe chék áweweéchú och mettóch ngeni néúr kewe nge mi lamot ekkóch sókkun angangen apwúng fán iter.—Än Salomon Fos 22:15.
22. Ika a lamot ngeni emén semirit kapwúng, met a lamot an epwe weweiti?
22 A lamot ngeni emén me emén semirit angangen emirit mi fichiiti. Ekkóch me leir rese tongeni mirit “ren kapas chök.” Ekkena sókkun semirit, fán ekkóch a lamot repwe kapwúng ren ar álleasolap pwe eli ina met epwe amanawer. (Än Salomon Fos 17:10; 23:13, 14; 29:19) Nge mi lamot án ewe semirit epwe weweiti popun an kapwúng. Paipel a erá: “Efoch wok me kapasen fön ra atoto tipachem.” (Än Salomon Fos 29:15; Hiop 6:24) Pwal och, epwe wor aúkúkún ewe angangen apwúng. Iei met Jiowa a apasa ngeni néún kewe aramas: “Üpwe apwüngükemi fän aüküköch.” (Jeremaia 46:28b) Ewe Paipel ese fókkun tipeeú ngeni angangen kawetengaw fán song mi ekinasa pwal mwo nge efeiengawa emén semirit.—Än Salomon Fos 16:32.
23. Itá met emén semirit epwe mirititi atun seman me inan ra apwúngú?
23 Atun Jiowa a éúréúra néún kewe aramas pwe epwe apwúngúúr, a akkomw apasa: “Ousap niuokus, pun ngang üpwe etikemi.” (Jeremaia 46:28a) A pwal ina usun ren án sam me in angangen kapwúng, ese lifilifil lón met sókkun napanap nge itá resap fókkun ámmeef ngeni ewe semirit pwe ese wor tongan. (Kolose 3:21) Nge, ewe semirit epwe meefi pwe ena kapwúng a kawor pokiten ekkewe sam me in ra ‘eti i,’ weween ra peni.
TÚMÚNÚ NÉÚMI SENI FEIENGAW
24, 25. Ifa eú efeiengaw mi kon ngaw mi lamot ekkewe semirit repwe kúna túmún seni lón ekkeei rán?
24 Chómmóng watte ra nesékúriti lekúkkúnúr kewe pwe ina eú fansoun mi apwapwa. Ra chechchemeni pwe ra fókkun meefi núkúnúkéch, pún ra lúkúlúk wóón semer kewe me iner pwe repwe túmúnúúr fansoun meinisin. Sam me in ra mochen pwe néúr kewe repwe meefi ena, nge pokiten ngangngawolóón ei fénúfan, iwe a kon áweires lap seni me lóóm án ekkewe sam me in repwe túmúnú néúr kewe seni feiengaw.
25 Án aramas kirikiringaw ngeni semirit lón pekin lisowu, ina eú feiengaw mi kon ngaw mi lallapóló lón ekkewe ier. Lón Malaysia, a lapóló fán rúáánú lón 10 ier ekkewe repot usun kirikiringaw ngeni semirit. Lón Tois órun 300,000 semirit ra feiengaw iteiten ier ren kirikiringawen aramas. Nge me ren eú repot, pwe eú fénú lón South America a wor órun 9,000,000 semirit ra feiengaw iteiten ier! A fókkun eletipechou pokiten feiengawen lap ngeni ekkena semirit a fis lón pwisin imwer seni chókkewe iir mi sissileer me lúkúlúk wóór. Nge itá ekkewe semirit repwe lúkúlúk wóón semer kewe me iner ar repwe túmúnúéchúúr. Ifa usun ekkewe sam me in repwe túmúnú néúr kewe?
26. Ikkefa ekkóch alen án semirit repwe tongeni kúna túmún, me ifa usun sile a tongeni túmúnú semirit?
26 Ekkewe pwóróus ra pwári pwe feiengaw seni ekkewe chón kirikiringaw, a ákkáeúin fis ngeni ekkewe semirit rese kon silei pwóróus usun lisowu. Án sam me in asukula néúr semirit pwal mwo nge seni lekúkkúnún, ina eú minen túmún mi lap. Sile epwe tongeni túmúnú emén ‘seni an epwe föri mine a ngau, pwal seni ekewe aramas mi eäni kapasen likatuputup.’ (Än Salomon Fos 2:10-12) Met sókkun ena sile? Sile usun án Paipel kewe kapasen emmwen ren minne mi pwúng me mwáál. Pwal ewe silei pwe ekkóch watte ra féri minne mi ngaw, me emén kúkkún esap rongorong ngeniir ika ra apasa pwe repwe féri ngeni minne ese éch. (Apépé ngeni Taniel 1:4, 8; 3:16-18.) Ousap aúkúkú ámi kakkapas ngeniir usun ena emmwen. Lap ngeni ekkewe kúkkún, a lamot an epwe ekkenniwil ngeniir fán fite ewe lesen me mwen repwe chechchemeniéchú. Pwal och, atun ekkewe semirit ra mámmááritá, emén sam epwe weweiti pwe a wor ekkóch atun án néún we nengngin epwe sani an epwe chék áláeménúló, me emén in epwe pwal weweiti pwe néún we át epwe pwal ina usun. Ina met epwe álisi án emén semirit epwe weweiti pwe ina eú féfférún súfél seni ekkewe watte. Ren enletin, án ámi sam me in mammasaéchú néúmi we, ina eú me lein ekkewe mettóch epwe fókkun eppeti an esap fis ngeni kirikiringaw.
KÚTTA ÁLILLIS SENI KOT
27, 28. Ié we án sam me in Popun álillis mi lap lón ar túttúmúnú néúr fán weires?
27 Ren enletin, án sam me in ákkáiti néúr we seni lekúkkúnún, a áweires nge ekkewe sam me in Chón Kraist resap ekieki pwe ese wor chón álisiir. Lón fansoun ekkewe Soukapwúng me lóóm, lupwen emén mwán itan Manoa a silei pwe epwele wiliti emén sam, a tingor án Jiowa emmwen ren ifa usun epwe túmúnú néún we. Jiowa a pélúweni an kewe iótek.—Soukapwüng 13:8, 12, 24.
28 Pwal ina usun lón ei fansoun ren ekkewe sam me in Chón Kraist mi túmúnú néúr kewe, ra pwal tongeni iótek ngeni Jiowa usun. Wisen sam me in, a fókkun weires nge a pwal wor chómmóng feiéchún. Iei alon eú pean pwúpwúlú Chón Kraist lón Hawaii: “A wor 12 ier oupwe angang weires lón me mwen an epwe tori ekkewe ierin teenage mi áweires. Nge ika oua angang weires le apwénúetá án Paipel kewe kapasen emmwen, iwe atun repwe filatá pwe ra mochen angang ngeni Jiowa seni letiper, ina ewe fansoun oupwe kini pwapwa me kinamwe.” (Än Salomon Fos 23:15, 16) Atun néúmi we a filatá ena, oua pwal tongeni meseik le apasa: “Nau eu lifang seni ewe Samol mi Lapalap.”
a Férien Chón Pwáraatá Jiowa.